Ձեր վստահելի աղբյուրը

Սուրբ Աթոռում ՀՀ նախկին դեսպան Միքայել Մինասյանը ֆեյսբուքյան իր էջում հրեպարակել է Requiem/5-ը, որը վերնագրված է «Երազանքներ»։

«Փլուզված երազանքներ. ՀԱՊԿ-ի գաղտնի փաստաթուղթը՝ պատերազմի անտեսված նախազգուշացում»,- տեսանյութին կից գրել է նախկին դեսպանը։

«Արցախով մենք հետ բերեցինք և ունեցանք մեր անկախ պետությունը, Արցախով մենք առաջին անգամ վերականգնեցինք պատմական արդարությունը՝ ցույց տալով, որ մեզ անհնար է ուղղակի ջարդել և մորթել, որովհետև Սումգայիթից և Բաքվից հետո մենք հաղթեցինք։ Մենք մեր պատմական, ազգային, երազանքներն իրականացրեցինք։ Նիկոլ Փաշինյանը հետևողականորեն քանդեց մեր երազանքները»,- նշում է Միքայել Մինասյանն իր տեսանյութում՝ ավելացնելով, որ ամենամեծ վնասն այն է, որ Նիկոլ Փաշինյանը Ադրբեջանին նվիրեց ազգային երազանքը։

Նա հիշեցրեց, Ադրբեջանը նոր ստեղծված պետություն է, որը ձևավորվել է փողի ու ուղղակի հողի շուրջ, այնտեղ հանդիպում են տարբեր էթնոսի մարդիկ, որոնց միավորում էր նավթն ու հողը։

«Նրանց պակասում էր հաղթանակը, որպեսզի սկսեն դառնալ ազգ։ Նիկոլ Փաշինյանը վերցրեց մեզանից մեր ազգային հաղթանակն ու նվիրեց ադրբեջանցիներին՝ անելով ամենակարևոր թշնամական ակտը»,- ասում է Մինասյանը։

Նախկին դեսպանի խոսքով, սխալվում են բոլոր նրանք, ովքեր կարծում են Արցախը, Սյունիքը, Տավուշը տալով՝ կունենանք հանգիստ կյանք։

«Այդ երազանքն էլ է անիրականանալի այսուհետ։ Նիկոլ Փաշինյանը քանդեց բոլորիս երազանքը։ Նիկոլի գալով Հայաստանում ոչ ոք երջանիկ չէ։ Նույնիսկ Արթուր Սաքունցը, սորոսականները, Արցախի նախագահ Արայիկ Հարությունյանը, Աննա Հակոբյանը երջանիկ չեն»,- ասում է դեսպանը։

Մինասյանը նշում է, պատերազմի ավարտից մեկ ու կես ամիս անց չգիտենք, թե պատերազմում քանի մարդ է զոհվել, քանիսն են վիրավորվել, քանի գերի կան, նույնիսկ տեղյակ չենք, թե ինչ է ստորագրել Փաշինյանը։

«Լավ սրանք ստոր տականք են, բա մե՞նք։ Էլ ի՞նչ պետք է լինի, որ մենք հասկանանք, այդ մարդը սուտասան է, ինքը իր ոչ մի բառի համար պատասխանտու չէ, մենք էլ ի՞նչ ենք սպասում»,- ասում է նա՝ ընդգծելով, որ մարդկանց մեծ մասը որպես աքսիոմա ընդունում են՝ Նիկոլը սուտասան է։

Մինասյանը պնդում է՝ Նիկոլ Փաշինյանն ունի հոգեկան խանգարումներ, «որովհետև նորմալ մարդը չի կարող անընդմեջ երկուսուկես տարի մի ամբողջ ժողովրդի խաբի։ Չի եղել մի դեպք, որ Նիկոլ Փաշինյանի խոսքն ու գործը համընկնի»։

Անդրադառնալով Նիկոլ Փաշինյանի հակասական հայտարարություններին, որտեղ նա մեկ ասում է, թե տեղյակ է եղել պատերազմի մեկնարկի մասին, մի քանի օր անց հայտարարում է, թե չի իմացել այդ մասին՝ Մինասյանն ասաց, նյութեր է հրապարակելու, որտեղ կկարդաք ամեն ինչ։

«Պատերազմից 26 օր առաջ ՀԱՊԿ գլխավոր քարտուղար Զասը գրում է Անվտանգության խորհրդի քարտուղար, վաստակավոր սորոսական Արմեն Գրիգորյանին նամակ ու կցում է փաստաթղթերի փաթեթ, առաջարկում է  անցկացնել ՀԱՊԿ շրջանակներում ռազմական շտաբային զորավարժություններ, նկարագրում է այն պատերազմը, որին պետք է պատրաստ լինի Հայաստանը։ Նա կոչ է անում դիմել ՀԱՊԿ, որովհետև ըստ փաստաթղթի, Հայաստանն անկարող էր դիմանալ այն պատերազմին, որը նկարագրված էր ՀԱՊԿ գաղտնի նամակում»,- ասում է Մինասյանը։

Նա մանրամասնում է՝ գաղտնի նամակում նկարագրված էր, որ Հայաստանում 2019-ից  գործում են գաղտնի գործակալական ցանցեր՝ բաղկացած ահաբեկիչներից, որոնք պատրաստվում էին պատերազմի ժամանակ իրականացնել ինֆորմացիոն ու ռազմական ահաբեկչություններ, ԱԱԾ-ն դրանք պետք է նույնականացներ ու չեզոքացներ։ Նույն նամակում ասված էր, որ 2018-ից սկսած խախտվել է ռազմական բալանսը՝ ի օգուտ Ադրբեջանի, գրված էր, որ Նախիջևանի դիրքային կորուստները ռազմավարական խնդիրներ են առաջացրել Հայաստանի ու Արցախի համար, նույն նամակում գրված է, որ Հայաստանն արդեն երկու տարի տանուլ է տալիս ինֆորմացիոն ու դիվանագիտական պատերազմը, նույն նամակում գրված էր, որ Հայաստանն ու Արցախը կռվելու էին Ադրբեջանի ու Թուրքիայի բանակների դեմ, ներգրավված են լինելու Սիրիայից բերված ահաբեկիչներ։

«Ես կարծում եմ, որ ՀԱՊԿ քարտուղարի նամակը դիվանագիտական զգուշացում էր Հայաստանին, դիմեք ՀԱՊԿ, դուք չեք կարող սրա տակից դուրս գալ։ Ես հարց ունեմ, ինչո՞ւ Հայաստանի Հանրապետությունը չդիմեց ՀԱՊԿ-ին»,- ասաց Մինասյանն ու կոչ արեց բոլորին դիմել կառավարությանը նույն հարցով։