Նավալնիի ձերբակալության որոշումը բողոքարկվել է

Իրավունք 20:03 21/01/2021 Աշխարհում

Նավալնիի ձերբակալության որոշումը բողոքարկվել է

Պաշտպանական կողմը բողոքարկել է Ալեքսեյ Նավալնիի 30 օրվա կալանքի մասին որոշումը, հայտնում է «ՏԱՍՍ»-ը՝ վկայակոչլով վերջինիս պաշտպան Վադիմ Կոբզևի խոսքը։

«Մենք բողոք ենք ներկայացրել Խալկիի դատարանի կողմից Նավալնիի ձերբակալման դեմ։ Բողոքը կքննի Մոսկվայի շրջանային դատարանը: Կարանտինային միջոցառումների հետ կապված՝ մենք փոստով բողոք ենք ուղարկել՝ էլեկտրոնային ստորագրության ուղեկցությամբ։ Բողոքում պաշտպանական կողմը խնդրում է ազատել Նավալնիին և անօրինական հայտարարել նրա կալանքը»,- ասել է փաստաբանը։

Հիշեցնենք, որ հունվարի 17-ին ռուսաստանցի ընդդիմադիր գործիչ Ալեքսեյ Նավալնին ձերբակալվել է Մոսկվայի Շերեմետևո օդանավակայան ժամանելուն պես: Նավալնին ամիսներ շարունակ բուժվում էր Գերմանիայում թունավորման փորձից հետո, որում նա մեղադրում է Ռուսաստանի իշխանություններին:

Ոստիկանությունն անձնագրային հսկողություն անցնելուց հետո բերման է ենթարկել Կրեմլի 44-ամյա քննադատին: Նավալնիի փաստաբանին, որը ճանապարհորդում էր նրա հետ, թույլ չեն տվել ուղեկցել նրան: Ռուսաստանի քրեակատարողական դաշնային ծառայությունը հաստատել է նրա ձերբակալությունը:

Նշվում է, որ Նավալնին որոշել էր վերադառնալ Ռուսաստան, չնայած նրան, որ իշխանությունները հայտարարել էին նրան ձերբակալելու մասին: Ոստիկանությունը բերման է ենթարկել բազմաթիվ մարդկանց, ովքեր սպասում էին Նավալնիի Վնուկովո օդակայան ժամանելուն, սակայն վերջին պահին «Պոբեդա» ավիաընկերության թռիչքը ուղղորդվել է դեպի Շերեմետևո:

Հարակից հրապարակումներ`

Ոստիկանությունը բերման ենթարկեց Ալեքսեյ Նավալնիին օդանավակայանում

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: