Ձեր վստահելի աղբյուրը

«Մեր հայրենիքը գլորվում է  անդունդը, մի ձեռքի երկու մատով մի կերպ կառչած է անդունդի եզրին, որ մինչև վերջ չխորտակվի»,- հանրության կողմից ճանաչված գիտնականների, մշակույթի և արվեստի գործիչների, իրավաբանների հանդիպմանն ասաց հոգեբան Միհրդատ Մադաթյանը։

Նա պատմեց, որ երեկ է վերադարձել Արցախից, ավելի սարսափելի է աչքով տեսնել այն ամենը, ինչ տեղի ունեցավ։ Հոգեբանի  խոսքով, կարող են արձանագրել, որ բոլոր ոլորտներում այս իշխանությունը ձախողել է, ու այդ ձախողումը շարունակվում է։

«Մենք իրավունք չունենք լռել այս պահին։ Երբ որ ամեն ինչ լավ է  եղել հայրենիքում, ամեն մեկն իր ոլորտում է աշխատել։ Բայց այսօր իրավունք չունենք նստել հանգիստ ու ստեղծագործել կամ նկարել,  երևի որևէ մեկի մոտ չի ստացվում»,- նշեց Մ. Մադաթյանը։

Նա նշեց, որ այսօր  ժողովրդի մի հատված դժգոհ է այս իշխանություններից, բայց չի գտնում այն կորիզը, որի շուրջ պետք է համախմբի։ 

«Կան մարդիկ, որոնք չեն կիսում այսօրվա ընդդիմադիր կուսակցությունների հայացքները։ Մեր  նպատակը նաև դա է՝ ստեղծել կորիզ, և այն մարդիկ, որոնք ապակուսակցական են, փորձեն համախմբվել գոնե այս կորիզի շուրջ, միասին աշխատենք այս ընթացքում, մինչև հայրենիքը դուրս կգա փրկության ճանապարհ, որից հետո, համոզված եմ, յուրաքանչյուրը կշարունակի իր գործունեությունն իր ոլորտում, անելիքները շատ կունենա»,- ասաց Մ. Մադաթյանը։

Հավաքի կազմակերպիչ, «Հայ-իտալական մշակութային համագործակցություն» կազմակերպության ղեկավար Դավիթ Խաչատրյանը  ասաց, որ այսօր ավելի քան երբևէ իրավունք չունեն անտարբեր մնալ հայրենիքի ճակատագրի նկատմամբ։

«2,5 տարի է մեր հայրենիքում իրականացվում է ապազգային, ազգադավ քաղաքականություն, նպատակաուղղված քայքայում են բոլոր կարևորագույն, պետականաշինության հենասյուներ հանդիսացող արժեքները՝ եկեղեցի, բանակ,  կրթություն, մշակույթ։ 

Հայապահպանության կարևոր արժեքները թիրախ են դարձել այսօրվա իշխանությունների համար, դրանք փլուզման ճանապարհին են գտնվում»,- նշեց մտավորականը։

Ըստ նրա, հայրենիքի կորուստը բոլորի համար օրհասական խնդիր է դարձել, ազգային արժեքների պահպանման գործընթացում կարևոր է մտավորականների համախմբումը, այն մտավորականների, որոնք ակտիվ գորունեություն են ծավալել իրենց երկրում։