Ձեր վստահելի աղբյուրը

«Չեմ կարծում, որ որևէ հիմնավորված պատճառաբանություն կա այդ հայտարարությունում, քանի որ գոնե մինչև հունվարի 11-ը գերիների հարցով մենք լռություն ենք պահպանել»,- այսօր խորհրդարանական ճեպազրույցի ընթացքում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով իշխանությունների հայտարարություններին, թե ընդդիմության կողմից գերիների հարցը բարձրաձայնելը հաճախ բացասական հետևանք է ունենում։

Նրա խոսքով,  ընդդիմությունը դադարեց լռել, երբ հունվարի 11-ի մոսկովյան այցին ընդառաջ Նիկոլ Փաշինյանը հայտարարեց, թե գնում է գերիների վերադարձի հարցը  լուծելու։

«Ես կարծում եմ, որ ոչ թե պետք է լռել, այլ պետք է աղաղակել, ողջ միջազգային հանրությունը կոնսոլիդացնել այս հարցի շուրջ և հասնել նրան, որ Ադրբեջանի վրա ճնշումներ մեծանան, սանկցիաներ կիրառվեն, որպեսզի Ադրբեջանը վերադարձնի հայ գերիներին։ Տեսեք, պատերազմից հետո մենք մեր պարտությունն ընդունելով ստորագրել ենք փաստաթուղթ, որի բոլոր կետերն իրացրել ենք։ Բայց այն կետը, որը վերաբերում է ռազմագերիներին Հայաստան վերադարձնելուն, չենք կարողանում իրացնել։ Սա ոչ մի ճշտի մեջ չի տեղավորվում»,- նշեց նա։

Ըստ պատգամավորի, հումանիտար իրավունքի տեսանկյունից Ադրբեջանը սխալ է, պատերազմի կանոններով սխալ է, հրադադարի կանոններով ևս սխալ է, և Հայաստանն այդ առումով չպետք է լռի։

«Կարծում եմ, որ Հայաստանի և Ռուսաստանի ջանքերին պետք է միանան նաև ԱՄՆ-ն ու Ֆրանսիան։ Եթե քաղաքակիրթ աշխարհը միավորվի այս հարցի շուրջ, ապա կարող է Ադրբեջանին ստիպել վերդարձնել բոլոր հայ գերիներին»,- նկատեց նա։

ԼՀԿ-ական պատգամավոր Արկադիր Խաչատրյանն էլ ասաց, որ գերիների հարցը զգայուն թեմա է, և այն նույնիսկ հոգեբանական մակարդակում պետք է դիտարկել։

«Կարծիք հայտնել և ասել, որ գերիների հարցը չի լուծվում, քանի որ ընդդիմությունն անընդհատ այդ հարցը բարձրացնում է..., եթե ընդդիմությունը չբարձրաձայնի, այդ հարցը կլուծվի՞։ Երեկ կառավարության ներկայացուցչի կողմից նաև անուղղակի հայտարարություն հնչեց, որ պայմանագրի իններորդ կետի իրագրոծումը կարող է դրական ազդել գերիների վերադարձի հարցի վրա։ Այսինքն՝ կառավարությունը հայտարարության ութերորդ կետի կատարումը կապում է նաև իններորդ կետի կատարման հետ, ուստի ես չեմ հասկանում, ինչու են ընդդիմությանը չլռելու համար մեղադրում։ Կարծում եմ, այդ փաստարկը տեղին չէ»,- ասաց Արկադի Խաչատրյանը։

Էդմոն Մարուքյանն էլ հավելեց, որ իրենք պատրաստվում են մեկնել Ստրասբուր և այնտեղ ակտիվ աշխատանք իրականացնել՝ գերիների վերադարձի հետ կապված։

«Ռազմագերիների խնդիրը ուզում ենք դարձնել հրատապ քննարկման հարց, և ամեն ինչ անելու ենք, ու ԵԽԽՎ-ի 45 պետություններ համախմբվեն այս պահանջի շուրջ»,- եզրափակեց խոսքը ԼՀԿ ղեկավարը։