Ձեր վստահելի աղբյուրը

Խորհրդարանը քննարկում է Հակակոռուպցիոն կոմիտեի մասին և կից ներկայացված օրենքների նախագծերի փաթեթը, որով առաջարկվում է ստեղծել նոր՝ Հակակոռուպցիոն մարմին։

ՀՀ արդարադատության նախարար Ռուստամ Բադասյանի խոսքով, նախագծերի փաթեթով առաջարկվում է ստեղծել նոր քննչական մարմին՝ Հակակոռուպցիոն կոմիտե, որի հիմնական իրավասությունը լինելու է ՀՀ-ի Քրեական դատավարության օրենսգրքով իր ենթակայությանը վերապահված ենթադրյալ կոռուպցիոն հանցագործությունների միջդատական քրեական վարույթի կազմակերպումն ու իրականացումը:

«Միաժամանակ քրեական վարույթ նախաձեռնելու հարցի լուծման նպատակով Հակակոռուպցիոն կոմիտեն օպերատիվ հետախուզական գործունեության մասին օրենքով սահմանված կարգով իրականացնելու է օպերատիվ հետախուզական գործունեություն»,-ներկայացրեց Ռուստամ Բադասյանը:

Նա նշեց, որ կոմիտեի մասնագիտական կազմը համալրվելու է համապատասխան  մասնագիտական պատրաստում անցած կադրերի ներգրավման եղանակով:

«Կոռուպցիոն հանցագործությունների քննությամբ զբաղվող քննիչների հաստիքների և գործիքակազմի փոխանցումը չի կրելու մեխանիկական բնույթ: Հակակոռուպցիոն  կոմիտեի կազմում նշանակումները, այդ թվում ղեկավար կազմի, կատարվելու են բաց մրցույթի արդյունքում»,- ասաց Ռուստամ Բադասյանը։

Ըստ Ռուստամ Բադասյանի, կոմիտեի ծառայողների համար, ի տարբերություն այլ քննչական մարմինների ծառայողների, սահմանված են առավել խիստ պահանջեր և սահմանափակումներ, ուստի նախատեսված են գործունեության լրացուցիչ երաշխիքներ: