Ձեր վստահելի աղբյուրը

Արտաշատում ժամանակավորապես բնակություն հաստատած Շուշիի քաղաքապետ Արծվիկ Սարգսյանն այս պահին ընտանիքի անդամների հետ պատրաստվում է գնալ Եռաբլուր զինվորական պանթեոն՝ շնորհավորելու այնտեղ հարազատ ու չնաշխարհիկ հայրենի քաղաքի պաշտպանության մարտերում ընկած եղբոր՝ Անդրանիկ Սարգսյանի ծնունդը։

Չգիտի՝ ի՞նչ պատմի եղբորը։ ԱԺ-ում իր քաղաքի մասին երեկ Փաշինյանի հնչեցրած հայտարարությունները վրդովեցրել են յոթ տարի Շուշին ղեկավարած գործչին։

«Եղբայրս զոհվեց նոյեմբերի 4-ին Շուշիում։ Այսօր պետք է դառնար 55 տարեկան։ Ինչի՞ համար է զոհվել, որ այսօր Նիկոլ Փաշինյանը նման հայտարարություն անի՞։ Բա եղբայրս իր երազին չի՞ գնա, դրան խեղդի, ասի՝ ինչի՞ ես նման զրույցներ անում։ Ո՞վ չի իմանում, որ ադրբեջանցիները շատ են եղել Շուշիում, որովհետև բռնի տեղահանել են հայերին»,-Panorama.am-ին ասում  է Արծվիկ Սարգսյանը։

Հիշեցնենք, երեկ ԲՀԿ-ական Նաիրա Զոհրաբյանի հարցին պատասխանելիս Նիկոլ Փաշինյանը հայտարարեց. «Շուշին հակամարտությունից և ազատագրումից առաջ ունեցել է 90 և ավելի տոկոս ադրբեջանական բնակչություն։ Այսինքն, դուք ուզում եք ասել, որ 90 և ավելի տոկոս ադրբեջանական բնակչություն ունեցող Շուշին հայկակա՞ն է իր այդ կարգավիճակով»։

Փաշինյանի՝ այս ու սրան նախորդող  հայտարարությունները Շուշիի մասին քաղաքապետին եզրակացություններ անելու հիմքեր են տալիս։

«Ես ամեն օր գալիս եմ այն համոզման, որ Շուշիի հանձնումը կազմակերպված է եղել։ Ուղղակի մեզ նման միամիտները  չեն իմացել այդքանը։ Երբ Փաշինյանի կինը ասել էր, եղել են զոհեր հանուն ոչնչի, հիմա եմ հասկանում, որ Շուշին ծախած է եղել, մեր տղաներն անիմաստ գնացել են կռվի։ Փաշինյանն իրեն պաշտողներին, իրեն հավատացողների շրջանում այդ հայտարարություններով տարածում է, որ իբր ըտենց էլ պետք է լիներ։ Չէէէ։ Երբ որ էդ մարդիկ Շուշիում ոսկոր ջարդած լինեին, Շուշիում ծնված լինեին, Շուշիի օդը շնչած լինեին, Շուշիում կռված լինեին... նման բան չէին ասի։ Հազար ու մի արկ է պայթել գլխիս վերևում, երբ իրենց հարազատը, որդին, եղբայրը Շուշիում զոհված լինեին, նման հայտարարություն չէին անի»,-ցավով նշում է Սարգսյանը։

Ի գիտություն թշնամու ու Շուշիի պատմությանն անտեղյակ հայաստանցու՝ Արծվիկ Սարգսյանը  ընդգծում է,  Շուշին բուն հայկական քաղաք է, որի մասին վկայում են հայկական 11 եկեղեցիները,  մշակութային կենտրոնները։

«Թող վերցնեն պատմություն կարդան։ «Գաղտնիք Ղարաբաղի» գիրք կա, թող վերցնեն կարդան, վերջերս է վերահրատարակվել։ Շատ հոյակապե գիրք է, գրած է ամեն ինչ, պատմական փաստեր են»,-նշում է Panorama.am-ի զրուցակիցը՝ ընդգծելով, որ ազգն ընկճված է, ղեկավարի  ելույթներն էլ պետք է լինեն դուխով, որ ձեռքներս բռունցք դարձրած պահենք Ալիևի գլխին։

«Այսօր մեր ազգին դուխ պետք է տրվի, ոչ թե գլխարկի վրա գրեն դուխով, այլ իսկականից դրա կարիքը կա։ Ես երբ ելույթ էի ունենում Շուշիում, միշտ պատասխանում  էի Ալիևի ելույթներին։ Էսօր էլ եմ ասում, պետք  է հզորանանք, որ վերցնենք Շուշին, Քարին Տակը, Ավետարանոցը, Սղնախը, որտեղ ընդհանրապես ադրբեջանցու ոտք չի եղել։ Բայց էսօր կարող է հայտարարեն, ասեն, Քարին Տակն էլ էր ադրբեջանական, բա հո չի՞ ասելու, որ հունվարի 26-ին Քարին տակում հերոսամարտ է եղել, 12 ժամ մարտ է եղել, ոչ մի թիզ չեն զիջել։ Հեսա հունվարի 26-ին այդ հերոսամարտի տարեդարձն է, որտե՞ղ պետք է հավաքվենք, ո՞նց հիշենք։ Չնայած ես նպատակ ունեմ Եռաբլուրում հավաքվենք, մեր միջոցառումն անենք, որ մեր ապագա սերունդը չմոռանա հերոսամարտի մասին»,-նշում է Սարգսյանը։

Նա Փաշինյանի ու նրա կնոջ հայտարարությունների պատճառը համարում է հայրենաճանաչության ու հայրենասիրության պակասի հետևանք։

Շուշեցիների հետ քաղաքապետն այսօր էլ կապն ամուր է պահում, իրենց հասանելիք օգնության մասին տեղյակ պահում, նրանց փաստաթղթերի կամ այլ խնդիրների հետ կապված հարցերում փորձում աջակցել։ Ամիսը մի քանի անգամ այդ հարցերով մեկնում է Ստեփանակերտ ու վերադառնում Արարատ։ Հայրենի քաղաքի մոտակայքում ադրբեջանցիների ներկայությունից ամեն անգամ վատանում է։ Առավել ծանր էին թշնամի երկրի ղեկավարի ու նրա ընտանիք անդամների այցելությունը Շուշի։

«Ավելի լավ էր մահանայի, քան էդ ամենը տեսնեի։ Ամեն անգամ Ստեփանակերտ գնալիս, հիմա էլ որ հիշում եմ եմ, մարմինս փշաքաղվում է, հենց հասնում եմ Քարին Տակի խաչմերուկ, ճնշումս բարձրանում է ու մի քանի օր չի իջնում։ Այ որ Փաշինյանը նման ապրումներ ունենար, նման հայտարարություն չէր անի։ Յոթ տարի ղեկավարել եմ Շուշին, 2000-2005 թվականներին պատգամավոր եմ եղել, հնարավորություն է եղել Ստեփանակերտում ապրել, ես հրաժարվել եմ, որովհետև Շուշին... Շուշին ուրիշ Շուշի է, ամառը՝ հով, ձմեռը՝ ձյուն, ախր ուրիշ է։ Իրենք էս ապրումները չեն ունենում, որովհետև իր կինը եկել էր Շուշի, պատմական գորգերը փռել, սելֆիներ արել... Դրանք էդպես գիտեն Շուշին։ Ես էդպես չգիտեմ Շուշին»,-ասում է Սարգսյանը։

Շուշին Ֆրանսիայի երեք քաղաքների հետ քույր է։ Շուշիի քաղաքապետը նկատում է՝ մինչ Հայաստանի ղեկավարը ադրբեջանցիների ջրաղացին ջուր է  լցնում իր հայտարարություններով, ֆրանսիացի կին քաղաքապետն իր համայնքում համառ պայքար է տանում ադրբեջանցիների դեմ, դիմադրում ու նաև հաղթանակներ արձանագրում։

«Բուրգ լե Վալանսը մի հոյակապ քաղաքապետուհի ունի։ Էն որ ասում են՝ իսկական դուխով, նա վարչապետից ավելի դուխով է, քանի որ ադրբեջանցիների հետ կռվում է, որ մեր դրոշը մնա, ադրբեջանցիները չհանեն։ Ադրբեջանցիները դատի են տվել՝ հայերի հետ բարեկամական կապեր հաստատելու համար, ինքն էլ նրանց դեմ է հայց ներկայացրել ու դատը շահել։  Հիմա 40 տոննա բեռ է ուղարկել, 40 տոննա էլ  դեկտեմբերին էր ուղարկել։ Ասում է՝ ես դեռ կգամ Շուշի»,-ներկայացնում է քաղաքապետը։

Նա հեռակա կարգով Փաշինյանին մի քանի հարցեր է հասցեագրում՝ բա ինչի՞ չի ասում, որ Գետաշենը, Շահումյանը հայաբնակ են եղել, բա ինչի՞ չի ասում, որ հայկական հուշակոթողները վնասել են, ավերել են։

«Մի անգամ որ հայտարարեց՝ Շուշին դժբախտ ու դժգույն քաղաք էր, իրեն պաշտողները Հայաստանում ինձ հարցնում էին՝ մեզ պե՞տք էր Շուշին։ Ես նրանց հարցնում էի՝ եղե՞լ եք Շուշիում։ Պատասխանում էին՝ չէ։  Ես էլ ասում էի՝ դե դրա համար եք նման բան ասում։ Նման հայտարարություններով երևի ուզում է մարդկանց տրամադրել՝ Շուշին հանձնել ենք, ոչինչ, Սյունիքն էլ կհանձնենք՝ էլի ոչինչ։ Բայց հիշեք, Շուշիում Լեոն  է ծնվել, Լեոնն է աշխատել, Մուրացանն է եղել, մեծեր կան, որ շուշեցի են»,-ընդգծում է Panorama.am-ի զրուցակիցը։