Ձեր վստահելի աղբյուրը

«Ես մինչև վերջ մարտնչել եմ։ Մնացած հարթություններում, բարձրություններում թե ինչ է եղել, թող պատասխանեն պատկան մարմինները»,-լրագրողների հետ զրույցում հայտարարեց պաշտպանության նախկին նախարար Սեյրան Օհանյանը, ով արցախյան վերջին պատերազմում մասնակցում էր Շուշիի պաշտպանության գործողությանը։

Հարցին, թե Օհանյանի կարծիքով, ինչո՞ւ Մոսկվայում Նիկոլ Փաշինյանը չկարողացավ լուծել հայ ռազմագերիներին վերադարձնելու հարցը, նա պատասխանեց.«Գիտե՞ք այդ հարցի պատասխանը պետք է տան հենց իշխանությունները։ Ողջ պատերազմի ընթացքում «Հաղթելու ենք» կարգախոսի ներքո վարած քաղաքականության արդյունքւոմ մենք պարտություն կրեցինք, այսօր էլ նրանք «Լռում ենք» կարգախոսի ներքո։ Իշխանությունը այդ հարցերի պատասխանները պետք է տա ժողովրդին»:

Ռազմական գործիչն ընդգծեց՝  ամենակարևոր խնդիրները   մոսկովյան այցի ընթացքում եղել է ռազմագերիների վերադարձը, ինքն էլ այդ հարցի մասին  ֆեյսբուքյան գրառմամբ  նաև մի քանի հարց էր ուղղել նաև դատախազությանը։

«Այս հարցում Ադրբեջանը, պետք է պնդեմ, նաև ռուս-թուրքական տանդեմն իրենց ազդեցությունն են շարունակում գործել Հայաստանի իշխանությունների վրա։ Մենք դրա համար ասում ենք Հայաստանի իշխանությունները պետք է փոխվեն։ Ես ուրախությամբ չէ, որ ասում եմ, մենք պարտվել ենք, որ այս իշխանությունները պետք է փոխվեն։ Պարզապես մեզ նոր, ավելի համարձակ, ավելի լավ բանակցող իշխանություններ են պետք, որպեսզի կարողանանք այս իրավիճակից դուրս գալ, մեր արժանապատվությունը վերականգնել։ Հակառակ դեպքում հունվարի 11-ի շարունակություն է լինելու։  Ճանապարհների շրջափակման դեպքում այս իրականության մեջ՝ ռազմական հաղթանակի պարագայում թուրք-ադրբեջանական տանդեմն ընդլայնելու է և տնտեսական, թե ժողովրդագրական հարձակումը մեր վրա»,-ասաց Օհանյանը։

Կարսում անցկացվելիք զորավարժություններն էլ Օհանյանը համարում է հոգեբանական ճնշում Հայաստանի, ինչպես նաև տարածաշրջանի մյուս երկրների վրա վրա։

«Գիտե՞ք, այս իրավիճակում, ձախողումները, մեր հետնահանջը շարունակվելու է»,-նշեց նա։

Հիշեցնենք, որ ընդհանուր իրավասության դատարանում  նախագահությամբ դատավոր Աննա Դանիբեկյանի սկսվել է  սահմանադրական կարգի ենթադրյալ տապալման գործով քննությունը։

Գործով անցնում են ՀՀ երկրորդ նախագահ Ռոբերտ Քոչարյանը, պաշտպանության նախկին նախարար Սեյրան Օհանյանը, ՊՆ ԶՈՒ Գլխավոր շտաբի նախկին պետ Յուրի Խաչատուրովը և նախագահի աշխատակազմի նախկին ղեկավար Արմեն Գևորգյանը։