Ձեր վստահելի աղբյուրը

Բարձրագույն դատակա խորհրդի (ԲԴԽ) նախագահ Ռուբեն Վարդազարյանի խոսքով, 2020 թվականին ԲԴԽ-ում իրականացվել է թվով 84 նիստ, որոնցից 37-ի ընթացքում խորհուրդը հանդես է եկել որպես դատարան։

«Ընդունվել է 242 որոշում, որից 17-ը նորմատիվ, 189-ը՝ ընթացիկ և 18-ը՝  աշխատակարգային։ Տեղի է ունեցել 34 քվեարկություն։ 2020-ի ընթացքում խորհրդի առաջարկությամբ ՀՀ նախագահը նշանակել է 20 դատավորներ, 12 դատավոր նշանակվել է թեկնածուների ցուցակից, 7 դատավոր տեղափոխվել է Առաջին ատյանի դատարանից այլ դատարան, և 1 դատավոր նշանակվել է դատարանի նախագահ»,- այսօր հրավիրված տարեվերջյան ամփոփիչ ասուլիսում ասաց ԲԴԽ նախագահը։

Ինչ վերաբերում է կարգապահական ոլորտին, ապա նա նշեց, որ 2020 թվականի ընթացքում ԲԴԽ ներկայացվել է 19 միջնորդություն՝ դատավորների կարգապահական պատասխանատվության վերաբերյալ. 4 միջնորդություն ներկայացրել է Դատավորների ընդհանուր ժողովի էթիկայի և կարգապահական հարցերի հանձնաժողովը, 1 միջնորդություն սեփական նախաձեռնությամբ է քննության առնվել, և 14 միջնորդություն ներկայացրել է արդարադատության նախարարը։

«10 դատավորների նկատմամբ կիրառվել է կարգապահական տույժ, 3 դատավորի նկատմամբ հայտարարվել է նկատողություն, 3-ին հայտարարվել է նախազգուշացում, 2 դատավորին հայտարարվել է խիստ նկատողություն, 2 դատավորի լիազորություններ դադարեցվել են։ Բացի այդ 4 միջնորդություն մերժվել է, 2 միջնորդություն՝ կարճվել։ 3 միջնորդություն էլ դեռ գտնվում է ԲԴԽ-ի վարույթում»,- նշեց Ռուբեն Վարդազարյանը։

ԲԴԽ նախագահի խոսքով, 2020 թվականի ընթացքում խորհուրդը կայացրել է բազմաթիվ որոշումներ.

«Համավարակի հետ կապված ԲԴԽ-ն որոշումներ է կայացրել՝ փորձելով կարգավորել հարցերը, որոնք օրենսդրական բացի արդյունքում կարգավորված չեն եղել։ Փորձել ենք թույլ չտալ, որ դատական նիստերը համավարակի տարածման պատճառ հանդիսանան։ Դա մեզ հաջողվել է։ ԲԴԽ-ն օրենքների և նախագծերի վերաբերյալ թվով 80 եզրակացություն է տվել։ Դրանք օրենքների նախագծեր և Կառավարության որոշումներ են»:

Ինչ վերաբերում է  ֆինանսական ոլորտին, ապա, Ռուբեն Վարդազարյանի խոսքով, 2020-ի ԲԴԽ բյուջեն գրեթե նույնն է եղել, ինչ 2019-ին։

«Բյուջեի աճ չենք ունեցել, և պայմանավորված ռազմական դրությամբ՝ ԲԴԽ-ն փորձել է նվազեցնել իր ծախսերը, և 607 մլն 333 հազար դրամ հետ է ուղարկել Կառավարության պահուստային ֆոնդ։ Իսկ «Մենք ենք մեր սահմանները, բոլորս Արցախի համար» դրամահավաքին մասնակցել է ԲԴԽ-ն, մասնակցել են դատավորները, դատական դեպարտամենտը, և մեր կողմից Արցախի ֆիննախ է վճարվել 22 մլն 340 հազար դրամ»,- նշեց նա։

Անդրադառնալով, իր բնորոշմամբ, ամենացավոտ հարցերից մեկին՝ դատարանների ծանրաբեռնվածությանը՝ Ռուբեն Վարդազարյանը նշեց, որ Առաջին ատյանի դատարաններում կան քրեական գործ քննող 61 դատավորներ, քաղաքացիական գործ քննող 86 և վարչական գործ քննող 24 դատավորներ։

«Մինչև դեկտեմբերի 28-ը ներառյալ դատարանները ստացել են 6470 քրեական գործ, ինչը 2019-ի հետ համեմատ ավելացել է 1331-ով։ Իմ կարծիքով անմարդկային է դատավորների ծանրաբեռնվածությունը։ 31 256 միջնորդություն ենք ստացել միջդատական վարույթի նկատմամբ դատական վերահսկողություն իրականացնելու ոլորտում։ Սա նախորդ տարվա համեմատ ավելի է 9558-ով։ 175 940  քաղաքացիական գործ է ստացվել, ինչը նախորդ տարվա համեմատ փոքր-ինչ նվազել է»,- ներկայացրեց ԲԴԽ նախագահը։

Նա հավելեց, որ 2020-ին ԲԴԽ-ն դիմել է Կառավարություն՝ խնդրելով 16 դատավորի հաստիք ավելացնել։