Ձեր վստահելի աղբյուրը

«Ինչպե՞ս կարելի է կազմակերպել արտահերթ խորհրդարանական ընտրություններ, երբ ադրբեջանական բանտերում մեր քույրերն ու եղբայրներն են»,- խորհրդարանում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Նրա խոսքով, ինքը չի հասկանում՝ ինչպե՞ս կարելի է գնալ նրանց տներ և  նախընտրական բուկլետներ տալ։

«Չեմ պատկերացնում արտահերթ խորհրդարանական ընտրություններ այն իրավիճակում, երբ մեր հերոս նահատակների ճանաչման գործընթացն է գնում և նրանց հարազատները սպասում են արդյունքների։ Ինչպե՞ս եք գնալու նրանց բակերում բարձրախոսներով խոսելու»,- նշեց Էդմոն Մարուքյանը։

Ըստ ԼՀԿ ղեկավարի, սակայն, իրենք պատրաստ են արտահերթ խորհրդարանական ընտրությունների, բայց դրանք պետք է կազմակերպվեն՝ ըստ սահմանված ընթացակարգի։

«Չեմ պատկերացնում՝ հիմա ինչպես է հնարավոր կազմակերպել արտահերթ խորհրդարանական ընտրություններ, բայց քանի որ իշխանությունը սպառնում է ընտրություններով, ես ուզում եմ ասել, որ մենք հիմա պատրաստ ենք։ Եվ կարծում եմ՝ դրա ընթացակարգը ոչ մեկը չի մոռացել։ Ընթացակարգը հետևյալն է՝ տալ հրաժարական, որից հետո երկու անգամ չի ընտրվում վարչապետը և խորհրդարանը ինքնալուծարվում է։

Այլ գործընթաց չկա, հարգելի գործընկերներ, հետևաբար՝ եթե ուզում եք կազմակերպել արտահերթ ընտրություններ, կազմակերպեք, ո՞վ է ձեր ձեռքը բռնել։ Մենք արդեն տեղամասային հանձնաժողովի անդամների դասընթացներ ենք սկսել կազմակերպել, վերանայում ենք, փոխում ենք, նորն ենք նշանակում, մեծ թափով պատրաստվում ենք։ Ցրեք խորհրդարանը և գնանք արտահերթ ընտրությունների։ Սպասում ենք այդ պրոցեսին»,- եզրափակեց խոսքը Էդմոն Մարուքյանը։