Ձեր վստահելի աղբյուրը

Կրեմլում Վլադիմիր Պուտինի նախաձեռնությամբ տեղի ունեցան եռակողմ բանակցությունները՝ Ռուսաստանի Դաշնության Նախագահի, ՀՀ Վարչապետ Նիկոլ Փաշինյանի և Ադրբեջանի Նախագահ Իլհամ Ալիևի միջև Ռուսաստանի Դաշնության նախագահ Վլադիմիր Պուտինը կարեւոր ու օգտակար է համարել։

«Կարծում եմ, որ այսօրվա հանդիպումը չափազանց կարևոր և օգտակար է, քանի որ մենք կարողացանք համաձայնության գալ և համատեղ հայտարարություն ստորագրեցինք տարածաշրջանում իրավիճակի զարգացման վերաբերյալ»,-երկուշաբթի, եռակողմ բանակցություններից հետո ասել է Պուտինը: Նրա խոսքերը մեջբերում է ՏԱՍՍ-ը:

Պուտինը նաև հստակեցրել է, որ նկատի ունի կոնկրետ քայլեր՝ տնտեսական կապերի և ենթակառուցվածքային նախագծերի զարգացման ուղղությամբ:

Ռուսաստանի Դաշնության Նախագահը հավելել է, որ այդ նպատակով «կստեղծվի աշխատանքային խումբ` երեք կառավարությունների` Հայաստանի, Ադրբեջանի  և Ռուսաստանի փոխվարչապետների գլխավորությամբ:

Պուտինի խոսքով՝  մոտ ժամանակներս կառավարությունների փոխվարչապետերը կստեղծեն աշխատանքային ենթախմբեր, կներկայացնեն կոնկրետ ծրագրեր տրանսպորտային ենթակառուցվածքների և տարածաշրջանի տնտեսության զարգացման համար:

«Համոզված եմ, որ այդ համաձայնագրերի իրականացումը օգուտ կբերի ինչպես ադրբեջանցի, այնպես էլ հայ ժողովուրդներին, անկասկած ՝ ամբողջ տարածաշրջանին, հետևաբար նաև ՝ Ռուսաստանի Դաշնության շահերին»,-շեշտել է ՌԴ  ղեկավարը:

Պուտինը կրկին շնորհակալություն է հայտնել իր զրուցակիցներին `Մոսկվա գալու համաձայնության համար: Նա նաև ավելացրել է, որ երեք կողմերն էլ համաձայնել են, որ ընդհանուր առմամբ պահպանվում են 2020 թ. Նոյեմբերի 9-ի համաձայնագրի պայմանները, լուրջ միջադեպեր չեն արձանագրվել, և Ռուսաստանի խաղաղապահ խումբը լիովին կատարում է իր ստանձնած պարտավորությունները: Ռուսաստանի ղեկավարը նշել է, որ ավելի քան 48 հազար տեղահանված և փախստական արդեն վերադարձել է Լեռնային Ղարաբաղ։