Ձեր վստահելի աղբյուրը

«Մինչև Նիկոլ Փաշինյանը չհեռանա, քաղաքը միշտ էլ այս վիճակում է լինելու, որովհետև այն, ինչ արվեց, ներել հնարավոր չի»,- Հանրապետության հրապարակում լրագրողների հետ զրույցում հայտարարեց Փաշինյանի հրաժարականը պահանջող քաղաքական ուժերի կողմից ազգային համաձայնության կառավարության ղեկավարի միասնական թեկնածու առաջադրված Վազգեն Մանուկյանը։

Հիշեցնենք, որ այսօր ԱԺ դիմաց բողոքի ակցիա իրականացրած քաղաքացիները երթով քայլեցին դեպի Հանրապետության հրապարակ, այնտեղ եկավ նաև Վազգեն Մանուկյանը։ Հրապարակում ակցիան քիչ տևեց։

Վազգեն Մանուկյանի խոսքով, Փաշինյանի պատոնավարման ամեն օրը կործանարար է Հայաստանի համար։

Պատասխանելով արտահերթ ընտրությունների վերաբերյալ Նիկոլ Փաշինյանի հայտարարությանը,  միասնական թեկնածուն կասկած հայտնեց, որ Փաշինյանն իսկապես ցանկանում է գնալ ընտրությունների, այլ փորձ է անում դաշտը կիսել մասերի՝ ովքեր համաձայն են դրան, և ովքեր համաձայն չեն։

«Սովորական տրյուկ է՝ հին-նոր, սև-սպիտակ, էլիտա-ոչ էլիտա։ Մենք հստակ ասել ենք՝ ոչ մի ընտրություն Նիկոլ Փաշինյանի ղեկավարությամբ չի կարող լինել Հայաստանում։ Նախ և առաջ ինքը պետք է հեռանա, պետք է լինի ազգային համաձայնության կառավարություն, գոնե մեկ տարի, կարողանա բարձրացնել մեր մարտունակությունը, գնալ բանակցությունների, այն ինչ-որ կատարվում է սահմանների հետ այսօր, խայտառակություն է, մենք շարունակում ենք տալ ու տալ։

Նույնիսկ կոմունիստների ժամանակ ամեն մի թիզ հողի համար մեր ու իրենց կենտկոմները իրար հետ կռվում էին։ Իսկ այստեղ առանց բանակցությունների, միջազգային իրավունքի գծվում են սահմանները։ Մի քանի ամսից ընտրություններ անցկացնելը նշանակում է նորից տրոհել երկիրը»,-ասաց Վ. Մանուկյանը։

Նրա խոսքով, ընտրությունների ժամանակ բոլոր կուսակցությունները սկսելու են պայքարել, մինչև ուշքի չգանք, չի կարելի նման բան անել։

«Մինչև արտահերթ ընտրություններն ինքը պետք է գնա։ Ես չեմ էլ ուզում քննարկել այն տարբերակը, որ ինքը մնալու է ու ընտրություն է անցկացնելու։ Ոչ մի «եթե»-ներ։ Կամ աստված գիտի, ընտրությունը վերածվելու է ինչ ընդհարումների»,- ասաց նա։