Թևան Պողոսյան. Փաշինյանը Մոսկվա գնացել էր առանց արգումենտի
«Փաշինյանը գնացել էր Մոսկվա ոչ թե բանակցելու՝ հայտարարությունը ստորոգրել-չստորագրելու վերաբերյալ, այլ քննարկելու արդեն պատրաստի հայտարարոթյան տեքստի ստորակետները՝ դնե՞լ բառից այս կողմ, թե՞ այն կողմ»,- «Փաշինյան-Պուտին-Ալիև առաջին հանդիպումը 44-օրյա պատերազմից հետո» թեմայով քննարկման ժամանակ ասաց «Մարդկային զարգացման միջազգային կենտրոնի» ղեկավար Թևան Պողոսյանը։
Որպես ասվածի հիմնավորում, քաղաքական-հասարակական գործիչը նշում է, դրա համար Մոսկվա Փաշինյանը մեկնել էր միայնակ, առանց թիմի։
«Եթե կողմերը գնում են բանակցելու, աշխատանքը լինում է թիմային։ Բայց մենք տեսանք ոչ արտգործնախարարն էր այնտեղ, ոչ էլ որևէ մեկը։ Երեք ղեկավարներն էին, որոնց աշխատակազմերն օրեր առաջ ամեն ինչ արել էին, մեզ էլ այստեղից-այնտեղից լուրեր էին հասնում, որ տնտեսական հարցեր են լինելու։ Ինչո՞ւ եմ այս ամենն ասում, քանի որ հայկական կողմն այսօրվա դրությամբ չունի բանակցային լծակ։ Միակ լծակը լինելու է այն, որ կարող են ասել, չենք կատարի այսինչ բանը, եթե մեր գերիներին չտաք»,- ասաց Պողոսյանը։
Նա նկատեց, որ Մոսկվա այցին ընդառաջ որևէ գործողություն Ադրբեջանի դեմ չի իրականացվել, Փաշինյանը Մոսկվա գնացել է առանց արգումենտի։
«Եթե օրինակ, պարզվեր, որ մոտ 100 ադրբեջանցի սահմանը խախտել է ու գերի է ընկել, կամ Ադրբեջանի նկատմամբ լիներ քրեական գործ միջազգային դատարանում։ Եթե լիներ նման պաշար, արգումենտ, կարելի էր բանակցել, բայց չկա, ուստի կարելի էր և չգնալ»,- նշեց Պողոսյանը։
Ինչ վերաբերում է տնտեսական ապաշրջափակմանն ու դրա հետևանքներին, Թ. Պողոսյանը մի քանի հարցի վրա է հրավիրում ուշադրությունը, արդյո՞ք այսօր Ադրբեջանը չունի այլընտրանքային ճանապարհներ իր ապրանքները Նախիջևան, Թուրքիա հասցնելու համար։
«Ադրբեջանի տեսակետից այս բոլոր ճանապարհները ծախսեր են, պետք է ներդրվեն գումարներ։ Հաջորդ հարցը, մեզ ի՞նչ է տալու այս փաստաթուղթը։ Արդյո՞ք այսօր այնքան ապրանք ենք արտադրել, որ չգիտենք էլ ինչ անենք մեր տարածքում ու մեզ պետք է լինելու երկաթգծերով հասցնել Ռուսաստան։ Կամ ենթադրենք, որ երկաթգիծը բացվեց, արդյո՞ք մի քանի օր անց Ադրբեջանը չի փակի մեզ համար այն»,- նշեց Պողոսյանը։
Նա ցավ հայտնեց, որ հայկական կողմը չի գիտակցում՝ ստեղծված իրավիճակում նոր մոտեցումներ են անհրաժեշտ, հակառակ պարագայում չի բացառուվում՝ շուտով Ադրբեջանը կդառնա ԵԱՏՄ, ՀԱՊԿ դիտորդ անդամ, իսկ մենք, ըստ նրա, կմնանք նույն տաշտակի առաջ, քանի որ չենք հասկանում, որ բանակցություններն արվեստ են. «Ոչ մի հարցի չենք մոտենում լուրջ»։
Հարակից հրապարակումներ`
Լրահոս
Տեսանյութեր
Խայտառակություն Թումանյան փողոցում. Չախոյան
