Ձեր վստահելի աղբյուրը

«Օրակարգում դրված է պահուստային ֆոնդից հատկացման ավելի մեծ գումար, քան առաջին եռամսյակում ընդհանրապես պահուստային ֆոնդ կա նախատեսված»,-կառավարության այսօրվա նիստում օրակարգային 42 չզեկուցվող հարցերի քվեարկության ժամանակ հայտարարեց Ֆինանսների նախարար Ատոմ Ջանջուղազյանը՝ անդրադառնալով Առողջապահության նախարարությանը 2.5 մլրդ դրամ հատկացնելու նախագծին:

Ջանջուղազյանը նկատեց, որ նախագիծն այդ տեսքով ընդունելու դեպքում գործնականում հնարավոր չի լինի այն իրականացնել, իսկ հարցը  քննարկվել է նախարարական կոմիտեի նիստում և առաջարկություններ են արվել:

«Կոմիտեի նիստում առաջարկվել է լուծում, հակառակ դեպքում գործնական կիրառման տեսակետից այն կդառնա անհնար»,- շեշտեց ֆինանսների նախարարը:

Փոխվարչապետ Տիգրան Ավինյանը հայտնեց, որ կքննարկեն և կտեսնեն, թե ինչպես են ձևակերպում:

Նիկոլ Փաշինյանը նկատեց, որ Ատոմ Ջանջուղազյանն առաջարկում է վերաբաշխման միջոցով հատկացնել 2.5 մլրդ դրամը, ոչ թե պահուստային ֆոնդից:

Առողջապահության նախարար Արսեն Թորոսյանն էլ հայտարարեց, որ այն ընդունելի չէ և առաջարկեց  հարցը բաց քննարկել:

Նիկոլ Փաշինյանը չցանկացավ բաց քննարկել և առաջարկեց մինչև ստորագրելը խմբագրական բնույթի փոփոխություններ անել: Կառավարությունն այդ տեսքով  ընդունեց չզեկուցվող հարցերի փաթեթը՝ ներառյալ Առողջապահությանը հատկացվելիք գումարի նախագիծը:

Մինչ այդ, նիստի մեկնարկին Նիկոլ Փաշինյանը հաջողություն մաղթեց իրենց, որպեսզի  պարտականությունները կարողանան պատշաճ մակարդակով կատարել: