Ձեր վստահելի աղբյուրը

Այսօր Ստրասբուրգում մեկնարկած ԵԽԽՎ ձմեռային նստաշրջանում Եվրոպայի խորհրդի գլխավոր քարտուղար Մարիա Պեյչինովիչ-Բուրիչին մի քանի պատգամավորներ հարց ուղղեցին՝ Ադրբեջանում պահվող հայ ռազմագերիների մասին։

Մասնավորապես պատգամավոր Ժակ Մեղն ասաց, որ անգամ եթե քննարկում չի լինելու ԵԽԽՎ-ում այս թեմայով, «մենք պետք է լսենք իրավիճակի մասին, քանի որ այն ծայրահեղ անհանգստացնող է»։

Հայ ռազմագերիների վերաբերյալ հարցին պատասխանելու փոխարեն Մարիա Պեյչինովիչ-Բուրիչը կրկնեց այն, ինչ ասել էր արդեն իր ելույթում, որ շատ անհանգստացած էին, երբ հակամարտությունը բռնկվեց, որ կիրակի առավոտ էր, որ տեղեկացան ու կառույցի ղեկավարներն հենց այդ օրը կոչ արեցին պատերազմի մեջ չմտնել։

«Ադրբեջանի ու ռազմագերիների հետ կապված՝ այն, ինչ կարող եմ ընդահուր ասել հետևյալն է․ պատերազմի սկսվելուց ԵԽ-ն առաջիններից էր, եթե ոչ առաջին կառույցը, որ արձագանքեց։ Ես, նախարարների կոմիտեի նախագահը և ԵԽԽՎ նախագահը արձագանքեցինք ու երկու երկրների ղեկավարներին կոչ արեցինք պատերազմի մեջ չմտնել։ Այս երկու երկրները միացել են ԵԽ-ին 20 տարի առաջ, և երբ նրանք միացան, պարտավորվեցին խնդիրը լուծել խաղաղ միջոցներով։ Եվ ակնհայտ է, որ պատերազմն այդպիսի միջոց չէր»,-ասաց Բուրիչը, հավելելով,  պատերազմի ավարտով մեծապես թեթևացան։
 
Բուրիչի խոսքերով, պետք է հարգանքի տուրք մատուցել ԵԱՀԿ Մինսկի խմբի համանախագահությանը Լեռնային Ղարաբաղի հարցով, սակայն կան նաև այլ ճակատներ ու գործողություններ, որ ԵԽ-ն կարող է իրականացնել, երբ պատերազմն արդեն ավարտվել է։

«Ես մտել եմ երկխոսության մեջ երկու երկրների հետ և խնդրել եմ մի խումբ գործընկերներին՝ գնալ երկու երկրներ, խոսել իշխանությունների հետ ու տեսնել, թե ինչ կարող ենք մենք անել՝ աջակցելու նրանց՝ մեր մանդատով ու երկու կողմերի համաձայնությամբ»,-ասաց Բուրիչը։

Նշվեց, որ նոյեմբերին եղել է այց Երևան, նախորդ շաբաթ՝ Բաքու։

«Այժմ մենք պետք է ներկայացնենք մի քանի հնարավոր միջոցառումներ, այնուհետ գնալ երկու երկրներ ու տեսնել՝ ինչ կարող ենք անել։ Այդ պատճառով առաջիկա շաբաթներին կներկայացնենք ճանապարհային քարտեզ»,-ասաց ԵԽ գլխավոր քարտուղարը։

Հիշեցնենք նաև, որ ԵԽԽՎ նստաշրջանի մեկնարկին ընթացիկ հարցերի տակ առաջարկվել էր նաև ընդգրկել  «Ադրբեջանի իշխանությունների կողմից հայ ռազմագերիների և այլ գերիների հայրենադարձության անհիմն ձգձգումը` որպես Մարդու իրավունքների եվրոպական միջազգային ստանդարտների խախտում»։ Սա ներկայացված 7 թեմաներից մեկն էր։ Սակայն ԵԽԽՎ-ն որոշեց, որ Նավալնիի ձերբակալությունն ու տեխնոլոգիական ընկերությունների սպառնալիքն առավել հրատապ թեմաներ են, քան ռազմագերիները, որոնց կյանքին ամեն վայրկյան վտանգ է սպառնում։