Ձեր վստահելի աղբյուրը

ՀՀ նախկին վարչապետ Հրանտ Բագրատյանն այն կարծիքին է, որ Նիկոլ Փաշինյանից անգամ վարչապետի «հոտ» չի գալիս։ Ըստ նրա, եթե Փաշինյանը կարողանար համակարգը կառավարել, ապա կհասկանար, որ գյուղերը հենց այնպես չեն հանձնում։

«Այդ պրոցեսը ամիսներ է տևում, կամ տարի։ Նախօրոք պետք է գրաֆիկ լիներ, սահմանները գծվեին, ստորագրվեր, ապա ԱԺ-ն հաստատեր։ Ի՞նչ գործ ունի ադրբեջանցին Շուռնուխ գյուղում։ Քանի որ Նիկոլ Փաշինյանը չի կարողանում իր ֆունկցիան կատարել որպես վարչապետ, քանի որ երկրում նախագահ չկա..., այս վիճակն է։ Նախագահը գնացել է Գյումրի, Նոր տարին այնտեղ է անցկացնում, գնար Շուռնուխում անցկացներ։ ՀՀ տարածքային պահպանման երաշխավորը ՀՀ նախագահն է։ Նախագահն ու վարչապետն իրենց պահում են որպես Իլհամ Ալիևի հարճ. Ալիևը երբ ուզում, իրենց շինում է»,- այսօր լրագրողների հետ հանդիպմանն ասաց Հրանտ Բագրատյանը։

Նրա խոսքով, Ադրբեջանը Հայաստանը վերցրել և բաստուրմայի նման կտրում է։

«Այսօր լուր ստացանք, որ արևմտյան հատվածում ադրբեջանցիք ասում են՝ մարդկանց դուրս հանեք։ Տիգրանաշենը տալուց հետո Սյունիք այլևս չենք կարող գնալ։ Արարատի մարզով կվերջանա ՀՀ-ն»,-  նշեց նա։

Բագրատյանի խոսքով, Տիգրանաշենից հետո ադրբեջանցիները նույն պայմանը կդնեն նաև Մասիս քաղաքի, Երևանի թամասերից մեկը, որտեղ ապրել են ադրբեջանցիներ։

«Մինչդեռ մենք չենք ասելու Բաքվի թաղամասերից մեկը տվեք Հայաստանին, ասող չկա։ Ասողը պիտի Նիկոլ Փաշինյանը լինի, նա կարծում է, որ ինքը պարտվել է, նա վախենում է։ Նա Ալիևից այնպիսի վախ ունի, ինչպես այն կինը, որին բռնաբարել են և ինքը կարծում է՝ հերթական անգամ հանդիպման ժամանակ Ալիևն իրեն կբռնաբարի»,- նկատեց Հրանտ Բագրատյանը։

Ըստ ՀՀ նախկին վարչապետի, երկրում չկա նաև պաշտպանության նախարար, այլ հերթական «տիկիններն են», որ ուզում են երկիրը պաշտպանել։

«Ես ցավում եմ, բայց հիմա մենք ոչ մի կերպ չպետք է Տիգրանաշենը հանձնենք, մենք թույլ չպիտի տանք դա»,- շեշտեց Հրանտ Բագրատյանը։

Նա կարծում է, որ Նիկոլ Փաշինյանն ու Արմեն Սարգսյանը ժողովրդական ցասումով պետք է «սրբվեն», ապա կանգնեն դատաստանի առաջ։

«Այն, ինչ մենք կորցրինք, կազմում է ութ մլրդ դոլար՝ չհաշված հողի գինը։ Հիմա էլ արդեն Ադրբեջանը բաստուրմայի դանակով Հայաստանի քարտեզն է տալաշ անում։ Այս վիճակին է հասցրել երկիրը։ Հայաստանը սրանից վատ օրեր չի ապրել։ Մեկ էլ այսպիսի վիճակ է եղել 1048 թվականին, երբ Պետրոս Գետադարձն ասաց՝ ի՞նչ ենք անում պետությունը, եկեք գնանք այստեղից։ Ես մտածում եմ, որ Հայաստանը լավ կանի, գոնե Ռուսաստանի հետ մերձանա, բայց ոնց հասկանում եմ՝ մենք դառնում ենք Թուրքիայի վասալ Ադրբեջանի վասալը։ Այսինքն՝ դառնում ենք վասալի վասալ»,- ցավով նշեց Հրանտ Բագրատյանը։