Ձեր վստահելի աղբյուրը

Քաշաթաղի շրջանի բնակիչները Կառավարության շենքի դիմաց բողոքի ակցիա են իրականացնում։ Նրանք պահանջում են, որպեսզի լուծում տրվի իրենց առաջ ծառացած հազարավոր խնդիրներին, որոնք ի հայտ են եկել պատերազմից հետո։                          

Նրանք նշում են, որ իրենց բողոքը որևէ քաղաքական շահ չի հետապնդում։

«Մեր տուն ու ունեցվածքը մնացել է թշնամուն։ Մեզ տարհանելուց երկու ժամ առաջ են զգուշացրել, որ պետք է լքենք մեր տները»,- ասաց Միջնավան քաղաքի բնակիչներից մեկը։

Նրա խոսքով, որևէ մեկը չի կարողացել իր հետ ինչ-որ բան վերցնել, բոլորը կորցրել են իրենց տունն ու ապրուստի միջոցը. «Թող մեզ տնով ապահովեն, որ ապրենք»։

Քաղաքացիներից մեկն էլ նկատեց՝ հիմա իրենք չունեն մշտական բնակության վայր՝ մեկ այստեղ են, մեկ՝ այնտեղ։

«Մի քանի անգամ դրամական օգնություն ենք ստացել, բայց հիմա համայնքապետարանից ասել են, որ էլ չեն օգնելու։ Բա ինչո՞վ պիտի ապրենք։ Երեխքը գետնին են քնում։ Բոլոր կառույցներին դիմել ենք, ո՛չ պատասխան կա, ո՛չ արձագանք»,- հարց հնչեցրեց նա։

Քաղաքացիներից մեկն էլ վրդովված նշեց՝ իրենց «անտեր ու դուս» գցել են փողոցները, մի երկու կոպեկ աջակցություն են տվել ու վերջ։

«Տալու դեպքում էլ մուննաթ-զուննաթով են տալիս։ Մենք մի տանիք ենք ուզում, որ տակը ապրենք։ 300 հազար դրամ աջակցություն են տալիս՝ դրանով տան վարձ տա՞նք, ուտելիք առնե՞նք, թե՞ կոմունալ վճարենք: Անչափահաս երեխեք ունենք, անգամ լվացք անելու հնարավորություն չկա, սառնարան չունենք։ Երկու տուն լիքը թողել, դուրս ենք եկել»,- ասաց քաշաթաղցիներից մեկը։

Մեկ այլ քաղաքացի էլ, ով մասնակցել է և՛ Ապրիլյան քառօրյա պատերազմին, և՛ Արցախյան վերջին պատերազմին, նշեց՝ այսօր թափառականի կյանքով է ապրում։

«Խի կռված տղերքին պիտի էս ձևով նայե՞ն։ Մահն աչքի առաջ ունենալով կռվել ենք։ Ինչ ասես տեսել ենք, բայց էսօր թափառական ենք։ Էջմիածնում մի փոքր սենյակում 11 հոգով ապրում ենք։ Երկու տուն թողել ենք թշնամուն ու եկել»,- ասաց նա։

Հայկազյան համայնքի ղեկավարն էլ ներկայացրեց, որ համայնքից բնակիչները տեղահանվել են սկսած հոկտեմբերի 18-ից։

«Բռնի ձևով տեղահան են արել։ Համայնքների բնակիչների մեծամասնությունը եղել է ռազմաճակատում, իսկ համայնքները հանձնվել են։ Այժմ մեր պահանջն է, որ մեր գույքի փոխհատուցում լինի՝ համարժեք և խելամիտ ձևով։ Մենք չենք ասում՝ ունեինք 100 միլիոն, թող հենց այդ չափով տան։ Թող խելամտության սահմաններում փոխհատուցում լինի»,- նշեց նա։
Ըստ համայնքի ղեկավարի, Քաշաթաղից այսօր տեղահաված է մոտ 13000 բնակիչ՝ 3000 ընտանիք։

«ՀՀ-ից տրամադրվել է 300 հազար, ապա նաև 68 հազար դրամ աջակցություն։ Բայց բնակչության 20%-ը դրանից էլ չի կարողանում օգտվել։ Վարձով ապրել էլ չենք կարող՝ թանկ է։ Մեզ թող փոխհատուցում տան, կարողանանք գյուղերում տներ առնել, հող մշակել։ Չենք ուզում նպաստառու լինել»,- շեշտեց համայնքապետը։