Ձեր վստահելի աղբյուրը

«Մինչև հունվարի 11-ին հասնելը, նոյեմբերի 10-ից հետո մենք պնդում ենք, որ հիմնական բանակցողը պետք է փոխվի։ Այսինքն՝ բանակցող Նիկոլ Փաշինյանը պետք է փոխվի, նոր մարդ պետք է գնար բանակցելու»,- հայտարարել է «Լուսավոր Հայաստան» խմբակցության ղեկավար Էդմոն Մարուքյանը Հանրային հեռուստաընկերությանը տված հարցազրույցում՝ ցավ հայտնելով, որ այդ փոփոխությունը տեղի չի ունեցել։

Նրա խոսքով, այս պարագայում իրենց քաղաքական ուժի մտահոգությունն այն էր, որ ապագայում հայանպաստ որոշումներ չի ստացվելու կայացնել Ալիևի հետ բանակցություններում։

Ընդդիմադիր խորհրդարանական ուժի ղեկավարը նշում է՝ պատերազմում Հայաստանը պարտվել է, արժանապատիվ կերպով իրականացրել է նոյեմբերի 9-ի հայտարարության բոլոր կետերը, սակայն Ադրբեջանը չի կատարել 8-րդ կետը, որը վերաբերում է գերիների վերադարձին։

«Մոսկվայում Փաշինյանը պետք է ասեր, մենք բան ենք պայմանավորվել, մենք մեր պայմանավորվածությունները կատարել ենք, դուք չեք կատարել։ Հետևրաբար, ես այս փաստաթուղթը չեմ ստորագրում, հիմա հետ եմ գնում նստեմ ինքնաթիռը, վերադառնամ Հայաստան։ Երբ վերադարձնեք ռազմագերիներին, ես երկրորդ հայտարարությունը կստորագրեմ։ Տեսեք, Փաշինյանը շատ համառ մարդ է։ Այն համառությամբ, որ նա մինչև վերջ երկու քվեարկություն անցավ, որ դառնա վարչապետ, եթե այդ համառության կեսը ներդներ այնտեղ, չէր ստորագրի այդ փաստաթուղթը։ Չի կարողացել ներդնի։ Ինչո՞ւ։ Որովհետև ինքը նոյեմբերի 9-ի փաստաթուղթը ստորագրողն է»,- ասաց նա։

Մարուքյանի խոսքով, Փաշինյանը պարտության սիմվոլն է, իր մոտ ոչինչ չի ստացվելու։

«Այն պայմաններում, երբ մենք Ադրբեջանի բանտերում ունենք ռազմագերիներ, երբ Ալիևը գալիս է Շուշի, պղծել է Ղազանչեցոց վանքը, Հայաստանում մարդիկ են ուրախացել, որ մենք ունենալու ենք երկաթգիծ, որ Ադրբեջանով գնալու է Ռուսաստան։ Հիմա ես հարց եմ տալիս, եթե մի երկիր մեր ռազմագերիներին չի վերադարձնում, էդ ի՞նչ երկաթգիծ ենք անցկացնելու այդ երկրի միջով, որը մեր ժողովրդի համար լինելու է անվտանգ»,- ասաց նա։