Ձեր վստահելի աղբյուրը

ՀՀ ԳԱԱ Վիկտոր Համբարձումյանի անվան Բյուրականի աստղադիտարանի տնօրեն Արեգ Միքայելյանը կասկած չունի՝ Նիկոլ Փաշինյանը պետք է հեռանա, քանի որ նրա  բոլոր հերթական քայլերը ցույց են տալիս, որ կառուցողական չէ:

«Այստեղ միայն նոյեմբերի 9-ին ստորագրված հայտարարությունը չէ: Դա համարում եմ ծայրահեղ, անպատասխանատու արարք: Չի կարող որևէ մեկն ամբողջ երկրի ճակատագիրը միանձնյա տնօրինի, ով էլ ուզում է լինի՝ թեկուզ երկրի առաջին դեմքը»,- Panorama.am-ի հետ զրույցում ասում է գիտնականը՝ միևնույն ժամանակ անհասկանալի ու անտրամաբանական համարելով Փաշինյանի՝ հայտարարության ստորագրումից հետ կատարած քայլերը:

Ըստ Ա. Միքայելյանի, նախքան հայտարարության ստորագրումը, նա պետք է խորհրդակցեր, բացեիբաց հայտարարել այդ մասին, թեկուզ եթե մեզ  ստիպում էի, ճնշում էին. «Պետք է ասվեր խորհրդարանին, ժողովրդին, որ նման վիճակ է, ես եմ հիմա այն մարդը, որը պետք է Հայաստանի կողմից ներկայանա, ստորագրություն դնի: Կամ գոնե Ազգային ժողովը շտապ նիստ հրավիրեր, եթե գիշերով չարվեր դավադրության նման: Բնականաբար, այստեղ որևէ արդարացում չկա ու կապ չունի թե նախկինում ինչ է եղել՝ հասունացել էր կամ չէր հասունացել պատերազմը, հողերը պետք է տային, պետք է չտային: Այս ամեն ինչը նշանակություն չունի: Միայն այդ գիշերվա արարքն արդեն չեմ համարում նորմալ, որևէ ղեկավար իրավունք չուներ նման բան աներ: Ահավոր վրդովեցուցիչ քայլ էր»:

Նա նշում է, որ, ենթադրեն, փակուղու առաջ էին կանգնեցրել, որ պետք է ստորագրվեր, դրանից հետո Հայաստանի շահերը ո՞վ պետք է պաշտպանի:

«Ես չեմ տեսել մեր կառավարության կողմից Հայաստանի, մեր երկրի շահերը պաշտանելու քայլեր, հակառակը՝ տեսել եմ շտապ-շտապ հողերը հանձնելու քայլեր, ոնց որ թե մենք պարտավորվել էինք Ադրբեջանի շահերը պաշտպանել, ինչքան հնարավոր է շուտ իրականացնել այդ հայտարարության կետերը, որը և տեղի ունեցավ: Միակ կետը, որ ինչ որ առումով մեզ համար լավ էր՝ գերիների վերադարձ, այդ կետին բացարձակ չհետևեցին:

Ինչո՞վ է զբաղված մեր կառավարությունը, եթե չի պաշտպանում մեր երկրի շահերն այսպիսի օրհասական պահին: Ուղղակի անհասկանալի է, թե ինչու համար են պաշտոնյաներն այնտեղ նստած»,- ասում է Ա. Միքայելյանը:

Նրա խոսքով, խառը վիճակ է նաև Հայաստանի սահմանների հետ կապված: Ըստ գիտնականի, թեև Ն.Փաշինյանը երկու օր առաջ հայտարարեց, թե սանիտիմետրի ճշտությամբ տիրապետում են սահմանային իրավիճակին, ո՞նց կարող է մարդը հայտարարել նման բան, եթե հազարավոր կիլոմետրեր են զիջել ու եռակողմ հայտարարության մեջ նախատեսվածից ավելի շատ հողեր տրվել Ադրբեջանին Արցախի բոլոր շրջաններից:

«Եթե Փաշինյանը, թիմը, կառավարությունը չի տիրապետում իրավիճակին, չի կարողանում երկրի շահերից գործել, քայլեր անել, պետք է հեռանա:

Հիմա ինչ լինում է՝ պատճառաբանությունը նախկիններն են: Այսինքն որևէ բան կարելի է վատ անել, չանել, ի վնաս մեր երկրի անել ու ասել՝ նախկինների պատճառով էր: Անտրամաբանական պատճառաբանություններ, արդարացումներ են փորձում ներկայացնել:

Նախկիններն ինչ արել են, չեն արել, հիմա այսօրվա այս իրավիճակն է, այս փաստերն են: Այս պայմաններում պետք է անել լավագույն քայլերն ինչ հնարավոր է, ով էլ լինի ղեկավար, ոչ թե անընդհատ ասել՝ նախկինները, նախկինները:

Անկախ ամեն ինչից, չեմ ուզում խորանալ՝ նախկինները պահում էին ամեն գնով, Փաշինյանը չուզեց պահել, թե պատերազմի պատճառն ինքը հանդիսացավ…: Դրանում էլ կարելի է մեղադրել: Ռուսաստանի հետ հարաբերությունների վատթարացումը պատերազմի սկսվելու ակնհայտ պատճառներից մեկն էր: Կարող էր ընդհանրապես չլիներ այս պատերազմը: Հետո պատերազմի ընթացքում ինչքան սխալ քաղաքականություն էր գնում, հիմա տարբեր գեներալներ մեկը մյուսի վրա են գցում: Սա նշանակում է, որ ներկա իշխանությունները մնալու տեղ չունեն»,- ասում է Ա. Միքայելյանը:

Ըստ նրա, Փաշինյանը սխալ, անտրամաբանական է ներկայացնում իրավիճակը. «Փաշինյանն իրեն արադարացնելու համար ասում է՝ եթե չլիներ հայտարարությունը, կգրավեին Ստեփանակերտը, 25-30 հազար մարդ կհայտնվեր շրջափակման մեջ: Բացահայտ սուտ է: Որովհետև ո՞նց կարող է ինքը ասի՝ եթե չստորագրեին,  Ստեփանակերտը կգրավեին, իսկ Ալիևն էլ կասեր՝ շատ լավ, արի չգրավեմ Ստեփանակերտը, որովհետև դու ստորագրում ես: Հակառակը՝ Ալիևը կասեր, լավ եմ անում, գնում եմ Ստեփաակերտն էլ գրավեմ: Ինչո՞ւ պետք է Ալիևը լավություն աներ Փաշինյանին»:

Արեգ Միքայելյանի համոզմամբ՝ Փաշինյանը պատասխանատու է նաև պատերազմի ժամանակ սուտ տեղեկատվության համար:

«Կապ չունի՝ թե ով է  ներկայացնում: Այլ բան, որ ռազմական գործողությունների դեպքում իրեն շատ չմեղադրանք, որովհետև չէր հասկանում այդ ամեն ինչից, թեև կոչվում է երկրի գերագույն գլխավոր հրամանատար, բայց պաշտոնական տեղեկատվությունը, որ հաղորդվում էր ժողովրդին, ինքը պատասխանատվություն չի՞ կրում, որ ժողովրդին սուտ էին ասում»,- հարցադրում է անում գիտնականը:

Նա ընդգծում է՝ անկախ ամեն ինչից, Փաշինյանի հնարավորությունները, կարողությունները չեն համապատասխանում վարչապետի պաշտոնին. քաղաքագիտական, դիվանագիտական, ռազմական, տնտեսագիտական, իրավական, որևէ բանի չի տիրապետում, մարդն ինչպե՞ս կարող է երկիր ղեկավարել, եթե չի տիրապետում կարևորագույն ոլորտներին, որոնք անհրաժեշտ են:

Ըստ Ա. Միքայելյանի, լուրջ թերություններ կան նաև կադրերի ընտրության հարցում, քանի որ միայն իր կողմնակիցներին է ընտրում անկախ նրանից՝ տիրապետում են ոլորտին, թե ոչ, պրոֆեսիոնալ են, թե ոչ, իսկ նման դեպքում չեն կարող ապահովել երկրի զարգացումը:

«Բարձր տեխնոլոգիական պատերազմ էր գնում, խելքն ավելի մեծ դեր պետք է խաղար, քան զորքի ուժի: Այսինքն իրականում մենք այս պատերազմում չպետք է պարտվեինք, եթե ճիշտ մոտեցումներով, լուծումներով գնայինք: Այսքան մարդ ասում է՝ կարող են ԱԹՍ-ներ արտադրել: Ուրեմն երկրի ղեկավարությունն այդքան չի հասկանում, որ համապատասխան զենքեր առներ, ուսումնասիրություններ աներ:  Ընդամենը խելացի մոտեցումներ էին պետք հասկանալու համար՝ ո՞րն էր  ճիշտը, առաջնահերթությունը:  Այս ամենը չի արվել»,- ասում է նա:

Արեգ Միքայելյանը վստահորեն ասում է՝ մեր հասարակությունն երբեք այս աստիճանի պառակտված չի եղել:

Աստղադիտարանի տնօրենը շեշտում է՝ ինչքան շուտ հեռանա Նիկոլ Փաշինյանն, այնքան ավելի շուտ երկիրը վերակառուցելու ու վիճակը կամաց-կամաց բարելավելու շանս կստանանք, այդ թվում Սյունիքի մարզում սահմանազատումների, գերիների  վերադարձի հարցերում: Կարևորում է նաև տնտեսական հարցերը, քանի որ երկրին, նրա խոսքով,  սպասվում է խորը տնտեսական ճգնաժամ՝ պատերազմ, դրան գումարած կորոնավիրուս:

«Կան չլուծված հարցեր, շատ հարցեր: Տեսնում ենք, որ այս կառավարությունը չի լուծում, պետք է շտապ նոր մարդիկ գան, սկսեն  շտկել այդ իրավիճակը:

Փաշինյանը պետք է հեռանա, քանի որ ոչ մի քայլով ցույց չի տալիս, որ վերջապես լծվեց այդ խնդիրների լուծմանը: Ասելը քիչ է, պետք է քայլերով ցույց տա»,- ասում է Ա. Միքայելյանը՝ ընդգծելով, որ երկրում անհասկանալի վիճակ է ստեղծվել:

«Պետք է բացատրելով, խելացի, տրամաբանական քայլերով բերել նրան, որ հեռանա: Իհարկե, ամենաճիշտ լուծումը ժամանակավոր կառավարություն ստեղծելն է: Այս պահին չեմ տեսնում որևէ ուժ, որին միանշանակ կվստահեի: Ժամանակավոր կառավարությունը որևէ բանի չի խանգարում, թող կոալիցիոն կառավարություն լինի գոնե մինչև այս ճգնաժամային իրավիճակն անցի ու նոր ընտրություններ նախապատրաստվեն»,- որպես ստեղծված իրավիճակից ելնելու լուծում նշում է Արեգ Միքայելյանը: