Ձեր վստահելի աղբյուրը

«Նիկոլ Փաշինյանը պետք է անհապաղ հեռանա, որովհետև ստորագրվել է կապիտուլյացիոն խայտառակ հայտարարություն, պատերազմը պարտվել է, տանուլ է տվել և դավադրության, դավաճանության տարրեր կան այս ամենում, որոնք հետագայում պետք է քննվեն»,- Panorama.am-ի հետ զրույցում ասում է ՀՀ վաստակավոր արտիստ Տիգրան Ներսիսյանը՝ բացատրելով, թե ինչու պետք է Փաշինյանը  հրաժարական տա:

Նա նշում է, որ երկիրն այս վիճակին հասցրած ղեկավարությունն իր առաջնորդով պետք է հեռանային ինքնակամ, հանդարտ ու հանգիստ:

Տ. Ներսիսյանի խոսքով, պատերազմական իրավիճակում կատարված գործողությունները, որոնք տարան պարտության, իսկ այժմ էլ հետպատերազմյան ժամանակահատվածում տեղի ունեցող գորրծընթացները ցույց են տալիս, որ ուղղակիորեն չեն կարողանում որևէ բան անել՝ անզոր են, ապաշնորհ են իրենց քայլերում:

«Պատերազմի  ժամանակ կատարված գործողությունները տարել են նրան, որ տանուլ ենք տվել, դավադրության, դավաճանության տարրեր եմ տեսնում, իսկ հայոց բանակն իր գործողություններում, հայ զինվորը պարտություն չեն կրել, բազմաթիվ հերոսական դրվագներ գիտենք, ինչպես նաև 2016 թվականի Ապրիլյանի ժամանակ:

Էլ չեմ ասում, որ արդեն պատերազմից հետո՝ գերիների, անհետ կորածների, սահմանազատումների հարցերը ցույց են տալիս, որ ուղղակիորեն ոչինչ չեն կարողանում անել: Չգիտեմ՝ նպատակային է, նպատակադրված է արվում, ինչ որ բանից դրդված են,  որ չեն անում կամ չեն կարողանում անել:

Նման պայմաններում մարդ պետք է արժանապատվություն, պատասխանատվություն ունենա, որ ուղղակիորեն վայր դնի իր լիազորությունները»,- ասում է ՀՀ վաստակավոր արտիստը:

Ըստ նրա, հետաքննությունը ցույց կտա, թե ով, ինչ մեղք է գործել՝ մեկը չի կարողացել, մեկը վախեցել է, մեկը հատուկ է արել, մեկը գործակալ է. «Հետագայի ու հետաքննության հարց է, բայց իրենք են ասում՝ պետք է բացահայտվի ամեն ինչ, թե ինչու պատերազմի ավարտն այսպիսին եղավ»:

Տ. Ներսիսյանն ասում է՝ մշտապես ապրել է Հայաստանում ու երբեք չի նկատել կամ չի հիշում ժամանակահատված, երբ ժողովուրդն այսքան ընկճված, ճնշված, տապալված վիճակում լինի:

«Հայ ազգը ունեցել է դժվարություններ, հիասթափություններ, պարտություններ, հաղթանակներ, քաղաքական վայրիվերումներ: Ճիշտ է՝ այս ամենը, հավատի կորուստն այս 2,5 տարում չի սկսվել, բայց այն, ինչ հիմա է կատարվում, երբեք հայ ժողովուրդը նման զգացողություններով համակված չի եղել՝ հուսահատություն, անորոշություն, ընկճվածություն, ամոթ,  ճնշվածություն, կորստի մեծագույն զգացողություն, վիրավորվածություն, արժանապատվության կորուստ,  տապալված վիճակ:

Խոսքս հասարակության առողջ հատվածի մասին է, որը շահադիտական նկրտումներ չունի, պարզապես ուզում էհայրենիքը, երկիրը լինի ապահոված, անվտանգ:

Հիմա սա շարունակե՞լ»,- ասում է Տիգրան Ներսիսյանը:

Նման պայմաններում նա անիմաստ է համարում իշխանության ու աթոռի մասին խոսակցությունները:

«Շատ ավելի մեծ բան է դրված: Իշխանության, աթոռի հարցերը երկրորդական են, պետք է արժանապատվություն, պատասխանատվություն ունենալ:

Ի՞նչ  է նշանակում՝ ես պատասխանատու եմ, մեղավոր չեմ, կամ առաջինը ե՞ս եմ մեղավորը: Առաջին դեմքն է ասում: Բա առաջինը դեմքն առաջինն ինքը չէ՞ մեղավոր, առաջին դեմքը չորրո՞րդն է մեղավոր: Խոսքը պատերազմի մասին է»,- զարմացած հարցադրումներ է անում արտիստը:

Տիգրան Ներսիսյանի գնահատմամբ՝ այս ամենն աբսուրդ է, գիտակից մարդը պետք է հասկանա, որ չի կարող այսպես շարունակվի ու լիազորությունները վայր դնի: