Ձեր վստահելի աղբյուրը

«Ամբողջ աշխարհում սկսվել է կորոնավիրուսի դեմ պատվաստումային գործընթացը որպես կանխարգելիչ հիմնական միջոցառում, շատ երկրներում սկսվել են մասսայական պատվաստումները:  Այս պահին  Հայաստանը գործող պայմանագիր ունի  COVAX Facility–ի հետ, և նախատեսում են Հայաստանի բնակչության 10 տոկոսի համար ձեռք բերել պատվաստանյութ, խոսքը ռիսկի խմբի անձանց պատվաստելու մասին է»,-ասուլիսում այս մասին ասաց ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը:

Նա հայտնեց, որ այս պահին նախնական բանակցություններ են վարում պատվաստանյութի ներկրման, ներբերման համար. մինչև հունվարի վերջ,  փետրվարի առաջին կես կունենան առաջին խմբաքանակը, կսկսեն ռիսկի խմբերի շրջանում իրականացնել պատվաստումները:

Գ.Սահակյանը հայտնեց, որ ինտենսիվ բանակցություններ ենք վարում Sputnik V, Moderna, Pfizer և AstraZeneca պատվաստանյութերը ձեռք բերելու ուղղությամբ, քանի որ այս չորսի վերաբերյալ կան հետազոտություններ, կլինիկական փորձարկումների արդյունքներ: 

«Մեզ համար կարևոր է պատվաստանյութի անվտանգությունը, արդյունավետությունը:
Զուգահետ այս չորս պատվաստանյութերի վերաբերյալ բանակցություններ ենք վարում, որն ավելի շուտ երկիր կներկրվի, այս պահին չեմ կարող ասել, տարբեր հարցերի հետ է կապված, մինչև վերջին պահը կարող են անակնկալներ լինեն»,- նշեց ԱՆ ներկայացուցիչը:

Հարցին, թե ովքե՞ր են պատվաստվել ՌԴ կողմից տրամադրված Sputnik V պատվաստանյութով բացի առողջապահության նախարարությունից, արդյո՞ք կողմնակից ազդեցություններ եղել են, այդ անձիք հակամարմինների  թեստավորում անցե՞լ են, Գ.Սահակյանն ասաց, որ այն ընդամենը 15 հոգու համար է, պատվաստվել է նաև ինքը, որևէ անհաջող դեպք չի գրանցվել պատվաստվելուց հետո, ներարկման տեղում նույնիսկ կարմրություն, ցավ չի նկատվել:

«Հակամարմինների վերաբերյալ չեմ կաորղ ասել, որ հետազոտություն արել ենք, քանի որ  մենք ունենք հակամարմինների որոշման թեստեր, իսկ կոնկրետ պատվաստումների դեպքում հատուկ թեստեր են, այս պահին նման թեստեր չեն արվում, ընդհանուր առմամբ խորհուրդ չի տրվում»,- ասաց Գայանե Սահակյանը: