Ձեր վստահելի աղբյուրը

ՀՀ ՊՆ վարչական տարածք ավտոմեքենայով մուտք գործած անհետ կորած զինվորի հոր նկատմամբ խափանման միջոց է կիրառվել ստորագրություն` չհեռանալու մասին, և նա ազատվել է արգելանքից: Այս մասին տեղեկացնում է  նրա պաշտպան Կարեն Ստեփանյանը:

Ավելի վաղ, Panorama.am-ի հետ զրույցում պաշտպանն ասել էր. «Որպես կասկածյալ կարճ ներկայացրել է իր հոգեվիճակը, պահի տակ ծնված քայլ է եղել, ինքն էլ է հասկանում, բայց մարդն անճարությունից ինչի ասես ընդունակ է: Որևէ մեկին կոնկրետ վնասելու միտում չի ունեցել, պահի ազդեցության տակ այդ քայլն է կատարել»։

Կ. Ստեփանյանի խոսքով, բոլորն էլ հասկանում են այդ քայլի էությունը, բայց այս պահին կարեկցանքը քիչ է, պետք է իրավական գործընթացներով անցնի ու ճիշտ գնահատական տրվի ամեն ինչին՝ իր հոգեվիճակին, արարքի նպատակին:

Պաշտպանն ասաց, որ դեռ տեղեկություն չունեն անհետ կորած զինծառայողի մասին, վերջին տեղեկությունը եղել է հոկտեմբերի 3-4-ին, մի քանի ամսվա ծառայող է եղել: Նա պատմեց, որ հայրն էլ որպես կամավոր մասնակցել է մարտական գործողություններին, որդու դիրքերից մի քանի հարյուր մետր է հեռու եղել, գնացել էր իր որդուն մոտ լինելու համար:

Հիշեցնենք, որ հունվարի 10-ին, ժամը 21։30-ի սահմաններում, ՀՀ Կոտայքի մարզի բնակիչ Գ.Վ.-ն, իր անձնական օգտագործման «ՎԱԶ 2107» մակնիշի ավտոմեքենայով հարվածել է ՀՀ ՊՆ վարչական համալիրի հսկիչ անցագրային կետի դարպասին, կոտրել դրանք և մուտք գործել ՊՆ վարչական համալիրի տարածք: Պաշտպանության նախարարությունից հայտնել էին, որ  այնուհետև Գ.Վ.-ն մեքենայով կոտրել է վարչական մասնաշենքի մուտքի դռները և մեքենայով մխրճվել շինության մեջ։ Քաղաքացի Գ.Վ.-ն ձերբակալվել է հսկիչ անցագրային կետում ծառայություն իրականացնող ՊՆ ՌՈ աշխատակիցների կողմից:

Փաստի առթիվ ՊՆ ՌՈ Երևանի բաժնում նախապատրաստված նյութերը փոխանցվել են ՀՀ քննչական կոմիտե: ՀՀ ՔԿ ԶՔԳՎ 4-րդ ԿՔԲ-ն, ՀՀ քրեական օրենսգրքի 327.6 հոդվածի 5-րդ մասով և 258 հոդվածի 4-րդ մասով հարուցվել է քրեական գործ։