Ձեր վստահելի աղբյուրը

«Փաշինյանն ու իր թիմը երբ եկան իշխանության, առաջնային թիրախներից մեկը ընտրվել էր Հայ Առաքելական եկեղեցին: Դա պատահական չէ»,- ասուլիսում ասաց ՀՀ փաստաբանների պալատի նախագահ Արա Զոհրաբյանը:

Նա նշեց, որ եկեղեցին ազգային ինստիտուտ է, ունի նաև մեր ազգային ինքնությունը պաշտպանելու իմունիտետ:

«Այս առումով եկեղեցու թուլացումը և հասարակության մոտ եկեղեցու նկատմամբ բացասական վերաբերմունք ձևավորելը, բնականաբար, իշխանության օրակարգային հարցերից մեկն էր»,- ասաց Ա. Զոհրաբյանը:

Փաստաբանների պալատի նախագահի խոսքով, մեր պատերազմը դեռ չի ավարտվել, իսկ այս պայմաններում Փաշինյանը չի կարող լինել վարչապետ:

«Եթե մարդկանց թվում է, թե Փաշինյանն այդ թուղթը ստորագրելով, զիջումների գնալով  պատերազմը կանխեց, չարաչար սխալվում են»,- ընդգծեց Ա.Զոհրաբյանը:

Ըստ նրա, ռազմական բախման դեպքում շատ կարճ ժամանակահատվածում Կապանն էլ կգրավեն, քանի որ պաշտպանվելու համար որևէ բան չեն ունենա, կկտրեն նաև Իրան-Հայաստան կապը:

Արա Զոհրաբյանն անհասկանալի է համարում, թե ինչու է Հայաստանը ստորագրած հայտարարությունից դուրս զիջումների գնում. «Եթե Ադրբեջանը փորձում է  մեզ սպառնալ, որ եթե զիջումները չլինեն, պատերազմ կսկսի, հիմա պատկերացրեք՝ սա զիջելուց հետո, ասի՝ իմ պատկերացմամբ Զանգեզուրն իմն է եղել, դա տվե՞ք ինձ: Այսինքն, պետության շահը զիջելով՝  գնալու ենք մինչև ո՞ւր, ի՞նչ ենք զիջելու: 

Այն պատրվակով, որ՝ եկեք զիջենք, որ պատերազմ չլինի, հարց պետք է տանք՝ զիջենք մինչև ո՞ւր: Պետության շահը երբեք չի կարելի զիջել: 

Մի բան պետք է գիտակցել. եթե մենք ադրբեջանցիների հետ խաղաղասիրությամբ, առանց պաշտպանելու ունակությամբ փորձենք ապրել, չի ստացվելու, ժամանակի հարց է, կրկին ցեղասպանվելու ենք»:

Նա նշեց, որ այսօր պաշտոնատար անձինք տեսնում են՝ ոչ միայն ձախողակի կողքն են, նաև մի մարդու, որ կործանվելու է: Ա. Զոհրաբյանի խոսքով, այդ մարդկանց երկու բան է անհրաժեշտ՝ տեսնել այն ուժին, որը կարող է իշխանություն վերցնել ու պահել, երկրորդ՝ իրենց պետք է տրվի հումանիտար միջանցք:

Ա. Զոհրաբյանի խոսքով, Հանրապետության նախագահը նույնպես մեղավորություն ունի այս ամենում. «Ինքը պակաս մեղավոր չէ Նիկոլ Փաշինյանից իր անգործությամբ, նաև այն վարքագծով, որը մենք չենք տեսնում»: