Ձեր վստահելի աղբյուրը

«Մենք դեռևս մեզ հետ կատարվածին անուն դնել չենք կարողացել, քանի որ ամբողջ հանրությունը շոկային վիճակում է»,- այսօր լրագրողների հետ հանդիպմանն ասաց «Քառյակ մեդիայի» հիմնադիր, ընդդիմադիր գործիչ Միհրան Հակոբյանը։

Նրա խոսքով՝ ուղղակի ասել, որ պատերազմ է եղել, Հայաստանը պարտվել է, ուղղակի անբարոյականություն է, որովհետև դա պարտություն, կապիտուլյացիա չէր, դա աղետ էր՝ մեծ աղետ։

«Վերջին 100 տարվա ընթացքում հայ ժողովրդի քրտնաջան աշխատանքի միջոցով ունեցած ձեռքբերումները փաստացի Հայաստանի ներկայիս իշխանություն կոչվածը, բառի բուն իմաստով լցրեց ջուրը։ Իսկ Արցախը Հայաստանի երրորդ Հանրապետության գոյաբանական իմաստն էր։ Ասել Հայաստանի երրորդ Հանրապետության՝ առանց Արցախի և Արցախի համար պայքարի, ուղղակի անհնար է, դա գոյաբանական խնդիր է, որը ներկայիս ոչ բարով իշխանություն կոչվածները բառի բուն իմաստով ոչնչացրին։ Մենք հիմա կյանքի իմաստի փնտրտուքի մեջ ենք»,- նկատեց նա։

Քաղաքական գործիչը նշեց, որ երեկ մինչ հայկական կողմը ժխտում էր, որ որևէ բան է եղել Արցախում, ադրբեջանական կողմը ցուցադրում էր նոր դիեր. նոր մարդասպանություն է եղել՝ պատերազմի ավարտից այսքան օրեր անց։       

«Մենք դեռևս մեր տղաների կյանքով ենք հատուցում, բայց չգիտենք՝ ով է մեղավոր դրա համար։ Լավ, պատերազմն ավարտվել է, բա այս տղաները որտե՞ղ են սպանվել, ինչո՞ւ են սպանվել, ո՞վ պետք է զբաղվեր նրանց էվակուացիայով։ Սա աղետ է,  որի մեջ մենք շարունակում ենք գտնվել, այն չի ավարտվել, այլ՝ շարունակվում է, և շարունակվելու է այնքան ժամանակ, քանի դեռ ՀՀ իշխանության ղեկին նոմինալ գտնվում է այս անբարոյական և անտաղանդ անձնավորությունը»,- ասաց Միհրան Հակոբյանը։             

Դիտարկմանը, որ Նիկոլ Փաշինյանն ասում է, թե ինքը հրաժարական չի տալիս, քանի որ ժողովուրդն այդ պահանջը չունի, ընդդիմադիր գործիչն արձագանքեց՝ ասելով, որ ակնհայտ է՝ Նիկոլ Փաշինյանի պատկերացրած ժողովրդի մեջ կրթված, հաջողության հասած մարդը չի մտնում։

«Նրա պատկերացրած ժողովուրդը աղբարկղի կողքին լահմաջո գզող բիոզանգվածն է, որը երկու բառ իրար հետ չի կարող կապել։ Սա է Նիկոլ Փաշինյանի ժողովուրդը։ Ինքը որ ասում է ժողովուրդ, նկատի ունի այն մարդկանց, որոնք ասում են, թե Արցախի հանձնումը մի բան էլ ուշացել է, շուտ պետք է տար։ Ինքը նկատի ունի այն մարդկանց, որոնք ասում են՝ այդ հողերը ադրբեջանական են։ Սա է Նիկոլ Փաշինյանի ժողովուրդը։ Անբարոյականների ու դավաճանների խմբակն է Նիկոլ Փաշինյանի պատկերացրած ժողովուրդը, որ ոչ մի կապ չունի հայ ժողովրդի հետ»,- ներկայացրեց նա։

Միհրան Հակոբյանի խոսքով, եթե Նիկոլ Փաշինյանը մտածում է, որ իր գծած սահմանադրական ճանապարհով ինքը ՀՀ-ում մնալու է իշխանություն, և շարունակելու է այս աղետը, թող մտածի։

«Ինձ մոտ տպավորություն է, որ Նիկոլ Փաշինյանը սադոմազոխիստական հակումներ ունի, և իրեն դուր է գալիս, որ Իլհամ Ալիևը կոշիկները նասկիներով մտցնում է իր բերանը, և ինքը մեծ հաճույքով լիզում է։ Տպավորություն է, որ իրեն դուր է գալիս։ Ըստ էության, Փաշինյանին համախոհ են մնացել այն մարդիկ, որոնք դեմ չեն լինի, եթե Նիկոլ Փաշինյանը իշխանությունը փոխանցի նույնիսկ Իլհամ Ալիևին, միայն թե նախկինները չլինեն։ Դա տհաս և անբարոյական մոտեցում է։ Հիմա մենք արդեն կարող ենք համեմատել ներկաներին ու նախկիններին, և հստակ համեմատության մեջ կերևա, որ որևէ եզր գոյություն չունի»,- ասաց քաղաքական գործիչը։

Միհրան Հակոբյանի համոզմամբ, Նիկոլ Փաշինյանի նման «անբարոյական թալանչի» Հայաստանի պատմության մեջ ուղղակի չի եղել։ Ըստ նրա, անգամ իր իշխանության գալուց երեք տարի անց Նիկոլ Փաշինյանը «ապուշ-ապուշ դուրս է տալիս», թե չի կարողացել նախկինների թալանածը հետ բերել։