Ձեր վստահելի աղբյուրը

«Ձայն հայրենյաց» նախաձեռնության անդամ, գրականագետ Սերժ Սրապիոնյանը իշխանության կողմից շրջանառվող «նախկիները կվերադառնան» արտահայտությունը համարում է մեծագույն հաջողված միֆերից մեկը։

«Այս կառավարությունը կարողացավ իր գործիչներով, որոնք կրթվել էին թուրքիաներում, թուրքական բանակին հայերեն էին դասավանդում, որ այսօր հագնեին հայկական բանակի համազգեստ ու շրջանցեին մեր թիկունքը, մաքուր հայերենով կանչեին թաքստոցներում գտնվող մեր զինվորներին ու գնդակահարեին,  տաս տարի շարունակ, այո, նաև նախկին իշխանությունների ես չգիտեմ լուռ համաձայնությամբ կամ անտեսմամբ, քարոզեին  նախկինների վիշապային մի կերպար, որը մտավ պակաս գրագետ, պակաս կարդացած, պակաս տեղյակ մարդկանց ուղեղի մեջ, մինչև այսօր դուրս չի գալիս։

Խոսքը վերաբերում է  ամենաատելին դարձրած, քանի որ նրա դեմ, կարծում եմ,  շատ մեծ արշավանք էր կազմակերպվել,  Հանրապետության երկրորդ նախագահ Ռոբերտ Քոչարյանին»,- ասուլիսում ասաց գրականագետը։

Նա նշեց, որ Ռ. Քոչարյանի մասին լոյալ միտք էր արտահայտել, հայտնվել էր իշխանության կողմից ձևավորված «պիցայակերների» խմբում, մի կերակրատեսակ, որն ատում է։

«300 միլիոն դոլար բյուջե ունեցող պետությունն այս մարդու կառավարման տարիներին վերածվեց 2,5 միլիարդ բյուջե ունեցող պետության, նրանից հետո 2,5 միլիարդն այդքան էլ մնաց։ Այս մարդու կառավարման ընթացքում կառուցվեց Հյուսիսային պողոտան, որի դեմ վայրահաչոցներ եղան նույն այս մարդկանց կողմից, որոնք թերթի խմբագիր էին, գրչակներ էին, լրագրողիկներ էին, ուղղակիորեն հայտարարում էին, որ ավերվում է ամբողջ Երևանը, պատմական հիշողությունը, բայց հետո Երևան եկավ Անգելա Մերկելը, այլ պաշտոնյաներ, որոնց թևերը բռնած հպարտորեն ցույց էին տալիս իրենց դարի նվաճումը»,- ասաց Ս.  Սրապիոնյանը։

Նա մեջբերում արեց Դերենիկ Դեմիրճյանի «Վարդադանք» վեպից, երբ Վարդան Մամիկոնյանը փորձում էր հոների հետ դաշնակցել, ամենամտերիմ զինակիցը զարմանում է, քանի որ հոները ավերող են, իսկ Մամիկոնյանը պատասխանում է՝ «թեկուզ սատանայի հետ, միայն թե իմ երկիրը փրկեմ, որովհետև սատանայից սատանան այսօր երկիրը կործանման է տանում»։

«Այո, եթե նախկիններն երկիրն այս փոսից հանելու տրամաբանական ծրագրեր ունեն,  կողմ կլինեմ նախկիններին, բոլոր նրանց, ովքեր հստակ գիտակցում են՝ երկրին ուր է հասցվել, երկիրն ինչպես պետք է դուրս գա այս խայտառակ իրավիճակից»,- ասաց գրականագետը։

Ասուլիսին ներկա նախաձեռնության անդամ, կինոռեժիսոր Սամվել Թադևոսյանը կարծիք հայտնեց, որ Փաշինյանը դեռ չի ավարտել այն հանձնարարությունները, որոնք ստացել է, ժամանակ է ձգում.  «Գիտակցում է, որ չի ներվելու. մի դեպքում տերերի կողմից չի ներվի, եթե հանձանարարությունը չկատարի, հակառակ դեպքում հայ ժողովորդը չի ներելու։ Բայց  նրա հավակնությունը  դեպի տերերեի կողմն է, քանի որ նրանք կարող են մի տեղ ապաստան տալ նրան»։

Նա ընդգծեց՝ մենք ենք այս երկրի տերը,  այս վարչակազմն անկախ ամեն ինչից պետք է հեռանա, պետք է գա ազգային կառավարություն, որպեսզի կարողանան տնօրինել այն հայրենիքը, որի համար իսկապես 30 տարի մարտնչում են, որպեսզի հաստատուն լինի։

«Հայաստանը պարզապես հողակտոր չէ, խաղալիք է  այլոց համար, դժբախտաբար, նաև մեր ներքին տականքի համար։ Հայաստանի բախտը  հայ ժողովրդի ու նվիրյալների ափերի մեջ է։
Մեզ պետք է հայեցի, հայամետ իշխանություն, որպեսզի կարողանքն մեր պետության բախտն արևի տակ ապահով դարձնենք»,- ասաց ռեժիսոր Սամվել Թադևոսյանը։