Ձեր վստահելի աղբյուրը

Այսօր Ստրասբուրգում մեկնարկում է Եվրոպայի խորհրդի խորհրդարանական վեհաժողովի ձմեռային նստաշրջանը, որն անցկացվելու է հիբրիդային տարբերակով՝ հունվարի 25-ից 28-ը, թույլ տալով անդամներին հեռակա մասնակցել կամ անձամբ ներկա լինել Ստրասբուրգում:

Վեհաժողովը կքննարկի COVID-19 պատվաստանյութերի էթիկական, իրավական և գործնական նկատառումները: Բանավեճի ընթացքում խորհրդարանականներին կդիմի ԱՀԿ գլխավոր տնօրեն Թեդրոս Ադանոմ Գեբրեյեսուսը:

Վեհաժողովին ներկայացվել է նաև ընթացիկ հարցերի բանավեճի երեք դիմումներ՝

- «Ուկրաինայում ռուսերեն և այլ ազգային փոքրամասնությունների լեզուների արգելում»

- «Ադրբեջանի իշխանությունների կողմից հայ ռազմագերիների և այլ գերիների հայրենադարձության անհիմն ձգձգումը` որպես Մարդու իրավունքների եվրոպական միջազգային ստանդարտների խախտում»

- «Ղրիմի ժամանակավոր գրավված Ինքնավար Հանրապետությունում և Սևաստոպոլ քաղաքում մարդու իրավունքների փաստացի իրավիճակը՝ «Կովիդ -19» համաճարակների ժամանակ»:

Վեհաժողովին առաջարկվել է օրակարգում ներառել հրատապ քննարկման երեք թեմաներ՝

- «Ալեքսեյ Նավալնիի ձերբակալումը և կալանավորումը 2021 թվականի հունվարին»
- «Բելառուսում իրավիճակի վատթարացումը»
- «Խոսքի ազատությունը (ՄԻԵԴ 10-րդ հոդված) «Big Tech» ընկերությունների կողմից սպառնալիքի տակ»:

Օրակարգի այլ թեմաներն են ԵԽ անդամ երկրներում հասարակական կազմակերպությունների գործունեության սահմանափակումները, քրոնիկ և երկարատև հիվանդություններով տառապող անձանց նկատմամբ խտրականությունը:

Նստաշրջանի ընթացքում վեհաժողովը կընտրի Եվրոպայի խորհրդի գլխավոր քարտուղարի տեղակալին, վեհաժողովի գլխավոր քարտուղարին և Մարդու իրավունքների եվրոպական դատարանում Հունաստանի և Շվեյցարիայի դատավորներին: Այս ընտրություններն անցկացվելու են անհատական էլեկտրոնային քվեարկությամբ:

Արդարադատության ԵՄ հանձնակատար Դիդյե Ռեյնդերսը կդիմի Վեհաժողովի անդամներին և կպատասխանի նրանց հարցերին, ինչպես նաև Գերմանիայի արտաքին գործերի նախարար Հեյկո Մաասը (Նախարարների կոմիտեում Գերմանիայի նախագահության շրջանակներում) և Եվրոպայի խորհրդի գլխավոր քարտուղար Մարիա Պեյչինովիչ Բուրիչը։

Քննարկումներ կլինեն նաև Լեհաստանում և Մոլդովայի Հանրապետությունում դատավորների անկախության և Մարդու իրավունքների եվրոպական դատարանի վճիռների կատարման վերաբերյալ:

Կքննարկվի նաև Վրաստանում խորհրդարանական ընտրությունների վերաբերյալ զեկույցը: Վեհաժողովն իր վերջնական օրակարգը կորոշի նստաշրջանի բացմանը: