Ձեր վստահելի աղբյուրը

«Փաշինյանի ելույթն ամբողջովին խեղաթյուրվել է և խեղաթյուրված է ներկայացվել և՛ մամուլում, և՛ տարբեր ընդդիմադիր քաղաքական գործիչների խոսքում»,- խորհրդարանում լրագրողների հետ զրույցում ասաց իմքայլական պատգամավոր Ռուբեն Ռուբինյանը։

Ըստ նրա, ընդհանրապես, այդ հարցուպատասխանի թեման չի եղել Շուշիի հայկական կամ ադրբեջանական լինելը։

«Շուշին պատմական հայկական քաղաք է, և դա պատմագիտական փաստ է։ 1987 թվականի դրությամբ Շուշիի բնակչության մոտ 90 տոկոսը կազմել են ադրբեջանցիները, հետևաբար, ենթադրյալ վերադարձի դեպքում Շուշիի բնակչությունը պետք է 90 տոկոսով դառնար ադրբեջանական: Վարչապետը հետադարձ հարց է ուղղել՝ ասելով, եթե ես համաձայնեի Շուշի փախստականների վերադարձին, և այնտեղ բնակչությունը 90 տոկոս ադրբեջանական դառնար, այդ պայմաններում արդյո՞ք Շուշին շարունակելու էր մնալ հայկական։

Նա հռետորական հարց էր ուղղում, թե արդյո՞ք  90 և ավելի տոկոս ադրբեջանական բնակչություն ունեցող Շուշին այդ դեպքում  հայկական էր լինելու. ես կարծում եմ, որ ոչ: Մանավանդ, որ չէր ֆիքսվում Արցախի կարգավիճակը, դա բերելու էր նրան, որ Շուշին անցնելու էր ադրբեջանական վերահկսկողության տակ»,- նշեց պատգամավորը։

Ռուբեն Ռուբինյանի պնդմամբ, Փաշինյանը չի մերժել փախստականների՝ այդ թվում Շուշի վերադարձի հարցը։

«Նա համաձայնել է այն պայմանով, որ դա կարգավիճակի հարցի առնվազն ճշգրտման հետ համընթաց: Համաձայնեք, որ մի բան է, երբ փախստականները վերադառնում են, երբ ոչ միջանկյալ կարգավիճակ կա ֆիքսված, ոչ կա վերջնական կարգավիճակի ֆիքսման առնվազն մեխանիզմ, մեկ այլ բան է, որ դա տեղի է ունենում այդ պայմաններում»,-նկատեց նա: