Ձեր վստահելի աղբյուրը

«Մենք այսօր կարևորագույն մի խնդիր ունենք. զոհվածների ծնողները միայնակ են պայքարում՝ մարդկանց իրենցից հեռացնելով, բայց նրանք պետք է հասկանան, որ այդ երեխաները միայն իրենցը չէին, այդ երեխաները նաև մերն էին»,- այսօր երկրի առաջ ծառացած խնդիրների քննարկման ժամանակ ասաց ոստիկանության գնդապետ Սայաթ Շիրինյանը։

Նրա խոսքով, իսկապես, հայ ժողովրդի հետ թուրքը հայերեն խոսեց այս իշխանությունների բերանով։

Նա հիշեցրեց, որ գործող իշխանությունները 13 հոգով սկսեցին իրենց քայլը, բայց անհասկանալի է՝ որտեղից և ինչպես կարողացան բռնազավթել իշխանությունը։

«Այսօր շատ վտանգավոր երևույթ է տեղի ունենում, քանի որ դատական համակարգը վերջին շրջանում բավականին հաջող է իրականացնում իր առաքելությունը, Փաշինյանն ուզում է ստեղծել իր դատական համակարգը, որպեսզի կարողանա շատ արագ ցանկացածին ձերբակալել և կալանավորել։ Եթե վերջին շրջանում չլիներ դատական համակարգի պարկեշտ աշխատանքը, ապա ես արդեն վաղուց ձերբակալված էի»,- նշեց նա։

Սայաթ Շիրինյանը նկատեց՝ այսօր արդեն իրավական ոլորտն էլ է քաղաքականացվել։

«Ես ինքս, որ երկար տարիներ պայքարել եմ ոստիկանություն-հասարակություն կապի համար, հիմա սարսափով եմ լսում այս ոստիկանության և ԱԱԾ-ի մասին։ Մենք արդեն երեք տարի ականատես ենք պատերին ծեփելու և ասֆալտին փռելու երևույթներին»,- ասաց նա։

Ոստիկանության գնդապետը նշեց, որ մարդիկ հիասթափված են, բայց պետք չէ կոտրվել, պետք է ոտքի կանգնել և հեռացնել «դավաճանին»։

Սայաթ Շիրինյանը նաև ասաց, որ այսօր «ՀՓՇ»-ի վարչապետի թեկնածուն միայնակ է մնացել, նրա կողքին ազնվորեն գործում է միայն մի կուսակցություն, մյուսները՝ լուռ են։

«Այդ ազնիվ պայքարը չկա, ես կուսակցական չեմ, բայց իմ տպավորությունն այն է, որ արդեն կուսակցությունները պորտֆելների բաժանման հարց են լուծում։ Մենք պետք է գտնենք ձևաչափ, որով կկարողանանք հասարաությանն ուղղորդել։ Ասում են՝ Վազգեն Մանուկյանին չենք ուզում, բա ո՞ւմ եք ուզում՝ Փաշինյան Նիկոլի՞ն։ Մենք գրեթե կորցրել ենք մեր երկիրը։ Մենք տարիների ընթացքում հայտնվելու ենք կոլապսում, որի պատճառը հենց այս իշխանությունն ու պարտությունն են լինելու։ Այն, որ այս իշխանությունների գործողությունները քայլ առ քայլ պատճառաբանված են եղել, ես համոզված եմ»,- նշեց Սայաթ Շիրինյանը։

Նա առաջարկեց, որ մշակութային գործիչները հասարակությանն իրենց արժեքավոր խոսքը հասցնեն՝ տարբեր հարցազրույցների  միջոցով։

«Կան մարդիկ, որ ասօր իսկապես խոսում են ձեր խոսքին։ Եկեք ու այդ վակուումը լրացրեք»,- եզրափակեց խոսքը Սայաթ Շիրինյանը։

Ոստիկանության գնդապետը հիշեցրեց, որ հասարակությանը ապակողմնորոշող մշակութային գործիչներ են եղել, որոնք մի օր Շուշին բոմժանոց են անվանել, հաջորդ օրը գործող իշխանություններին գովերգել, իսկ այժմ էլ ասում են, թե մոլորված են։

«Դուք մոլորված չեք, դուք մոլորեցրել եք մարդկանց»,- նկատեց նա։