Ձեր վստահելի աղբյուրը

Իրավապաշտպան Ավետիք Իշխանյանը գրում է. 

«Տարածված տեղեկությունը հաստատվեց՝ ԲԴԽ թափուր տեղի թեկնածու է առաջադրվում Գագիկ Ջհանգիրյանը։  Որևէ մեկը կասկածու՞մ է, որ նա «կընտրվի»։ Իհարկե «Բարգավաճ Հայաստան» և «Լուսավոր Հայաստան»  խմբակցությունների անդամները խրոխտ հարցեր կտան և բոցաշունչ ելույթներ կունենան, ապա, հավանաբար չեն մասնակցի քվեարկությանը, բայց․․․ի՞նչ, սահմանադրությամբ նախատեսված «որակյալ մեծամասնությունը»  «Նիկոլի քայլի» ձեռքում է։

Հաջորդ քայլով կսկսվեն «օրինական» կարգով ԲԴԽ նախագահ Ռուբեն Վարդազարյանի նկատմամբ ճնշումներն ու հետապնդումները։ Եվ շուտով Գագիկ Ջհանգիրյանը կդառնա, ներեցեք «կընտրվի» ԲԴԽ նախագահ։

Տեղեկանք․ Գագիկ Ջհանգիրյանը 1995 թ․ եղել է  ՀՀ կենտրոնական ընտրական հանձնաժողովի փոխնախագահը։ Իրականում, բոլորին է հայտնի,  որ ԿԸՀ նախագահ Ռոբերտ Ամիրյանը ոչինչ չէր որոշում և ԿԸՀ-ի տեր ու տնօրենն իրականում Գագիկ Ջհանգիրյանն էր։ Եվ հենց 1995թ․ սկիզբ դրվեց ընրակեղծիքների արատավոր պրակտիկային։ Լավագույնս իրականացնելով «ընտրությունները», հետագայում Ջհանգիրյանը նշանակվեց զինվորական դատախազ։ Այդ տարիներին նրա ջանքերով կոծկվեցին բազմաթիվ զինվորական հանցագործություններ։ Հայտնի են բազմաթիվ խոշտանգումներով «ձեռք բերված»ապացույցներ, նրա պաշտոնավարման տարիներին։

Միայն հայտնի «Մատաղիսի» գործը կարծում եմ բավարար է։Հետագայում , նշանակվելով գլխավոր դատախազի տեղակալ, պահպանեց «քաղաքական չեզոքությունը» և  2008թ․ միացավ քաղաքական  ընդդիմությանը։ 2012թ․արդեն որպես դասական քաղաքական գործիչ դարձավ պատգամավոր։

Այսպիսով, Գագիկ Ջհանգիրյանի ԲԴԽ անդամի թեկնածությունը լիովին համապատասխանում է իրավաբան գիտնականի բարձր կոչմանը, զերծ քաղաքական գործունեությունից,անբասիր կենսագրությամբ, զերծ  կոռուպցիայից և ամենակարևորը՝ բացարձակապես որևէ կապ չունենալով «նախկին, հանցավոր,  թալանչի» ռեժիմի հետ»։