Ձեր վստահելի աղբյուրը

17:56

ՀՅԴ ԳՄ անդամ Գեղամ Մանուկյանը հայտարարեց, որ երթը նպատակ ուներ բարձրաձայնելու իրենց պահանջները ՀՔԾ մոտ, իսկ ավելի ուշ արդեն կհանդիպեն Հանրապետության հրապարակում:

«Երկու օրից մտնում ենք 2021 թվական: Այստեղ հավաքվածները եկել են հանուն իրենց զավակաների, ընտանիքների, երկրի ապագայի:

Երկու օր հետո, երբ որ դիմավորեք 2021 թվականը, մտածեք՝ մենք ելել ենք փողոց հանուն մեր և ձեր ապագայի, իսկ դուք այդ մենքի մեջ չկայիք: Վաղ թե ուշ միանալու եք մենքին»,- ասաց նա:

17: 45

Հայրենիքի փրկության շարժման համակարգող խորհրդի անդամ, ՀՅԴ ԳՄ անդամ Արծվիկ Մինասյանը ՀՔԾ դիմաց ընթերցեց այն երդումը, որը տվել են ու պարտավոր են պահպանել ՀՔԾ աշխատակիցները: Այնուհետև դիմելով ՀՔԾ աշխատակիցներին՝ հայտարարեց.

«Դուք պարտավոր եք քրեական գործ հարուցել և ձերբակալել, կալանավորել թիվ մեկ դավաճանին՝ Նիկոլ Փաշինյանին:

Պարտավոր եք դադարեցնել ակնհայտ սուտ և կեղծ իրավական ձևակերպումներով բոլոր քրեական հետապնդումները Փաշինյանին քննադատողների, Փաշինյանի հանցավոր ռեժիմի հրաժարականը պահանջողների նկատմամբ:

Պարտավոր եք պատասխանատվության կանչել ոստիկանության այն անպատասխատու անձանց, ովքեր հետևողականորեն փորձում են ժողովրդի մեջ հրահրել քաղաքացիական բախումներ, ավելին՝ իրենց ոչ իրավաչափ հանցավոր գործունեությամբ բերման են ենթարկում, անազատության մեջ են պահում, առևանգում են հայրենիքի պաշտպանության դիրքերում հանդես եկող մարդկանց:

Պարտավոր եք պատասխանատվության կանչել այսպես կոչված պետական պահպանության ծառայության հրամանատարին, որը երեկ բացահայտ բոլորի ներկայությամբ փորձում էր հարվածել քաղաքացիներին: Նա հանցագործ է:

Պարտավոր եք քրեական գործեր հարուցել և պատասխանատվության կանչել սանձարձակ ու լկտի պահվածք ցուցաբերող ԱԺ պատգամավորներին, որոնք սպառնում են ՀՀ քաղաքացիներին, որոնք ռիսկ չունեն պատասխանատվության կանչել հայրենքի դավաճանին, բայց փորձում են հոխորտալ, փորձում են հարձակվել, դրա սպառնալիքի ներքո վախ ներարկել ՀՀ հպարտ քաղաքացիներին: Այդ սանձարձակ անձինք պետք է օր առաջ ենթարկվեն պատասխանատվության: Սիսակ Գաբրիելյան և մնացածներ…

ՀՔԾ-ն պարտավոր է պատասխանատվության կանչել այդ մարդկանց, այլ ոչ թե հայրենիքի փրկության համար դուրս եկած անձանց ապօրինի ձերբակալել ու նրանց անազատության մեջ պահել:

Դիմում եմ ձեզ ՀՔԽ ղեկավար անձնակազմ, այնպես արեք, որ վաղը ձեր զավակներին նայեք հպարտորեն, հայ ժողովրդի պատմության մեջ մտնեք հայրենիքը փրկող կարևոր դերակատարներից, ոչ թե դավաճանին պաշտպանող ուժերի ներկայացուցիչներ»:

17:18

«Հայրենիք» կուսակցությունից Բաբկեն Հարությունյանն ասաց.

«Ժամանակին Նիկոլն ամենասուր որակումներն էր տալիս պատգամավորներին: Խոսքը նախորդ ԱԺ-ների պատգամավորների մասին էր: Հետո երբ եկավ իշխանության, ասաց՝ լինելու են պատգամավորներ, նախարարներ, որոնք ծառայելու են ժողովրդին, հարգանքով են վերաբերվելու ժողովրդին, լուծելու են մեր խնդիրներ:

Հիմա տեսնում ենք, որ ունենք պատգամավորներ, որոնք իրենց մականուններով ավելի հնչեղ են, իրենց սանձարձակությամբ ավելի սանձարձակ են, իրենց անբարոյականությամբ ավելի անբարոյական են: Հիմա իրենք պատգամավոր են, պետք է մեր հարցերը լուծե՞ն, մեր կյանքը բարելավե՞ն: Սրանց լկտիությունը հասել է այնտեղ, որ նույնիսկ հարց ուղղելու համար սրանք համարձակվում են վիրավորել մեզ, քաղաքացիներին:

Այդ վիրավրանքն անպատասխան չի մնալու»:

17:08

Երթի մասնակիցներն անցան «Իմ քայլի» պատգամավոր Հայկ Սարգսյանի՝ «շիշ բռնողի» առանձնատան մոտով:

«Մի քանի հարկանի այս առանձնատունը հայրիկիդ փողերով կառուցելուց բա չէի՞ր ասում՝ բանակի դիրքերը պետք է փայտից, հողից չլինեն: Այդ ժամանակ չէի՞ր մտածում դրա մասին: Բավական է ձեր արածները, սխալները բոլորի վրա բարդելու վարքագիծ դրսևորեք:

Ուրեմն՝ պարոն շիշ բռնող, մենք թույլ չենք տալու, և դու մտածի նաև, որ վաղը պատասխան ես տալու այդ բետոնապատ մի քանի հարկանի առանձնատունը կառուցելու համար: Բոլորն են պատասխան տալու: Պատասխան են տալու մեր գերության մեջ գտնվող հարյուրավոր ընկերների համար, պատասխան են տալու հազարավոր անհետ կորածների համար, հազարավոր զոհերի համար, Եռաբլուրում շիրիմների վրա քայլող քաղաքացիների համար, որոնց ստիպողաբար բերել էիք Եռաբլուր: 

Արա Հայկ, դու պատասխան ես տալու:

Առանց շիշ բռնողների, առանց Անդոների, առանց Նիկոլների, առանց էռատոների Հայաստանի կերտման այս պայքարը, որ մենք անցնում ենք, հասնելու է իր վերջնական նպատակին, իսկ նպատակն է ազատ, արդար, հաղթող, արժանապատիվ Հայաստանը:

Ուրեմն՝ առանց Նիկոլ Հայաստան, առանց շիշ բռնողների Հայաստան»,- ասաց ակցիայի մասնակիցներից մեկը:

16։56

Արաբկիր վարչական շրջանի Վահագն Դավթյան այգու մոտից (Պրահայի այգի, Արաբկիրի թաղապետարանի դիմաց) սկսվել է Փաշինյանի հրաժարականի պահանջով Հայրենիքի փրկության շարժման նախաձեռնած երթ:

ՀՅԴ-ական Գեղամ Մանուկյանը նշեց, որ պայքարը շարունակվում է, իսկ պահանջը նույնն է:

«Այս ընթացքում իշխանությունը հակառակ իր հայտարարությունների, թե բոլոր հնարավորությունները ստեղծել է ընդդիմության գործունեության համար, մոռանում է իր  ճնշիչ, մամլիչ հիմնական զենքերի մասին՝ ոստիկանություն, քննչական կոմիտե, հատուկ քննչական ծառայություն»,- նշեց նա:

Գ. Մանուկյանի խոսքով, երեկ ԱԺ շրջակայքում քաղաքացիական անհնազանդության  գործողությունների, քաղաքացիների կողմից իրենց սահմանադրական իրավունքը գործադրելու ընթացքում ակնառու էր, որ ոստիկանությունը դիմեց շատ ավելի բիրտ միջոցների:

«Եթե ոստիկանությունում նշանակված ինչ- որ նոր պաշտոնյաներ կան, որոնց ուշք ու միտքն է Նիկոլին համոզել, որ իրենք ավելի լավ կարող են ծառայել Նիկոլին, ոչ թե Հայաստանի օրենքներին, պետք է իմանան, որ այդ օրենքները մի օր դեմ դիմաց կանգնելու են նրանց առաջ, նայելու են այդ սպաների աչքերի մեջ ու պահանջելու են պատասխան, խիստ պատասխան»,- նշեց ՀՅԴ-ական գործիչը:

Նա հայտնեց, որ այսօր շարժվում են դեպի Հատուկ քննչական ծառայություն, ներկայացնելու են իրենց դժգոհությունները, պահանջները՝ օրենքը կատարել լիարժեք: 

Գեղամ Մանուկյանն ասաց, որ իրենց պահանջը՝ «Առանց Նիկոլ Հայաստան» չի դադարելու, քանի որ վարչապետի աթոռին նստած խելագարն ամեն օր ավելի նոր մի խելագարության է դիմում, ամեն օր ավելի է վատթարացնում երկրում կյանքը:

«Դրա համար մեր պահանջը մնում է նույնը՝ «Առանց Նիկոլ Հայաստան»,- ասաց Գ. Մանուկյանը: