Ձեր վստահելի աղբյուրը

Վնասվածքաբանության և օրթոպեդիայի գիտական կենտրոնի աշխատակիցները կանգնել են փաստի առաջ. հունվարի 8-ին նրանք հիվանդանոցի հետ քաղիրավական պայմանագիր են կնքել՝ նախապես իմանալով, որ իրենց աշխատավարձերը կրճատվում են 15%-ով, բայց փաստաթղթում նշված է եղել, որ հերթապահության յուրաքանչյուր օրվա համար վճարվելու է 15 հազար դրամ՝ նախկին 33 հազար դրամի փոխարեն։

Եվ աշխատակիցների մեծամասնությունը, լինելով ուսանող, ստիպված համաձայնել է այս որոշմանը՝ հույս ունենալով, որ գոնե մինչև փաստաթղթի ստորագրումն ընկած ժամանակահատվածի համար կվարձատրվի նախկին պայմանագրին համապատասխան։

«Ի սկզբանե խոսակցություններ կային, որ աշխատավարձերի իջեցում է սպասվում, բայց որևէ օֆիցիալ բան չկար։ Հունվարին մեզ ասացին, որ նոր պայմանագիր պետք է կնքենք, ըստ որի՝ մեր աշխատավարձը 15%-ով, հետո ինչպես պարզ դարձավ շատ ավելի շատ՝ գրեթե 60% կրճատվելու է։ Նաև նշեցին, որ հունվարի մեկից սկսած հենց այդպես է հաշվվելու մեր աշխատավարձը։ Այսինքն՝ մեզ ամսվա կեսին ասում են, որ մինչ այդ եղած բոլոր սմենների համար ևս մենք պետք է 15 հազար դրամ գումար ստանանք։  Բայց այս դեպքում, անգամ եթե երկիրը ծանր տնտեսական վիճակում է, իրավական չէ, որ հետին ժամանակով պայմանագիր են մեզ հետ կապում։ Գոնե 14 օր առաջ պետք է մեզ ասեին, որ հունվարի 1-ից մեր աշխատավարձերն իջեցնում են»,-Panorama.am-ի հետ զրույցում ասաց կենտրոնի աշխատակիցնրից մեկը, ում անունն իր ցանկությամբ չենք հրապարակում։

Բացի այդ, ըստ մեր զրուցակցի, երբ իրենք հայտնել են իրենց մտահոգությունների մասին, տնօրինությունից պատասխանել են՝ ուզում եք, ստորագրեք ու շարունակեք աշխատել, չեք ուզում՝ աշխատանքից դուրս եկեք։

«Մեզ այսօր կանչել են նոր պայմանագիր ստորագրելու, որը դեկտեմբերի 30-ի ամսաթվով է, որ իբր մենք այդ ժամանակ արդեն ծանուցվել ենք, թե հունվարի 1-ից մեր աշխատավարձերը պետք է նվազեն։ Բայց մենք չենք ծանուցվել։ Իրենք մեզ հետին թվով պայմանագիր են ստորագրել տալիս՝ ցույց տալու, որ օրինական դաշտում են աշխատում»,- ասաց նա։

Միևնույն ժամանակ, բուժաշխատողը նշեց՝ եթե իրենց ի սկզբանե ասին, որ իրենք հունվարի 1-ից արդեն իջեցված աշխատավարձով են աշխատելու, իրենց մեծամասնությունը շարունակելու էր աշխատել, քանի որ ուսանողներ են և իրենց համար կարևոր է այդ աշխատանքը։

«Բայց մեզ, կոպիտ ասած, գցել են։ Այստեղ մեծամասամբ ուսանողներ են աշխատում, գրեթե 40 հոգի նույն խնդիրն ունի։ Երբ ապրիլին եկել ենք աշխատանքի, այստեղ բուժքույրեր չեն աշխատել, փախել են COVID-ից, իսկ այսօր հիվանդանոցի տնօրինությունն ասում է՝ դե չեք ուզում, դուրս եկեք, ձեր փոխարեն բուժքույրեր կբերենք, կաշխատեն»,- նկատեց մեր զրուցակիցը։

Բացի այդ, նրա խոսքով, իրենց հիմա ասում են, թե ուսանողներին չեն կարող որպես միջին բուժաշխատող ընդունել. «Միջին բուժաշխատողների աշխատավարձերը 3 հազար դրամով են կրճատել։ Բայց ուսանողները ունեն նույն պարտականությունները, ինչ դիպլոմ ունեցող բուժաշխատողները։ Ե՛վ 15 հազար դրամ, և՛ 30 հազար դրամ ստացողը անում է միջին բուժաշխատողի գործ»։

Նա նշեց, որ կենտրոնի տնօրինությունն իրենց ասում է՝ աշխատավարձերի կրճատումը նախարարի հրամանի համաձայն է իրականացվում։ Բայց, երբ իրենք խնդրել են ներկայացնել այդ հրամանը, որևէ փաստաթուղթ իրենց չի տրամադրվել։

«Մենք փորձել ենք նաև մյուս COVID կենտրոններից տեղեկանալ՝ կա՞ն աշխատավարձերի կրճատումներ, թե՞՝ ոչ, ու  տեղեկացել ենք, որ գոնե հունվար ամսվա համար նման որոշում չկա։ Եթե աշխատավարձերի համահարթեցում է լինում, չեմ կարծում, որ միայն մի կենտրոնին  պետք է վերաբերի»,- նշեց մեր զրուցակիցը։

Առողջապահության նախարարությունից Panorama.am-ին հայտնեցին, որ չկա նախարարի հրաման, ըստ որի՝ COVID կենտրոնների բուժաշխատողների աշխատավարձերը պետք է կրճատեն։

Մենք զանգահարեցինք նաև Վնասվածքաբանության և օրթոպեդիայի գիտական կենտրոն, սակայն ընդունարանի աշխատակիցն ասաց, որ տնօրենի Ժ/Պ Սերգեյ Մանուկյանը ժողովի է։ Ավելի ուշ արդեն մեր զանգերն անպատասխան մնացին։