Ձեր վստահելի աղբյուրը

ՀՀ պաշտպանության նախարարության վարչական համալիր ավտոմեքենայով մուտք գործած անհետ կորած ժամկետային զինծառայողի հորը դեռևս մեղադրանք չի առաջադրվել: Panorama.am-ի հետ զրույցում նրա պաշտպան Կարեն Ստեփանյանը հայտնեց, որ ձերբակալության 72 ժամը լրանում է ժամը 01:00-ին, քիչ անց նախատեսված են քննչական գործողություններ՝ կամ մեղադրանք կառաջադրվի, կամ կազատվի, կամ  դատարան կներկայացվի կալանավորման միջնորդություն:

Նա կարծում է՝ մեղադրանք կառաջադրվի, սակայն ինչ հոդվածով, չկարողացավ նշել:

«Որպես կասկածյալ կարճ ներկայացրել է իր հոգեվիճակը, պահի տակ ծնված քայլ է եղել, ինքն էլ է հասկանում, բայց մարդն անճարությունից ինչի ասես ընդունակ է: Որևէ մեկին կոնկրետ վնասելու միտում չի ունեցել, պահի ազդեցության տակ այդ քայլն է կատարել»,- ասաց պաշտպանը:

Կ. Ստեփանյանի խոսքով, բոլորն էլ հասկանում են այդ քայլի էությունը, բայց այս պահին կարեկցանքը քիչ է, պետք է իրավական գործընթացներով անցնի ու ճիշտ գնահատական տրվի ամեն ինչին՝ իր հոգեվիճակին, արարքի նպատակին:

Պաշտպանն ասաց, որ դեռ տեղեկություն չունեն անհետ կորած զինծառայողի մասին, վերջին տեղեկությունը եղել է հոկտեմբերի 3-4-ին, մի քանի ամսվա ծառայող է եղել: Նա պատմեց, որ հայրն էլ որպես կամավոր մասնակցել է մարտական գործողություններին, որդու դիրքերից մի քանի հարյուր մետր է հեռու եղել, գնացել էր իր որդուն մոտ լինելու համար:

Հիշեցնենք, որ հունվարի 10-ին, ժամը 21։30-ի սահմաններում, ՀՀ Կոտայքի մարզի բնակիչ Գ.Վ.-ն, իր անձնական օգտագործման «ՎԱԶ 2107» մակնիշի ավտոմեքենայով հարվածել է ՀՀ ՊՆ վարչական համալիրի հսկիչ անցագրային կետի դարպասին, կոտրել դրանք և մուտք գործել ՊՆ վարչական համալիրի տարածք: Պաշտպանության նախարարությունից հայտնել էին, որ  այնուհետև Գ.Վ.-ն մեքենայով կոտրել է վարչական մասնաշենքի մուտքի դռները և մեքենայով մխրճվել շինության մեջ։ Քաղաքացի Գ.Վ.-ն ձերբակալվել է հսկիչ անցագրային կետում ծառայություն իրականացնող ՊՆ ՌՈ աշխատակիցների կողմից:

Փաստի առթիվ ՊՆ ՌՈ Երևանի բաժնում նախապատրաստված նյութերը փոխանցվել են ՀՀ քննչական կոմիտե: ՀՀ ՔԿ ԶՔԳՎ 4-րդ ԿՔԲ-ն, ՀՀ քրեական օրենսգրքի 327.6 հոդվածի 5-րդ մասով և 258 հոդվածի 4-րդ մասով հարուցվել է քրեական գործ։