Ձեր վստահելի աղբյուրը

«Որոշեցի զբաղվել քաղաքականոթյամբ՝ ելնելով մեր երկրում ստեղծված իրավիճակից»,- ասուլիսում ասաց «Թովմասյան» բարեգործական հիմնադրամի ղեկավար Արտակ Թովմասյանը:

Նրա կարծիքով, 2020 թ. նոյեմբերի 9-ի կապիտուլյացիայի պայմանագրի հետևանքով երկրում ստեղծված իրավիճակը տեսնելով՝ ամենաազգասեր ու կայացած մարդ պետք է հնարավորություն ունենա ասելու իր խոսքը, իր ուժերի չափով կարողանա օգտակար լինել երկրին:

«Ստեղծված իրավիճակն ինձ և իմ կարծիքով արժանապատիվ մեր հայ զավակներին բերել է տագնապալի վիճակի: Ինձ թվում է՝ ամեն մի հայ, ով հասկանում է, թե ինչ է պատիվը, արժանապատվությունը, ինչ է պետք հայրենիքին պաշտպանելու, սատարելու համար, պետք է իր խոսքն ասի»,- ասաց Ա. Թովմասյանը:

Նա ընդգծեց՝ իր հետևում կանգնած, իրեն ուղղորդած, հուշած որևէ քաղաքական ուժ չկա, ընդհակառակը՝ մեծ մասը զարմանում ու հարց են իրեն տալիս, թե ինչու է դա իրեն պետք:

«Գիտակից, կայացած մարդը, տնտեսության, երկրի վիճակից հասկացող մարդը հասկանում է, որ պետք է մարդ կամիկաձե լինի, որ գնա դրան: Ոչ մի ոչ հայրենասեր մարդ դրան չէր գնա: Խորն ուսումնասիրելուց հետո տնտեսագետները կասեն, թե ինչ վիճակի մեջ է մեր երկիրը և ինչ կարող է սպասվել: Ներկա իշխանության հրաժարականի ձգձգման դեպքում անելանելի վիճակի առաջ կարող է կանգնել մեր ազգը»,- ասաց Ա. Թովմասյանը:

Նա նշեց, որ գործի բերումով ծանոթ է եղել Հայաստանի նախկին բոլոր ղեկավարներին, նաև 2018 թ. սեպտեմբերի 7-ին  հանդիպել է Նիկոլ Փաշինյանի հետ: Ա. Թովմասյանի խոսքով, բոլորի հետ եղել է կապ, ծանոթություն, աջակցել է Հայաստանին ներդրումների միջոցով:

Հարցին՝ թե ովքե՞ր են լինելու նրա թիմում, նշեց, որ այժմ բանակցություններ են վարում տարբեր, նաև սփյուռքի ներկայացուցիչների, տարբեր ՀԿ-ների հետ, ունենում են հազարավոր նամակներ, առաջարկությունները, ովքեր ցանկանում են իրենց մասնակցությունն ունենալ նոր քաղաքական խմբավորմանը:

«Փորձում ենք ամեն ինչ անել, որ չսխալվենք թիմակիցների հավաքագրելու գործում: Իհարկե, դա ժամանակ է պահանջում: Ավարտից հետո կասենք, թե ովքեր են մեր աջակիցները:  Մեր հիմնական նպատակն այն է, որ լինեն մեր հանրության շրջանում ոչ ճանաչված, բայց գործերով կայացած մարդիկ:

Նայելով այսօր ինչ է կատարվում, ինչ մարդիկ են գալիս մեր իշխանության, պաշտոններ զբաղեցնում, ուսումնասիրելով նրանց անցած գործունեությունը, տեսնում ենք՝ չկան այնպիսի մարդիկ, որոնք ունեն իրականացրած մեծ ծրագրեր»,- ասաց նա:

Ասուլիսի ժամանակ հարց հնչեց, թե ձեր անունը շրջանառվում է  անօրինական զենք- զինամթերքի բիզնեսի հետ կապված, նշում են, որ դրա եկամուտները պահվում են Ֆինլադինայում ստեղծված ինչ-որ կազմակերպությունում, նաև որ պատրաստվում եք օրինականցնել, ի՞նչ բիզներսի մասին է խոսքը. Ա. Թովմասյանը պատասխանեց.

«Ես զարմացած եմ, թե ինչու է իմ՝ քաղաքականությամբ զբաղվելու հայտարարությունը իմ անվան շուրջ նման աժիոտաժ ստեղծել: Դուք դրա մեջ կասկած չե՞ք տեսնում, որ մարդը մինչ այդ բարեգործությամբ էր զբաղվում, ներդրումներ էր անում, ոչ մի անօրինական բան չկար, հենց քաղաքականության անուն տվեց՝ միանգամից սկսեցին ծագել անօրինական ինչ որ բաներ:

Ես անօրինական ոչ մի գործարքների հետ կապ չունեմ»:

Նա ասաց, որ 2,5 տարի առաջ մարտին պաշտպանության նախարարության իրականացրած միջոցառման շրջանակում Հայաստան էր  հրավիրել աշխարհում ամենամեծ կազմակերպություններից մեկին, որն արտադրում է զրահապատ մեքենաներ, Հայաստանին աջակցելու համար առաջարկել է նույն արտադրությունը դնել այստեղ: 
«Պատրաստ էին ներդրումներ անել զրահապատ մեքենաների՝ ոչ միայն քաղաքացիական, նաև ռազմականն արտադրության համար, Հայաստանը կդառնար զրահապատ մեքենաների արտադրող: Այնուհետև հանդիպումներ ենք ունեցել Նիկոլ Փաշինյանի, պաշտպանության նախարարի հետ, համաձայնացրել ենք, որ մենք պատրաստ ենք Հայաստանում ներդրում անել նման արտադրություն ստեղծելու համար:
Իսկ թե ինչո՞ւ նման արտադրություն չստեղծվեց, կարող եք այդ հարցը տալ կառավարության  անդամներին, սկսած Փաշինյանից, բոլոր հանձնաժողովների անդամներին, էկոնոմիկայի նախարարին, երևի ավելի լավ կպատասխանեն, թե ինչու այս ընթացքում դա չի արվել»:

Հարցերից մեկին ի պատասխան՝ Արտակ Թովմասյանն ասաց, որ Հայաստանի Հանրապետության քաղաքացի է. «Չնայած նրան, որ երկար տարիներ գտնվել եմ Հայաստանի սահմաններից դուրս, ոչ մի ուրիշ քաղաքացիություն չեմ ընդունել, ոչ Ռուսաստանի, ոչ Ուկրաինայի: Սրանք այն երկրներն ենք, որտեղ հիմնականում իմ չափահաս կյանքն անցկացրել եմ:

Չեմ դիմել և չեմ էլ ունեցել այլ քաղաքացիություն»:

Հարցին՝ դուք ինչի՞ համար եք համագործակցության մեդալ ստացել նախկին ոստիկանապետ Վլադիմիր Գասպարյանից, դա սովորաբար տրվում է գործակալներին, որոնք օգնում են բացահայտել այս կամ այն գործը, դուք ո՞ր  գործի բացահայտմանն եք աջակցել, Ա. Թովմասանն ասաց, որ «Թովմասյան» հիմնադրամի միջոցով ոստիկանության ակադեմիայի տարածքում սպորտային համալիր են կառուցել, աջակցել ու ստեղծել է կրիմինալիստիկայի աշխատասենյակներ, ամեն տարի կազմակերպում էին ֆուտբոլային հատուկ մրցաշարի: Միջոցառումներից մեկի ժամանակ էլ պարգևարտրվել է: