Ձեր վստահելի աղբյուրը

Երևանի ընդհանուր իրավասության դատարանը քաղաքագետ Ստեփան Գրիգորյանին պարտավորեցրել է 1 ամսվա ընթացքում հերքել 2018 թ. հուլիսի 30-ին «Ա1+»-ին տված իր հարցազրույցում ՀԱՊԿ նախկին գլխավոր քարտուղար, ՀՀ Զինված ուժերի Գլխավոր շտաբի նախկին պետ Յուրի Խաչատուրովի վերաբերյալ հնչեցրած արտահայտությունները։

Ասուլիսում Յուրի Խաչատուրովի պաշտպան Անահիտ Սարգսյանը հիշեցրեց, թե կոնկրետ ինչ հայտարարություններ է արել Ստեփան Գրիգորյանը. «Նա այնպիս հայտարարություններ էր արել Յուրի Խաչատուրովի վերաբերյալ, որոնք իրենց մեջ պարունակում էին քրեական օրենսգրքով նախատեսված դավաճանություն հանցակազմի տարրեր:

Մասնավորապես, նա հայտարարել էր, Ապրիլյան պատերազմի ժամանակ այդ հողերը ոչ թե թշնամին գրավել է, խոսքը 400 կամ 800 հեկտար տարածքի մասին է, այլ վաճառվել է, առաջարկում էր ստուգել Խաչատուրովի և հարազատների հաշիվները:

Միաժամանակ նա հայտնում էր, որ պատերազմի ժամանակ Խաչատուրովը տեղում չի եղել, կար բիլիարդի պատմությունը, իբր բիլիարդ խաղալուց է եղել:

Նաև հայտարարել էր, թե  մենք կարող էինք հետ վերցնել այդ հողերը, հնարավորություն ուներ մեր բանակը,  բայց Խաչատուրովը չի թողել՝ հիմնավորելով այն հանգամանքով, որ վաճառված էր»:

Պաշտպանի խոսքով, հայտարարություններից հետո դիմել են դատարան, հայցը պատվին և արժանապատվությանը պատճառված վնասի հատուցման և հերքման պարտավորեցնելու պահանջի մասին էր։ Դատավարությունը տվել է 2,5 տարի, վճիռը հրապարակվել է հունվարի 14-ին: Ա. Սարգսյանի փոխանցմամբ, դատարանը վճռել է, որ զրպարտություն է, պարտավորեցրել է Գրիգորյանին հերքել իր կողմից հրապարակված այդ տվյալները, տեղեկությունները նույն ընթացակարգով, այսինքն Ա1+-ով, ասել, որ սուտ եմ ասել, ստել եմ, նման բան չկա:

Նա նշեց, որ Ս. Գրիգորյանն անձամբ երբեք չի ներկայացրել դատարան, միայն փաստաբաններն էին գալիս, իսկ ներկայացրած հիմնավորումներն անհիմն էին:

«Դատարանում ներկայացրել են  բազմաթիվ փաստաթղթեր, իբր հիմնավորումներ, որոնցից որևէ մեկն առնչություն չունեին այդ հայտարարություններին, մի փոքրիկ անգամ չհիմնավորվեց:
Առանց որևէ փաստացի տվյալի ասում էին՝ կարող էինք ենթադրել, որ այդպես է: Դատարանը, բնականաբար, հիմնավորեց, որ դա զրպարտություն է»,- ասաց փաստաբանը:

Ա. Սարգսյանի խոսքով, դատարանը բավարարել է հերքման պահանջը,  2 միլիոն դրամի գումարային պահանջ էլ ունեին, սակայն մերժվել է, միայն 300 հազար դրամ գումար է հիմնավորել որպես փաստաբանի ծախս: Նրա կարծիքով, գումարային պահանջի մասով կբողոքարկեն վճիռը:

«Ոչ թե Խաչատուրովին անհրաժեշտ է այդ գումարը, ուղղակի գումարը կանխարգելիչ ազդեցություն է ունենում»,- շեշտեց փաստաբանը:

Նա նաև նշեց, որ դատարան դիմելու հիմնական նպատակն էր ոչ այնքան Խաչատուրովի պատիվն ու արժանապատվությունը պաշտպանել, այլ ընդհանուր այդ միտումը հերքելու խնդիր կար:

«2016 թվականի Ապրիլյան պատերազմից հետո  լուրեր էին շրջանառվում, որ իշխանությունները հողերը վաճառել էին: 2018 թվականի ապրիլյան իրադարձություններից հետ այդ խոսակցություններն ավելի ակտիվացան, ստեղծվեց անպատասխանատվության մթնոլորտ, ով ինչ ուզում, ասում էր նախկինների վերաբերյալ: Թվում էր՝ պատասխանատվության չէին  ենթարկվի: Այո, Խաչատուրովին վարկաբեկելու միտում կար, ով նաև ՀԱՊԿ գլխավոր քարտուղարն էր: Նաև հայկական բանակը վարկաբեկելու, թուլացնելու խնդիր կար՝  ասելով, որ գեներալները վաճառել են, թույլ չեն տվել հետ բերել հողերը:  Այսինքն՝ վարկաբեկելով բանակն ու գեներալիտետին, խնդրահարույց էին դարձնում, կասկածի տակ էին դնում երկրի անվտանգությունը»,- ասաց Յուրի Խաչատուրովի պաշտպան Անահիտ Սարգսյանը: