Ձեր վստահելի աղբյուրը

«Ինձ մոտ տպավորություն է, որ մենք ապրում ենք երկու զուգահեռ իրականություններում. կա մի իրականություն, որտեղ Նիկոլ Փաշինյանը պետք է հեռանա, որպեսզի մենք կարողանանք փրկել Հայաստանը, և կա երկրորդ իրականությունը, որտեղ իշխանությունը փորձում է կեղծ օրակարգերով շեղել հանրության ուշադրությունը»,- խորհրդարանում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը։

Նրա խոսքով, այսօր Հայաստանն ունի ռազմագերիների խնդիր, և Նիկոլ Փաշինյանը հայտարարել էր, թե գնում է Մոսկվա հենց այդ խնդիրը լուծելու համար։ Բայց, ըստ պատգամավորի, Փաշինյանը գնաց և հերթական անգամ գլուխ խոնարհեց Ալիևի առաջ և Սյունիքով թուրքերին ճանապարհ տվեց։

«Ալիևը հայտարարեց, որ իրենք գոհ են բանակցություններից և դրանց արդյունքից։ Մինչդեռ Նիկոլ Փաշինյանը գնաց Ալիևի հետ ճաշեց ու վերադարձավ, իսկ հայ ռազմագերիների ծնողները մնացին իրենց խնդրի հետ։ Հիմա ԱԺ-ում բերվել և քննարկվում է ինչ-որ կեղծ օրակարգ։ Այստեղ պետք է քննարկվի միայն մեկ օրակարգ. այդ մարդը (Ն. Փաշինյան, խմբ.) այլևս ի վիճակի չէ ադեկվատ բանակցություններ վարելու։ Մենք ունենք Հայաստանի պետականությանը սպառնացող լրջագույն խնդիրներ։ Չի կարող Ադրբեջանի ֆոլկլյորի գլխավոր հերոսը արժանապատիվ կերպով բանակցել և խնդիրներ լուծել»,- նշեց պատգամավորը։

Ըստ Նարիա Զոհրաբյանի,  պարտության թիվ մեկ խորհրդանիշը չի կարող շարունակել տարբեր մաիպուլյացիաներով ու լծակներով պահել իր իշխանությունը։

«Սիրելի գործընկերներ, պետք է բռնել այդ մարդու ձեռքը և նրան ասել, որ ինքը պետք է հեռանա, որպեսզի մենք կարողանանք խնդիրները լուծել։ Բայց հիմա դրա փոխարեն դուք հանրությանը փորձում եք կերակրել ադրբեջանցիների և թուրքերի հետ առևտուր անելու մտքերով։ Դե հիմա գնացեք ու ռազմագերու ծնողին ասեք՝ ոչինչ, որ քո որդին այնտեղ է, մենք կգնանք, ադրբեջանցու հետ առևտուր կանենք, ու դուք լավ կապրեք»,- եզրափակեց խոսքը պատգամավորը։