Ձեր վստահելի աղբյուրը

Մեղրի համայնքում սահմանային քարտեզագրման հետ կապված շոշափելի խնդիր առկա է Նռնաձոր գյուղում։ Թշնամին կանգնել է  ուղիղ սահմանագծի վրա։ Panorama.am-ի հետ զրույցում Մեղրի համայնքի ղեկավար Մխիթար Զաքարյանը հայտնեց, որ չեզոք գոտին պահպանված չէ, ինչը մտահոգության տեղիք է տալիս։

Նշենք, որ Նռնաձոր գյուղը համայնքի ակտիվ գյուղերից մեկն է, նռնենիների բնօրրանը։ Մեղրի համայնքի գյուղատնտեսական հողերի շուրջ 30 տոկոսն այս գյուղում է։

Այդուհանդերձ, համայնքի բնակիչներին հուզող և ամենամտահոգիչ հարցը, որում դեռևս հստակություն չկա, Նախիջևանը Ադրբեջանին կապող ճանապարհն է, որն անցնելու է Մեղրիիով։ Մխիթար Զաքարյանի խոսքով՝ այս հարցում անորոշություն է և ոչ մի պարզաբանում Կառավարությունից։

«Մեղրիի բնակչությունն անհանգստացած է, ի՞նչ ճանապարհի մասին է խոսքը, երկաթգիծ է լինելու, թե՞ այլ բան։ Այս հարցում դեռևս հստակություն չկա։ Համաձայնագրում կամ կապիտուլացիայի թղթում 9-րդ կետում նշված է, որ պետք է ճանապարհ բացվի Մեղրիի միջով, Նախիջևան-Ադրբեջան ճանապարհի ստեղծման մասին է խոսքը, բայց հստակեցված չէ, թե ինչ է լինելու։ Հույս ունենք, որ  գոնե երկաթգիծ է լինելու։ Սակայն, տեսնելով վերջին զարգացումները, մարդկանց ուրիշ բան են ասում, իսկ իրականությունն այլ բան է լինում, անհանգստությունն էլ ավելի է մեծանում։  Ինչպես Շուռնուխում կամ Որոտանում տեսանք, թե ինչ կատարվեց։ Կարող է ադրբեջանական ինչ-որ ստորաբաժանում գա և հայտարարի, որ դա իրենց տարածքն է ու մենք պետք է ազատենք։ Այսինքն՝ ադրբեջանցիները սկսեն իրավունքներ բանեցնել»,- ասաց համայնքի ղեկավարը։

Այս խնդրով մտահոգված են,հատկապես դպրոցականների, երիտասարդների ծնողները, քանի որ ամեն պահի կարող է վտանգ լինել։ Մինչդեռ կառավարությունը դեռ լուռ է՝ չպատասխանելով բնակչությանը, թե ի՞նչ ճանապարհ է լինելու՝ օդային կամո՞ւրջ, նոր ցամաքային ճաանապարհ, թե՞ երկաթգիծ։

Բնակչության շրջանում անհանգստություններն էլ ավելի կխորանան, երբ սկսեն շինարարական աշխատանքները։ Այսինքն՝ թղթի վրա գրվածը տեսանելի լինի գործնականում։

Մխիթար Զաքարյանի համար ամեն դեպքում ընկալելի չէ մեր ղեկավարության ներկայիս պահվածքը՝ սահմանագծման հարցում։

«Մեր կառավարությունն իրեն պահում է ավելի քան պարտվածի կարգավիճակում։ Հասկանում եք, սա սովորական պարտություն չէ, պարտությունն էլ ձև ունի։ Այժմ  արտությունից մի քանի անգամ ծանր իրավիճակ է։ Թշնամին էլ տեսնելով այս ամենը, կարող է ավելի մեծ նկրտումներ ունենալ, բացի տրանզիտ ճանապարհից։ Հայաստանի Հանրապետությունը պետք է իմունիտետ ունենա և կարողանա իր շահերը պաշտպանել»,- նման կարծիք հայտնեց Մեղր համայնքի ղեկավարը։ 

Ի տարբերություն իշխանության շրջանում խորացող պարտվածությանը, մեղրեցիները զգոն են, միշտ կանգնած են սահմանին։ Սակայն, ինչպես Մխիթար Զաքարյանն է ասում՝ մի բան է բնակիչների զգոն լինելը, այլ բան է խնդիրը կատարելն ու չպարտվելը։ Այս հարցում, ըստ նրա, սահմանին կանգնած բնակիչն այժմ միայնակ է։

Հարցին,թե արդյոք Մխիթար Զաքարյանի դեմ դեռևս քրեական գործ հարուցված չէ, ինչպես դա եղավ իր գործընկերների հետ, կես կատակ, կես լուրջ համայնքի ղեկավարը պատասխանեց․
«Ինձ անտեսել են, դեռ արհամարված վիճակում եմ, գործ չեն հարուցել»,- ասաց նա։ 

Այնուհետև նա նշեց.

«Հաշվի առնելով գերագույն գլխավոր հրամանատարի անձն ու արած հայտարարությունը՝ առ այն, որ իր հրամանատարական կարողությունների վրա ոչ ոք չկասկածի, կարող եմ վստահաբար ասել՝ ես կասկածում եմ, ավելի ճիշտ վստահ եմ, որ չկա։ Հրամանատարական կարողությունը այնպես չէ, որ 45 տարեկանում մեկ էլ ի հայտ է գալիս։ Հրամանատարական կարողություններ լինում են այն տղամարդու մոտ, որը 18-20 տարեկանում զինծառայություն է անցնում, այնուհետև վերապատրաստվում է կյանքի ընթացքում։ Գուցե անկեղծորեն հավատում է, որ ունի այդ կարողությունները և փորձում է ապացուցել։ Բայց մենք համաձայն չենք փորձադաշտ լինելու, առաջնորդը պետք է փորձված լինի»։

Նշենք, որ սահմանի բնակիչները գիտեն փորձարկումների գինը, արդեն տեսել են, հիմա հարկավոր է ի շահ մեր երկրի քայլեր կատարել։