Ձեր վստահելի աղբյուրը

Փոխվարչապետ Մհեր Գրիգորյանը, ֆինանսների նախարար Ատոմ Ջանջուղազյանը, և աշխատանքի և սոցիալական հարցերի նախարար Մեսրոպ Առաքելյանը կառավարության այսօրվա նիստում դեմ քվեարկեցին կառավարության 2020 թվականի մայիսի 21-ի N 771-Լ որոշմամբ հաստատված տնտեսական երկարաժամկետ զարգացմանն ուղղված առաջին ծրագրի հավելվածում փոփոխություններ կատարելու նախագծին:

Հարցը զեկուցող ՀՀ  էկոնոմիկայի նախարար Վահան Քերոբյանը հայտնեց, որ ինքը որպես գործարար առնչվել է քննարկվող խնդրի հետ: 

Նրա խոսքով՝ նախկինում պետական աջակցման ֆոնդից ներդրման իրականացման դեպքում առնվազն նույն չափով ներդրում էր պահանջվում նաև մասնավոր ներդրողից:

«Նոր մեկնարկող ծրագրերի դեպքում մասնավոր ներդրումը պետք է իրականացվեր դրամական միջոցներով ֆոնդի և մասնավոր ներդրողի ներդրումների արդյունքում: Կազմակերպության սեփական կապիտալը պետք է ավելանար ներդրումների հանրագումարի չափով այն դեպքում, երբ  ֆոնդի կողմից ներդրումը իրականացվում էր արդեն մեկնարկած ներդրումային ծրագրում: Այդ պայմանը համարվում էր բավարարված, եթե ֆոնդի կողմից ներդրման իրականացման պահին կազմակերպության զուտ ակտիվների արժեքը գերազանցում էր ֆոնդի ներդրման ընդհանուր արժեքը»,- հայտնեց էկոնոմիկայի նախարարը:

Քերոբյանը պարզաբանեց, որ գործող կարգով ֆոնդի և մասնավոր ներդրողի կողմից ներդրման իրականացման դեպքում կազմակերպությունը պետք է ստանա առնվազն այդ ներդրումների հանրագումարի չափով վարկային միջոցներ:

Էկոնոմիկայի նախարարի խոսքով՝ այդ պահանջները խիստ սահմանափակում էին ներդրումային ֆոնդի պոտենցիալ շահառուների շրջանակը, այդ պատճառով էլ նախագծով առաջարկում են դրանք հանել:

Որոշման փոփոխությունը, ըստ Քերոբյանի, թույլ կտա ընկերություններին, որոնք հիմնականում արդեն սպառել են մյուս բոլոր միջոցները, իրենց կապիտալը նաև պետական օժանդակությամբ համալրելու հնարավորություն ստանալ:

Փոխվարչապետ Ավինյանն էլ հավելեց, որ առաջարկվող մեղմացումներով փաստացի ներդրումային հիմնադրամը կարող է ներդրվել գործող քիչ թե շատ առողջ ընկերություններում, որոնք համավարակի, պատերազմի բերմամբ ունեն ֆինանսական խնդիրներ, բայց պոտենցիալ ունեցող ընկերություններ են:

Փոխվարչապետ Մհեր Գրիգորյանը, նախարարներ Ատոմ Ջանջուղազյանը և Մեսրոպ Առաքելյանը բարձրացրեցին պետական օժանդակություն տրամադրելու համար ընկերությունների ընտրության չափանիշների անկատարության հարցը և սխալ համարեցին ֆինանսավորման համար եղած պայմանների՝ մասնավորապես բանկերից ֆինանսավորվող ընկերությունների վարկի ստացած լինելու դրույթի հանելը:

«Բանկը մասնավոր կառույց է, նայում, քննարկում ու ասում է՝ ես քեզ վարկ չեմ տալիս: Դիմողը հարցնում է՝ ինչու, պատասխանում է՝ աչքերիդ գույնը դուրս չի գալիս»,- պաշտպանելով Էկոնոմիկայի նախարարի ներկայացրած նախագիծը՝ բանկերի կողմից մասնավոր ընկերություններին վարկեր հատկացնելու գործընթացը պատկերավոր ներկայացրեց Նիկոլ Փաշինյանը:

Հարցը 45 րոպե քննարկելուց հետո դրվեց քվեարկության և երեք դեմ ձայներով ընդունվեց: