Ձեր վստահելի աղբյուրը

Անհետ կորած զինծառայողի հայրը՝ Գեղամ Թադևոսյանը, լուսանկարում տեսել ու ճանաչել է հիվանդանոցում անգիտակից պառկած որդուն, սակայն այժմ որևէ բուժհաստատությունում չի գտնում տղային: Նա պատմեց, որ Գորիսից նկարել են բոլոր կոմայի մեջ գտնվող երեխաներին, ուղարկել են Երևան, իրենց երեխուն ճանաչել են հենց այդ նկարներում։ Նախարարությունից են ցույց տվել նկարները։ Հիմա երեխային չեն գտնում։

«Որ բուժհաստատություն դիմում ես, ընդհունարանից ասում են ՝ մենք անգիտակից չունենք, ով էլ կա ծնողով է։ Ես իմ որդուն ճանաչել եմ նկարով, ծնողից լավ ո՞վ է ճանաչում իր որդուն։  Հիմա իմ երեխան կոմայի մեջ է, ուզում եմ մեկ րոպե շուտ տեսնեմ իմ երեխուն, կարող է ձեռքը բռնում եմ, երեխես կոմայից դուրս է գալիս, կամ այնպիսի բան եմ կարողանում անել երեխայիս համար, որ իրենք չեն կարողանում։ Չի կարելի այդպես։ Քանի կար պատերազմ էր, հիմա էլ մեր երեխուն ման ենք գալիս մեր հողի մեջ, չենք կարողանում գտնել։

Հիմա մեր երկրի առաջին դեմքին ենք հարցնում՝ ո՞ւր ա մեր երեխեն։ Որ պետք է լինում, լավ էլ գտնում են»,-ասաց Գեղամ Թադևոսյանը:

Ակցիայի մասնակից անհետ կորած զինծառայող Ֆելիքս Պողոսյանի հայրն ասաց, որ իր տղայի հեռախոսին զանգ է գնացել, թուրքերն են վերցրել, խոսել։ Այդ տվյալը 3-4 շաբաթ առաջ հայտնել է ԱԱԾ, սակայն որևէ արդյունք դեռևս չկա։