Ձեր վստահելի աղբյուրը

Սուրբ Աթոռում ՀՀ նախկին դեսպան Միքայել Մինասյանը թելագրամի իր ալիքում գրում է, որ հունվարի 11-ին Մոսկվայում կայանալիք հանդիպմանը քննարկվելու է ոչ թե ռուս խաղաղապահների տեղակայման վերաբերյալ պայմանագիրը, այլ լրիվ ուրիշ փաստաթուղթ։

Նա մանրամասնում է, որ Արցախում ռուս խաղաղապահների տեղակայումը պետք է ունենա իրավական հիմք։

«Ռուսական կողմն այդ հիմքը պատրաստել էր դեռ նոյեմբերի 9-ին, հայկական կողմը պատրաստակամորեն այն ստորագրել է, սակայն չի ստորագրել Ադրբեջանը»,-նշում է Մինասյանը։


Նախկին դեսպանի ներկայացմամբ, ադրբեջանական կողմը, ելնելով այն բանից, որ ինքը հաղթող կողմ է, առաջ է բերում երեք նոր կետ, որոնք ցանկանում է տեսնել  խաղաղապահների գործունեության կարգավորման վերաբերյալ պայմանագրում կամ դրա որևէ հավելվածում։

Ըստ առաջին կետի, հայկական որևէ ուժ չպետք է լինի Արցախում, քանի որ այն ադրբեջանական հող է։ Ադրբեջանական ուժերն այնտեղ են իրավունքի ուժով, ռուսական զորքերը՝ ադրբեջանական կողմի համաձայնությամբ։ Իսկ հայկական ուժեր՝ ոչ ՀՀ ԶՈՒ, ոչ էլ Արցախի չպետք է լինեն։

Երկրորդ կետի համաձայն, Հայաստանի պաշտոնատար անձանց բոլոր այցերն Արցախ պետք է լինեն ադրբեջանական կողմի հետ համաձայնեցված։

Երրորդ կետի համաձայն, Արցախի ՏԻ մարմինները պետք է նշանակվեն ադրբեջանական կողմի ու խաղաղապահների համաձայնությամբ։

Հայկական կողմի խնդիրն այն է, որ կապիտուլյացիայի տենդի մեջ լինելով, այդ փաստաթուղթը ստորագրել է առաջինը, թույլ չտալով Ադրբեջանին վերջնականապես ներկայացնելու իր ակնկալիքները միջնորդ Ռուսաստանից։

Ադրբեջանի հետ չհամաձայնեցված, բայց Նիկոլի կողմից արդեն ստորագրված համաձայնագիրն ավելացնում է Ադրբեջանի բանակցային օջախները, թույլ տալով, պահանջների չկատարման դեպքում պահանջել խաղաղապահների դուրսբերում։

Հ.Գ. Ի դեպ այս փաստաթուղթը հունվարի 11-ին չի քննարկվելու։ Հունվարի 11-ին քննարկվելու է լրիվ ուրիշը։ Բայց այդ մասին հետո»,-գրում է Միքայել Մինասյանը։