Ձեր վստահելի աղբյուրը

«Պարոն Փաշինյան, հայ համայնքը սպասում է Ձեր հրաժարականին, այլ ոչ թե Ձեր՝ Մոսկվա այցին»,- ֆեյսբուքյան էջում գրել է Ռուսաստանի Դաշնությունում հայերի միության նախագահ Արա
Աբրահամյանը՝ անդրադառնալով Նիկոլ Փաշինյանի ՌԴ նախատեսված առաջիկա այցին։

Նա մի քանի հարցեր է ուղղել Նիկոլ Փաշինյանին, մասնավորապես.  «Ինչո՞ւ ու ինչո՞վ եք հիմա մեկնում Ռուսաստան: Էլ ի՞նչ եք պատրաստվում ստորագրելու, և էլ ինչի՞ շուրջ եք բանավոր համաձայնության գալու:

Ինչո՞ւ եք այդքան շահագրգռված ամեն ինչ հանձնելու շուտափույթ ավարտմամբ, որը դեռ ձեր ուժերի տիրույթում է: Ո՞ւմ և ինչո՞վ եք այդքան պարտական, որ պատրաստ եք դիմանալ բոլոր նվաստացումներին և լկտի հարձակումներին Ալիևի կողմից: Ինչո՞ւ չեք կարող կանգնեցնել և  կասեցնել Հայաստանը կործանող սցենարը` չնայած Հայաստանի և  Արցախի ժողովրդի, երկրի նախագահի, մեր ժողովրդի հոգևոր առաջնորդների Գարեգին Երկրորդ եւ Արամ Առաջին կաթողիկոսների, սփյուռքի կոչերին:

Ինչո՞ւ դուք, հայտարարության մյուս բոլոր կետերի կատարումը կասեցնելու փոխարեն, նախքան Ադրբեջանը կկատարի Բաքվի կողմից պատանդ պահված հայ գերիների վերադարձի վերաբերյալ 8-րդ կետը, հանկարծ մեր հասարակության համար կարևորագույն հարցը կապում եք Ադրբեջանի և Թուրքիայի համար կենսական և Հայաստանի համար երկրորդական նշանակություն ունեցող «տրանսպորտային ուղիների ընտրության» հետ:

Կա՞ արդյոք Արցախի կարգավիճակի հարցը ձեր բանակցությունների և համաձայնությունների օրակարգում:

Պարոն Փաշինյան, դուք այլևս չեք կարող ներկայացնել հայերին և Հայաստանի անունից որևէ փաստաթուղթ ստորագրել: Քանի որ դուք արդեն երկու ամիս է Հայաստանի Հանրապետության իրավական դաշտից դուրս եք գործում և ոչ մի կապ չունեք ոչ պետության, ոչ էլ ժողովրդի հետ, որի անվան տակ դեռ փորձում եք թաքնվել, շրջապատելով ձեզ զինված թիկնապահների խիտ շղթաներով, ընդ որում մոռանալով, որ այսօր պահպանության և պաշտպանության կարիք ունեն Հայաստանի քաղաքացիները, սահմանները և Սյունիքի բնակիչները:

Ես կցանկանայի իմանալ, թե ի՞նչ են անում պետական մարմինները և ինչպես են նրանք մասնակցում այդ գործընթացներին, և արդյոք նրանց ղեկավարները հասկանում են, որ իրենք՝ իրենց գործողություններով կամ անգործությամբ, օժանդակելով ձեզ, հավասարապես պատասխանատու են կատարվածի համար:

Ինչո՞ւ է միայն Հայաստանի օմբուդսմենը պաշտպանում պետության և երկրի քաղաքացիների շահերը, այլ ոչ թե Ազգային ժողովը, Անվտանգության խորհուրդը, Արտաքին գործերի նախարարությունը կամ պաշտպանության նախարարությունը:

Պարոն Փաշինյան, եթե այս հարցերի պատասխանները դուք չունեք, ապա անիմաստ է գալ Մոսկվա և նյարդայնացնել ու նվաստացնել Ռուսաստանի երեք միլիոնանոց հայկական համայնքին ձեր այստեղ հայտնվելով: Ռուսաստանի հայ համայնքը սպասում է ձեր հրաժարականին, այլ ոչ թե Մոսկվա ժամանմանը»: