Ձեր վստահելի աղբյուրը

Իսրայելը հայտարարություն է տարածել ուղղված Անկարային, որում ասվում է, որ հարաբերությունների կարգավորում չի լինի, քանի դեռ Ստամբուլում չի փակվել «ՀԱՄԱՍ» իսլամիստական խմբավորման ռազմական թևի գրասենյակը։ Այս մասին գրում է Ahval News-ը։
Իսրայելն այս նախապայման է դրել՝ Անկարա իր դեսպանին վերադարձնելու համար։

Հիշեցնենք, որ երկու երկրներն էլ համապատասխանաբար դուրս են բերել իրենց դեսպաններին 2018 թ.-ին՝ իջեցնելով իրենց հարաբերությունները մինչև գործերի հավատարմատարների մակարդակ: Թուրքիայի կողմից ՀԱՄԱՍ-ի հովանավորչության հարցը արդեն տարիներ շարունակ գտնվում է Իսրայելի հետ նրա հարաբերություններում:

ՀԱՄԱՍ-ը գրասենյակ է հիմնել Ստամբուլում այն բանից հետո, երբ Սիրիայի քաղաքացիական պատերազմը ստիպեց նրան հրաժարվել Դամասկոսի իր գրասենյակներից մեկից: ՀԱՄԱՍ-ի հայտնի ռազմական ղեկավար Սալահ Ալ-Արոուրին, որը ղեկավարում էր Ստամբուլի գրասենյակը, վտարվել է քաղաքից՝ 2015-ին Թուրքիայի և Իսրայելի միջև հարաբերությունների կարգավորման ավելի վաղ փորձի շրջանակներում, սակայն ՀԱՄԱՍ-ին Թուրքիայի աջակցությունը չի վերացվել: Օգոստոսին Էրդողանը Ստամբուլում հյուրընկալեց ՀԱՄԱՍ-ի երկու առաջնորդների, ինչը Վաշինգտոնը դատապարտեց:

Իսրայելը, Միացյալ Նահանգները և եվրոպական մի շարք երկրներ ՀԱՄԱՍ-ը համարում են ահաբեկչական կազմակերպություն: Թուրքիան մերժում է սա ու պնդում է, որ խումբը օրինական քաղաքական դերակատար է: Թուրքիայից ՀԱՄԱՍ-ը մեղադրվում է Իսրայելի դեմ ռազմական գործողություններ նախապատրաստելու մեջ, այդ թվում ՝ կիբերհարձակումներ:
Նշենք, որ Թուրքիա-Իսրայել հարաբերությունները վերջին տասնամյակում բավական սրվել են։ Կողմերի միջև անհամաձայնությունները շարունակվում են Գազայի և Պաղեստինի հարցերում։
Երկու երկրների միջև հարաբերությունները սրվեցին 2010թ․-ին Մարմարա նավի հետ կապված միջադեպից հետո, երբ Գազա օգնություն տանող նավի վրա հարձակման արդյունքում սպանվեցին  10 թուրքեր, վիրավորվեցին 56-ը։

2018-ի մայիսին Անկարան հետ կանչեց իր դեսպանին Իսրայելից ու վտարեց Անկարայում Իսրայելի դեսպանին՝ Գազայի հատվածում պաղեստինցիների դեմ մահացու հարձակումների պատճառով, որոնք բողոքում էին ԱՄՆ նախագահ Դոնալդ Թրամփի՝ ԱՄՆ դեսպանատունը Թել Ավիվից Երուսաղեմ տեղափոխելու որոշման դեմ: Հարձակման արդյունքում սպանվել էր մոտ 60 մարդ, վիրավորվել՝ ավելի քան 2000-ը։

Էրդողանն ու Նեթանյահուն միմյանց հասցեին մեղադրանքներ հնչեցրեցին, Էրդողանը Նեթանյահուին անվանեց «ռասիստ», Նեթանյահուն՝ Էրդողանին՝ «բռնապետ»։ Նեթանյահու-Էրդողան պատերազմին  միացավ նաև Նեթանյահուի որդին՝ հիշելով հայերի ցեղասպանությունը։
Էրդողանը վերջերս հայտարարեց, որ Երուսաղեմը թուրքական քաղաք է, իսկ Յաիր Նեթանյահուն էլ Էրդողանին հիշեցրել էր, որ Ստամբուլը Կոնստանդնուպոլիս կոչված քաղաքն է, Բյուզանդական կայսրության մայրաքաղաքն ու ուղղափառ քրիստոնեաների կենտրոնը ավելի քան 1000 տարի՝ մինչև թուրքական օկուպացիան։

Վերջին շրջանում թուրքական ԶԼՄ-ները խոսում են հաշտեցման մասին, որին Իսրայելը թերահավատորեն է մոտենում։

Թուրքական ԶԼՄ-ներն անհանգստացած են նաև ԱՄՆ նորընտիր նախագահ Ջո Բայդենի կողմից Ազգային անվտանգության խորհրդի Մերձավոր Արևելքի հարցերով հանձնակատարի պաշտոնում Թուրքիայի կառավարության խիստ քննադատ Բրեթ ՄքՔուրքի առաջադրմամբ։ Թուրքիայում կարծում են, որ ՄքՔուրքի նշանակումը կարող է լինել ԱՄՆ-ի «ընկերներին» սպառնալու ԱՄՆ քաղաքականության վերադարձ՝ նշելով նաև, որ Բայդենն արդեն «քննադատաբար էր վերաբերվում Թուրքիային՝ կապված Հայաստանի հետ վերջին հակամարտության մեջ Ադրբեջանին սատարելու հետ»: