Ձեր վստահելի աղբյուրը

Թուրքական իշխանամետ ԶԼՄ-ները պնդում են, որ Միացյալ Նահանգները գտնվում են հրեաների վերահսկողության տակ, որոնք իրենց լոբբին և մամուլի վրա ազդեցություն են ունեցել՝ օգնելով Ջո Բայդենին հաղթել Սպիտակ տան համար պայքարում։ Այս մասին, Ahval-ի հաղորդմամբ, ասել է Մերձավոր Արևելքի վերլուծաբան Սեթ Ֆրանցմանը։

«Թուրքիայի իշխող «Արդարություն և զարգացում» կուսակցությունը (AKP) անընդհատ ընդունում է ծայրահեղ աջ դավադրության տեսություններ՝ իր «մեդիա մեքենայի» միջոցով իշխանությունը պահպանելու համար», - գրել է Ֆրանցմանը «Jerusalem Post»-ում:

AKP-ի կառավարությունը վերջին տարիներին խստացրել է իր վերահսկողությունը թուրքական լրատվամիջոցների նկատմամբ, ինչը մեծացնում է միջազգային մամուլի անհանգստությունը՝ երկրում մամուլի ազատության վերաբերյալ:

«Լրագրողներ առանց սահմանների» կազմակերպության տվյալներով  Թուրքիան ներկայումս Աշխարհի մամուլի ազատության ինդեքսում 180 երկրների մեջ 154-րդն է, համարվում է «առավել ավտորիտար, քան երբևէ»։

Ֆրանցմանը մեջբերել է վերջերս թուրքական «Yeni Şafak» թերթում հրապարակված հոդվածը, որում ասվում էր, որ հրեաները «համարյա մեկ դար օգտագործում էին ԱՄՆ-ը որպես ծովախոզուկ՝ ամբողջ աշխարհում իրենց տիրապետությունն արդարացնելու համար:

«Yeni Şafak»-ը գրել է, որ Դոնալդ Թրամփը,  ԱՄՆ-ի «լավագույն նախագահը»,  հեռացվել է օֆիսից «հրեա լորդերի»  կողմից, քանի որ նա պայքարել է Ամերիկան հրեական իշխանության օկուպացիայից ազատելու համար:

Նշվում է, որ Թրամփն ապացուցել է, որ իր քաղաքական գործընկեր Ռեջեփ Թայիփ Էրդողանի համար արժեքավոր քաղաքական դաշնակից է և պահպանել է ջերմ հարաբերություններ վերջին տարիներին: ԱՄՆ նախագահը չի կարողացել հավանություն տալ Կոնգրեսի կոչերին՝ պատժել Թուրքիային՝ Ռուսաստանից S-400 ՀՕՊ հրթիռներ գնելու համար: Նա նաև գործել է Էրդողանի խնդրանքների համաձայն` խոչընդոտելով Թուրքիայի պետական Halkbank-ի հետապնդումը` Իրանին ԱՄՆ պատժամիջոցներից խուսափելու հարցում օգնելու համար, ասել էր Թրամփի ազգային անվտանգության նախկին խորհրդական Ջոն Բոլթոնը:

««Yeni Şafak»-ում հոդվածը չէր տպվի, եթե խմբագիրները չիմանային, որ այն աջակցություն ունի Թուրքիայի բարձրագույն մակարդակներից», - գրել է Ֆրանցմանը:

Ֆրանցմանը գրել է, որ աճող հակասեմականությունը, որ տեղ է գտնում թուրքական հիմնական լրատվամիջոցների հրապարակումներում ապացուցում է, որ Թուրքիայի և Իսրայելի միջև ցանկացած հաշտեցում հիմնականում պատրանք է:

Հաղորդվում է, որ Անկարան վերջերս պատրաստակամություն է հայտնել Իսրայելի հետ ավելի լավ հարաբերություններ հաստատել։ Նոյեմբեր ամսվա զեկույցները բացահայտեցին երկրների հետախուզության բարձրաստիճան պաշտոնյաների միջև մի շարք հանդիպումները՝ հաշտեցումը քննարկելու համար:

Նշենք, որ Թուրքիա-Իսրայել հարաբերությունները վերջին տասնամյակում բավական սրվել են։ Կողմերի միջև անհամաձայնությունները շարունակվում են Գազայի և Պաղեստինի հարցերում։
Երկու երկրների միջև հարաբերությունները սրվեցին 2010թ․-ին Մարմարա նավի հետ կապված միջադեպից հետո, երբ Գազա օգնություն տանող նավի վրա հարձակման արդյունքում սպանվեցին  10 թուրքեր, վիրավորվեցին 56-ը։

2018-ի մայիսին Անկարան հետ կանչեց իր դեսպանին Իսրայելից ու վտարեց Անկարայում Իսրայելի դեսպանին՝ Գազայի հատվածում պաղեստինցիների դեմ մահացու հարձակումների պատճառով, որոնք բողոքում էին ԱՄՆ նախագահ Դոնալդ Թրամփի՝ ԱՄՆ դեսպանատունը Թել Ավիվից Երուսաղեմ տեղափոխելու որոշման դեմ: Հարձակման արդյունքում սպանվել էր մոտ 60 մարդ, վիրավորվել՝ ավելի քան 2000-ը։

Էրդողանն ու Նեթանյահուն միմյանց հասցեին մեղադրանքներ հնչեցրեցին, Էրդողանը Նեթանյահուին անվանեց «ռասիստ», Նեթանյահուն՝ Էրդողանին՝ «բռնապետ»։ Նեթանյահու-Էրդողան պատերազմին  միացավ նաև Նեթանյահուի որդին՝ հիշելով հայերի ցեղասպանությունը։
Էրդողանը վերջերս հայտարարեց, որ Երուսաղեմը թուրքական քաղաք է, իսկ Յաիր Նեթանյահուն էլ Էրդողանին հիշեցրել էր, որ Ստամբուլը Կոնստանդնուպոլիս կոչված քաղաքն է, Բյուզանդական կայսրության մայրաքաղաքն ու ուղղափառ քրիստոնեաների կենտրոնը ավելի քան 1000 տարի՝ մինչև թուրքական օկուպացիան։

Վերջին շրջանում թուրքական ԶԼՄ-ները խոսում են հաշտեցման մասին, որին Իսրայելը թերահավատորեն է մոտենում։

Թուրքական ԶԼՄ-ներն անհանգստացած են նաև ԱՄՆ նորընտիր նախագահ Ջո Բայդենի կողմից Ազգային անվտանգության խորհրդի Մերձավոր Արևելքի հարցերով հանձնակատարի պաշտոնում Թուրքիայի կառավարության խիստ քննադատ Բրեթ ՄքՔուրքի առաջադրմամբ։ Թուրքիայում կարծում են, որ ՄքՔուրքի նշանակումը կարող է լինել ԱՄՆ-ի «ընկերներին» սպառնալու ԱՄՆ քաղաքականության վերադարձ՝ նշելով նաև, որ Բայդենն արդեն «քննադատաբար էր վերաբերվում Թուրքիային՝ կապված Հայաստանի հետ վերջին հակամարտության մեջ Ադրբեջանին սատարելու հետ»: