Ձեր վստահելի աղբյուրը

Հունվարի 13-ին 111 տարեկան դարձած ավստրալացին ներկայացրել է իր երկարակեցության գաղտնիքները, գրում է news.ru-ն։

Քվինսլենդի Ռոմա քաղաքի ծերանոցում ապրող Դեքսթեր Կրյուգերի խոսքով, ընդամենը պետք է շարունակել շնչել և ուտել օրական երեք անգամ, և այդ դեպքում ժամանակն ինքն իրեն կանցնի: Նա նաև նշել է, որ օրական տասը հատ ծովախեցգետին է ուտում:

«Կարծում եմ ՝ դրանք շատ օգտակար են: Եվ երեկոյան ընթրիքի ժամանակ ես հաճախ սարդինա (պահածոյացված ձուկ) եմ օգտագործում ապուրի համար», - ասալ է նա։

Ավստրալացին շեշտել է, որ իր կյանքում լավ դեպքերը գերակշռում են, չնայած կյանքի ընթացքում սթրեսները, դեպրեսիաներն ու լճացման պահերը քիչ չեն եղել:

Կրյուգերը նաև վստահություն է հայտնել, որ կորոնավիրուսային համաճարակը նահանջելու է:

«Երբ ես բիզնես ունեի և աշխատում էի խոշոր եղջերավոր անասունների հետ, մենք պատվաստանյութերի հետ կապված շատ լուրջ խնդիրներ ենք լուծել: Եվ կորոնավիրուսի դեպքում ևս այդպես կլինի»,- նշել է նա:

111-ամյա տղամարդը հավելել է, որ պատկառելի տարիքը չպետք է պատճառ դառնա, որ մարդիկ հրաժարվեն իրենց նպատակներից։

Այսպիսով, նա ամբողջ կյանքում աշխատել է հողի հետ, իսկ ահա 86 տարեկան հասակում՝ կնոջ մահից հետո, սկսել է գրքեր գրել: Այս ընթացքում նա գրել է ավելի քան 300 պատմվածք և տպագրել է 12 գիրք, որոնցից վերջինը ներկայացվել է իր 109-ամյակին: