Ձեր վստահելի աղբյուրը

«Դատավորների թվակազմի ավելացում ենք նախատեսում ինչպես առաջին ատյանի ընդհանուր իրավասության, այնպես էլ վերաքննիչ քրեական դատարանում՝ առանձին ընթացակարգով մինչև 21 հաստիք առաջին ատյանի դատարանում և 3 հաստիք մյուսում»,- կառավարության նիստում հայտնեց արդարադատության նախարար Ռուստամ Բադասյանը՝ ներկայացնելով «ՀՀ դատական օրենսգիրք» սահմանադրական օրենքում, «ՀՀ քրեական դատավարության օրենսգրքում» և «Արդարադատության ակադեմիայի մասին» օրենքում փոփոխությունների նախագծերի փաթեթը:

Նա հայտնեց, որ ավելացումն արվում է, քանի որ նախագծով ներդրվում է երկու ենթամասնագիտացում՝ մինչդատական վարույթի նկատմամբ դատական վերահսկողություն իրականացնող մասնագիտացված դատավորների ինստիտուտը և կոռուպցիոն հանցագործությունների քննություն իրականացնող դատավորների մասնագիտացումը:

Նկատելով, որ քրեական մասնագիտացման դատավորները քննում են նաև այնպիսի գործեր, որոնք վերաբերում են մինչդատական վարույթի նկատմամբ դատական վերահսկողությանը, կալանքի միջնորդություններ, խուզարկության թույլտվության միջնորդությանը՝ արդարադատության նախարարը նշեց. «Մենք կարծում ենք, որ մինչդատական վարույթի նկատմամբ դատական վերահսկողություն իրականացնող մասնագիտացումը անհրաժեշտություն է նմանատիպ միջնորդությունների քննության արդյունավետությունը բարձրացնելու տեսանկյունից: Նաև հակակոռուպցիոն ռազմավարությունից բխում է, որ պետք է ներդրվեր մասնագիտացում կոռուպցիոն հանցագործությունների քննության մասով՝ դրանց քննության արդյունավետությունն ու որակը բարձրացնելու նպատակով»:

Ռուստամ Բադասյանի հրապարակած վիճակագրական տվյալների համաձայն, 2019 թվականի հուլիսի 1-ից 2020 թվականի հուլիսի 1-ը ընկած ժամանակահատվածում դատարաններում քննվել է 275 կոռուպցիոն հանցագործությունների հետ կապված քրեական գործեր, իսկ դատախազությունը 2228 քրեական գործի միջդատական վարույթի օրիանականության նկատմամաբ իրականացնում է դատախազական հսկողություն:

Արդարադատության նախարարի ներկայացմամբ՝ կոռոպցիոն հանցագործությունների քննությունը դատական համկարգում մոտավորապես 30 տոկոսի աճի միտում ունի և մասնագիտացման, այդ աշխատանքների տարանջատման անհրաժեշտությունն այդ թվերից է բխում:

Նրա խոսքով՝ փոփոխությունների արդյունքում հրապարակվելու են նաև դատարանների նստավայրերը և հերթապահող դատավորների ժամանակացույցը :

Բադասյանը հայտնեց, որ ներդրվելու է գործող դատավորներից և նոր թեկնածուներից դատավորների թափուր հաստիքների համալրման կրճատ ընթացակարգ՝ ներառյալ բարեվարքության ստուգումներով և Արդարադատության ակադեմիայում ուսումն առավել սեղմ ժամկետներում անցկացնելով:

Ըստ նախարարի, նախատեսել են նաև գործող դատավորների վարույթներում գտնվող գործերի վերաբաշխման կանոններ՝ միջդատական քրեական վարույթի գործեր և կոռուպցիոն հանցագործությունների գործեր քննող դատավոր նշանակելու դեպքում: