Ձեր վստահելի աղբյուրը

«Հայրենիք» կուսակցության քաղաքական խորհրդի անդամ Արսեն Բաբայանի խոսքով, հունվարի 11-ին Նիկոլ Փաշինյանը մեկնում է Մոսկվա որևէ բան բանակցելու կամ ստորագրելու, հետևաբար Կառավարությունը պարտավոր է հանրությանը տեղեկացնել, թե ինչի շուրջ է լինելու բանակցությունը, կամ ինչ փաստաթուղթ է ստորագրվելու։

«Եթե չկա այդպիսի փաստաթուղթ, ապա ի՞նչ կա։ Շարունակում են հասարակությունից տեղեկությունը գաղտնի պահել, և դա ինձ մոտ լուրջ կասկածներ է առաջացնում, որ ՀՀ տարածքի զգալի մասն էլ են նրանք պատրաստվում հանձնել, որովհետև ձեռագիրը նույնն է, հետևաբար հետևանքն էլ կլինի նույնը»,- ԱՆ շենքի դիմաց լրագրողների հետ զրույցում ասաց նա։

Հիշեցնենք, որ երեկ «MediaPort» տելեգրամյան ալիքը գրել էր՝ Փաշինյանը Մոսկվայում նոր զիջումների է գնալու, և այդ փաստաթուղթը գաղտնի ուղարկվել է ԱՆ՝ ՀՀ Սահմանադրությանը համապատասխանեցնելու նպատակով։

Ըստ Արսեն Բաբայանի, 2.5 տարի իշխանությունները հասարակությանը խաբել են, ասել են, որ չեն բանակցում, չեն քննարկում, հետո ասել են, թե աշխատանքային հանդիպումներ են տեղի ունենում, վերջում էլ լկտիաբար ասել են՝ ինչի շուրջ ուզում են, բանակցում են։

«Դրա հետևանքները մենք տեսել ենք, ուստի պարտավոր են մեզ ներկայացնել՝ ինչի շուրջ են բանակցում, ինչ փաստաթուղթ են պատրաստվում ստորագրել։ Ես ակնկալիք ունեմ, որ արդարադատության նախարարը կիջնի և առնվազն իր ֆեյսբուքյան գրածը կասի, որից հետո ես նրան կտամ հարցեր և կպահանջեմ՝  ներկայացնել, թե ինչի շուրջ պետք է լինեն բանակցությունները։ Ֆեյսբուքում թաքնվելով իրենց թվում է, թե կարող են պետություն ղեկավարել։ Չի լինելու այդպես։ Հետևաբար՝ պիտի իջնի, հարցեր ստանա և պատասխանի դրանց»,- նկատեց Արսեն Բաբայանը։

Նա նշեց, որ այդ փաստաթուղթը պետք է անցնի ՍԴ-ով, ապա պետք է ԱԺ կողմից վավերացվի, և այդ փաստաթղթի բովանդակությանը ծանոթանալուց հետո հանրությունը կհասկանա՝ ՀՀ ո՞ր տարածքներն են պատրաստվում հանձնել, կամ արդյոք պատրաստվում են հանձնել։

«Ամսի 11-ին նա գնալու է Մոսկվա՝ ինչ-որ բան բանակցելու, կամ ստորագրելու։ Եվ շարունակվում է մոտեցումը, որ ինչ ուզում ենք, դա էլ բանակցում ենք։ Չի լինելու այդպես»,- նկատեց նա։

Ըստ նրա, հանրությունը պետք է շարունակի անել այն, ինչ սկսել է անել արդեն մեկ ամիս՝ պահանջել գործող իշխանության հեռացումը։

«Եվ այս փաստաթուղթը ևս մեկ անգամ լրացուցիչ հիմնավորում կլինի այն մարդկանց համար, որոնք թմբիրի մեջ են, չեն ուզում հավատալ»,- ասաց նա։

Հարցին, որ եթե այդպես էլ ԱՆ-ը որևէ փաստաթուղթ չներկայացնի, ի՞նչ են անելու իրենք, Արսեն Բաբայանը պատասխանեց.

«Տեսնենք, ընթացքում ամեն ինչ պարզ կդառնա»։