Ձեր վստահելի աղբյուրը

«Խմբակցության խորհրդակցության արդյունքում է որոշվել Գագիկ Ջհանգիրյանին առաջադրել՝ որպես ԲԴԽ անդամի թեկնածու»,- այսօր խորհրդարանում լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը։

Նրա խոսքով, Գագիկ Ջհանգիրյանը ոլորտի պրոֆեսիոնալ է, և դա առաջնային դեր է ունեցել՝ նրան առաջադրելու հարցում։

«Իհարկե, նրա հետ կապված հարցերը, հանրային դաշտում առկա մեկնաբանություններն ու դիրքորոշումները հնչեցվել են, և Գագիկ Ջհանգիրյանը խմբակցությանը սպառիչ պարզաբանումներ է ներկայացրել»,- նշեց նա։

Լիլիթ Մակունցը տեղեկացրեց, որ ԲԴԽ անդամ դառնալու համար դատավորներին և իրավաբան-գիտնականներին ներկայացվող պահանջները տարբեր են, ուստի Գագիկ Ջհանգիրյանի տարիքի հետ կապված խնդիր չկա։

Պատգամավորը նշեց, որ այսօր արդեն իսկ ներկայացվելու է Ջհանգիրյանի թեկնածությունը, և առաջիկա քառօրյայում քննարկվելու է այդ հարցը։

Հարցին՝ արդյո՞ք կաշկանդվածություն չունի իշխող խմբակցությունը՝ ելնելով այն հանգամանքից, որ միշտ նախկինների դեմ հատուկ տրամադրվածություն է ունեցել, իսկ հիմա հենց նախկինների հետ աշխատած մարդու թեկնածությունն է առաջադրում, Լիլիթ Մակունցը պատասխանեց՝ ոչ։

«Մենք կաշկանդվածություն չունենք՝ առաջադրելու Գագիկ Ջհանգիրյանին։ Նա համապատասխանում է ԲԴԽ անդամի համար նախանշված բոլոր չափանիշներին։ Եվ մենք առաջնորդվում ենք հենց դրանով։ Խմբակցությունը միաձայն կողմ է եղել նրա թեկնածությանը»,- ասաց իշխանական խմբակցության ղեկավարը։

Դիտարկմանը, որ կան բազմաթիվ կարծիքներ, թե իշխանությունը Գագիկ Ջհանգիրյանին տանում է ԲԴԽ՝ իր դիրքերը դատական համակարգում ամրապնդելու համար, Լիլիթ Մակունցն արձագանքեց՝ խմբակցությունը նման խնդիր չի դրել իր առաջ։

«Որևէ նման խնդիր չի դրվում և չի կարող դրվել մեր իշխանության պարագայում։ Խմբակցությունն իրավունք ունի առաջադրելու, հետևաբար առաջադրել է»,- ասաց նա։

Լրագրողի հարցին, թե արդյո՞ք դեռ կան վնգստացող դատավորներ, Լիլիթ Մակունցը արձագանքեց. «Վնգստացող դատավորներ ձևակերպումը կոռեկտ չեմ համարում։ Վարչապետն  այլ համատեքստում է դա ասել»։

Ինչ վերաբերում է Նիկոլ Փաշինյանի մոսկովյան այցին, և հայաստանյան օրակարգը՝ գերիների վերադարձի առնչությամբ, տապալելուն, ապա Լիլիթ Մակունցը նշեց, որ նախապես սահմանված էր՝ քննարկումներ կարող էին տեղի ունենալ ճանապարհների ապաշրջափակման վերաբերյալ։

«Չորս ժամ եղած բանակցություններից երեքը նվիրված է եղել գերիների վերադարձին, դա առաջնային հարց է։ Չեմ կարծում՝ գերիների թեման այն հարցն է, որ պետք է որևէ մեկի կողմից՝ քաղաքական գործիչ թե լրագրող, շահարկվի։ Բոլոր հնարավոր հարթակներով ջանքեր են գործադրվում»,- նկատեց նա։