Ձեր վստահելի աղբյուրը

Լեռնային Ղարաբաղում ՌԴ ՊՆ նյութատեխնիկական մասնագետները Ստեփանակերտում, Գետավան և Քարաքենդ բնակավայրերում կառուցել են երեք բլոկ-մոդուլային քաղաքներ, որոնցում արդեն տեղակայված են խաղաղապահ զորախմբի շուրջ 400 զինծառայողներ: Ներկայումս ընթանում է տեղամասերի նախապատրաստում ևս 5 քաղաքներ կառուցելու համար, որոնց ընդհանուր հզորությունը կազմում է ավելի քան 540 մարդ: Այս մասին տեղեկանում ենք ՌԴ ՊՆ մամուլի ծառայությունից։

Դիտորդական կետերում ծառայության կազմակերպումն ապահովելու համար ստեղծվել են առօրյա կարիքների բավարարման, խաղաղապահ ստորաբաժանումների անձնակազմի ֆիզիկական պատրաստվածության, հանգիստի և կենցաղային ապահովման  պայմաններ:

«Բլոկ-մոդուլային քաղաքները լիարժեք ինքնավար օբյեկտներ են, որոնք հագեցած են կյանքի ապահովման համակարգերի բոլոր անհրաժեշտ բաղադրիչներով (էլեկտրամատակարարում, ջեռուցում, սանհանգույցներ, ջրամատակարարում, կոյուղի): Դրանք նաև պահովված են կահույքով (մահճակալ, զգեստապահարան, խոհանոցային հավաքածու, սեղաններ, աթոռներ, ցնցուղ), ինչպես նաև կենցաղային տեխնիկայով (էլեկտրական վառարան, սառնարան, լվացքի մեքենա, միկրոալիքային վառարան, հեռուստացույց, օդորակիչ, կաթսա): Այս ամենը թույլ է տալիս զինվորականներին՝ իրենց զգալ ինչպես տանը»,- ասված է ՌԴ ՊՆ տարածած հաղորդագրությունում։