Ձեր վստահելի աղբյուրը

Քաղաքական վերլուծաբան Վարդան Բալյանը գրում է.

«Մեր ժողովուրդն այսօր ապրում է ծանր փորձությունների հերթական մի նոր շրջան։ Ցավոք, այդպիսիք բազմաթիվ են եղել, արդյունքում հազարավոր մեր հայրենակիցներ հայրենազրկվել են ու դարձել պանդուխտ, և հայը կարծես դարձել է անցյալի հզորության և փառքի երազանքով և հայրենիքի կարոտով ապրող  ժողովուրդ։ Մեր ազգային վերելքի ու անկման պատճառները միշտ եղել են նույնը՝ սեփական ինքնությունից խռոված, միասնությունը պառակտած անկարող ենք եղել պաշտպանել ազգային արժանապատվությունը և հայրենիքը։

Ամեն անգամ ազգային ներքին քայքայումը և ճգնաժամը խորացրել է անկումը, կազմաքանդել հավատը սեփական ուժերի նկատմամբ, արժեզրկել ազգային պետականության ավանդույթները։
Վերջին պատերազմում հերոսաբար կռված զինվորները և հերոսացած նահատակները այսօր պարտավորեցնում են վերականգնել ազգային պատիվը, հայ ազգի ոգու և կամքի միասնությունը։
Այդ նշանակում է հանձնառություն նախաձեռնել համակարգային բարեփոխումներ և նոր պետականաշինության ծրագիր ու իրականացնել մինչև վերջ՝ վճռական հաստատակամությամբ։

Գլուխ խոնարհելով անցյալի մեր բոլոր հայրենատեր նահատակների հիշատակի առջև՝
մենք հայտարարում ենք նոր քաղաքական ուժի հիմնադրման նախաձեռնության մասին, որ պետք է փոխարինի վճռական գործողությունների անկարողունակ գործող կառավարությանը և վերականգնի մեր ժողովրդի ու պետության անառարկելի հեղինակությունը։

Նպատակը՝ միավորել ազգային բոլոր կենսունակ ուժերին յուրաքանչյուր հայի հետ ազնիվ և արդար ազգային պետության կառուցման գործում, որ կպաշտպանի մեր լեզուն, մշակույթը, հավատը, մեր ազատությունը, մեր պատիվը, մեր հայրենիքը, մեր բոլորի Հայաստան աշխարհը։

Կուսակցության հիմնադիր համագումարը նախանշանված է մեզ համար խորհրդանշական օր՝  2021 թվականի փետրվարի 21֊ին/ 21.02.2021 ՝ Մայրենի լեզվի օրը։

Վաղվանից կսկսենք հրապարակել հիմնադիր և ծրագրային փասաթղթերը ու ձևավորել նախաձեռնող խումբ։
Պատիվ կհամարեմ գաղափարի ընկեր դառնալ յուրաքանչյուր հայրենատեր հայի»։