Փաշինյանն իրականացնում է Թուրքիայի և Ադրբեջանի 100 տարվա երազանքը. Լիլիթ Թումանյան
«Նիկոլ Փաշինյանը շարունակում է բավարարել ադրբեջանական ժողովրդի շահերը, և շարունակում է իրականացնել այն երազանքները, որոնց իրականացմանը վերջին 100 տարվա ընթացքում Թուրքիան և Ադրբեջանը չեն հասել»,- այսօր հրավիրված ասուլիսի ընթացքում ասաց «Ադեկվադ» միաբանության անդամ Լիլիթ Թումանյանը՝ անդրադառնալով երեկ տեղի ունեցած Փաշինյան-Պուտին-Ալիև եռակողմ հանդիպմանը։
Ըստ նրա, այն միջանցքը, որը հիմա Թուրքիան Ադրբեջանին է կապելու, թշնամու 100 տարվա երազանքն էր, որն այսօր իրական է դառնում։
«Այսօր Հայաստանը Նիկոլ Փաշինյանի փոխարեն պաշտպանում է ՌԴ նախագահը, որովհետև նա է խոսում այն մասին, որ տարածաշրջանում կա ահաբեկչության վտանգ, նա է խոսում ԵԱՀԿ Մինսկի խմբի մասին, ազգերի ինքնորոշման մասին, այսինքն՝ ԼՂ կարգավիճակի մասին։ Ինքն է խոսում նաև ադրբեջանական և հայկական ժողովրդի համար հավասարաչափ պայմանների մասին։ Պուտինն է խոսում, էլ ինչո՞ւ պետք է Նիկոլ Փաշինյանը մտածի մեր երկրի մասին, եթե դա անում է իրական գերտերության ղեկավար Պուտինը»,- նկատեց Լիլիթ Թումանյանը։
Ըստ նրա, Նիկոլ Փաշինյանն իր վարքագծով ցույց է տալիս՝ համաձայն է այն մտքի հետ, որ ինքն այլևս Հայաստանը չի ներկայացնում։
«Այս ամբողջ գործընթացին նայելով՝ մենք կտեսնենք երեք կողմ՝ Ադրբեջան-Թուրքիա, Ռուսաստան և Նիկոլ, բայց ոչ Հայաստան։ Այս պարագայում Նիկոլ Փաշինյանն արդեն որպես սպասավոր է ներկայանում։ Սպասավոր, որը կուշտ ստամոքսի սկզբունքի ակնկալիքով հույս ունի քիչ էլ երկարացել իր իշխանությունը»,- նկատեց նա։
Լիլիթ Թումանյանի խոսքով, անգրագիտություն է ասելը, թե երկաթգծի շահագործմամբ տնտեսությանն է զարկ տրվելու։
«Այժմ Նիկոլ Փաշինյանը մեզ առաջարկում է նաև տնտեսական ինքնիշխանության կորուստ։ Ինքը մեզ անընդհատ կորուստներ է առաջարկում։ Ինքը շատ լավ հասկանում է, որ առաջիկա կես տարվա ընթացքում լուրջ տնտեսական ցնցումներ են լինելու, և ինքը պետք է ինչ-որ բան առաջարկի։ Սեփական ներուժ նա չունի։ Չհաշված, որ մեր պարտքը մեկ մլրդով ավելացել է։ Այսինքն՝ ստացվում է, որ ինքն, այնուամենայնիվ, ինչ-որ հոսքեր պիտի առաջարկի։ Եվ վարկ էլ այլևս կարող են մեզ չտալ, կամ եթե տան, արդեն շատ թանկ տոկոսներով։ Տակը մնում են թուրքական ապրանքները, թուրքական առք ու վաճառքը»,- նշեց նա։
Բայց և այնպես, բանախոսը զգուշացնում է՝ Թուրքիան և Ադրբեջանը երբեք չեն հրաժարվի իրենց գլոբալ ծրագրից, իսկ այդ ծրագրով ՀՀ տարածքում հայեր չկան։
«Եվ Նիկոլ Փաշինյանն ամեն ինչ անում է, որ այդ դարավոր երազանքն իրականանա։ Ուստի Թուրքիան և Ադրբեջանն ամեն ինչ կանեն, որ Փաշինյանը մնա իշխանության»,- ասաց բանախոսը։
Հարակից հրապարակումներ`
- Շարունակում ենք հանձնել, հանձնվել և հանդուրժել. Մելոյան
- Մոսկվայի եռակողմ հանդիպման ավարտից հետո Շուշիից սկսել են կրակել Ստեփանակերտի ուղղությամբ
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
