Ձեր վստահելի աղբյուրը

«Վիրահատությունը եթե հիմա արժի 300 հազար դրամ, ապա ավելացված արժեքի հարկի ներմուծման հետևանքով այն բարձրանալու է մոտ 20 տոկոսով՝ դառնալով 360 հազար դրամ: Ներկայում բժշկական կենտրոնները վճարում են միայն 23 տոկոս եկամտահարկ, ինչպես նաև «Զինծառայողների ապահովագրության հիմնադրամի» վճարները»,- արձագանքելով Նիկոլ Փաշինյանի ստորագրած նոր որոշումը մեկնաբանելու panorama.am-ի հարցին՝ նշեց Երևանի մասնավոր բժշկական կլինիկաներից մեկի տնօրենը: Վերջինս չցանկացավ, որ իր անունը հրապարակվի՝ լրացուցիչ հարկային ստուգումների չենթրկվելու համար:

«Բժշկական կենտորնը եթե հիմա մուծում է, օրինակ, 7 մլն ՀՀ դրամ հարկ, ապա փոփոխություններից հետո պետք է մուծի ևս 6 մլն, որը կնշանակի հարկային բեռի կրկնակի ավելացում»,-հայտարարեց մեր զրուցակիցը:

Հիշեցնենք, որ 2020 թվականի դեկտեմբերի 30-ին Նիկոլ Փաշինյանի ստորագրած N 1455-Լ «Հարկային քաղաքականության ճեղքի կրճատմանն ուղղված միջոցառումները հաստատելու մասին» որոշման հավելվածում ասվում է, որ հարկային քաղաքականության ճեղքի հիմնական պատճառն ավելացված արժեքի հարկից ազատված գործարքների չափազանց լայն շրջանակն է, այդ պատճառով էլ նախատեսվում է կրճատել ԱԱՀ-ից ազատման արտոնությունների շրջանակը:

Մեր զրուցակիցը հայտնեց, որ ԱԱՀ-ն ավելացվելու է նաև կրթության ոլորտում և խնդիրներից մեկն էլ այն է, որ այդ գումարը միանգամից տրվելու է պետությանը և չի ուղղվելու տվյալ բուժհաստատության կամ կրթական հաստատության կարողությունների զարգացմանը:

Բժշկական կենտրոնի տնօրենի խոսքով, այն իր ետ բերելու է մի շարք անցանկալի հետևանքներ: «Բժշկական և կրթական հաստատությունները ստիպված են լինելու բարձրացնել իրենց մատուցած ծառայությունների գինը, որը բերելու է դիմողների թվի նվազեցմանը, հասարակության առողջական վիճակի և կրթական մակարդակի վատթարացմանը»,- նշեց նա:

Մեր զրուցակիցը նաև հայտնեց, որ ներկայում կրթությունը և բժշկությունն ազատված է ավելացված արժեքի հարկից, իսկ բժշկական հաստատություններն այդ հարկատեսակը միայն դեղորայք ներմուծելու համար են վճարում:

Նիկոլ Փաշինյանի որոշման հիմնավորման մեջ նշվում է, որ հարկային քաղաքականության ճեղքը հարկային օրենսդրության հետևանքով չհավաքագրվող կամ պակաս հավաքագրվող հարկային եկամուտների ամբողջությունն է, որը իշխանությունը որոշել է կրճատել այս և հարկերի բարձրացման այլ գործիքներով՝ կրճատելով հարկային արտոնությունների շրջանակը, որը չի հիմնավորվում ծախսեր-օգուտներ վերլուծությամբ:

Որոշմամբ նաև առաջարկվում է հարկման ընդհանուր համակարգի համեմատությամբ սահմանել շրջանառության հարկի ավելի բարձր բեռ:

Այս հարկը նախատեսում է փոքր և միջին բիզնեսի գործունեությունը խթանելու համար։ Այն առևտրի ոլորտում այժմ 5 տոկոս է, իսկ արտադրության ոլորտի համար նախատեսված է 3,5 տոկոս։ Կառավարությունն անհրաժեշտ է համարել նվազեցնել նաև հարկի շեմը։ Գործող կարգավորումներով շրանառության հարկի դաշտում գործում են մինչև 115 մլն դրամի շրջանառություն ունեցող տնտեսվարողները։ Դեռ պարզ չէ, թե այդ շեմն ինչքան կիջեցվի: Նախկինում շրջանառված և չընդունված նմանատիպ նախագծով նախատեսված էր այն իջեցնել մինչև 58 մլն դրամի: Նիկոլ Փաշինյանի կառավարությունն այն ժամանակ չընդունեց նախագիծը՝ չցանկանալով նեղացնել փոքր և միջին բիզնեսին, իսկ այսօր ստիպված է անել այն՝ վկայակոչելով  միջազգային փորձը:

Նիկոլ Փաշինյանի որոշմամբ, հարկային քաղաքականության ճեղքի մյուս պատճառը ֆիզիկական անձանց եկամուտների համատարած հայտարարագրման համակարգի բացակայությունն է: Այս համակարգի ներդրման համար, որպես հիմնավորում, ներկայացվում է հակակոռուպցիոն ռիսկերի կառավարման և եկամտային հարկի համակարգին որոշակի պրոգրեսիվություն հաղորդելու հարցերը:

Որոշմամբ ֆինանսների նախարարին հանձնարարվել է ներկայացնել միջոցառումների կատարմանն ուղղված գործողությունների ծրագրի նախագիծը, իսկ  էկոնոմիկայի նախարարին՝ տնտեսական քաղաքականության հայեցակարգը և այդ համատեքստում՝ եկամուտների քաղաքականության վերափոխման համապարփակ տեսլական։

Ա. Վարդանյան