Ձեր վստահելի աղբյուրը

«Երևանի պետական համալսարան» հիմնադրամի հոգաբարձուների խորհրդի նախագահի պաշտոնում առաջադրվեցին երկու թեկնածուներ՝ Արտաշես Շահինյանի անվան ֆիզմաթ դպրոցի տնօրեն Հայկազ Նավասարդյանը և Երևանի պետական համալսարանի կառավարման և գործարարության ամբիոնի վարիչ Կառլեն Խաչատրյանը: Հայկազ Նավասարդյանի թեկնածությունն առաջադրեց ԵՊՀ ՀԽ նիստը նախագահող, ֆիզիկամաթեմատիկական գիտությունների դոկտոր, պրոֆեսոր Անահիտ Չուբարյանը, իսկ Կառլեն Խաչատրյանի՝ ԵՊՀ արևելագիտության ֆակուլտետի իրանագիտության ամբիոնի վարիչ Վարդան Ոսկանյանը:

Հայկազ Նավասարդյանն ասաց, որ երեկ օրվա վերջում է Ա. Չուբարյանը հայտնել իրեն իր թեկնածության առաջադրման մասին, դրա համար այս պահին չի կարող ներկայացնել ռազմավարություն, զարգացման ծրագիր, բնականաբար, միասին պետք է հաստատեն:  Նա նշեց, որ ֆիզմաթ դպրոցն այսօր գտնվում է  լավագույն ռեյսերի վրա, իր դպրոցի՝ տնօրեն  աշխատելու ժամկետի պայմանագիրը լրանում է դեկտեմբեր ամսին, դրանից հետո չի պատրաստվում կրկին առաջադրվի, քանի որ կա նաև 65 տարեկանի սահմանափակում: Նա նշեց, որ հոգաբարձուների խորհրդի նիստը տարեկան մի քանի անգամ է գումարվում, պետք է աշխատի հասցնել նիստերին մասնակցել՝ չվնասելով, բնականաբար, դպրոցը:

Հարցին՝ լինելով ֆիզմաթ դպրոցի տնօրեն, ինչպե՞ս եք գնահատում ԵՊՀ ֆիզիկայի, մաթեմատիկայի ֆակուլտետների զարգացման ծրագիրը, դրանց գործունեությունը, Հայկազ Նավասարդյանն ասաց, որ ֆիզիկայից ունեն միջազգային մրցույթների մեդալակիրներ, հիմա աշխատում են որպես ծրագրավորողներ:

«Ցավոք սրտի, այսօր մեր երկրում ֆիզիկայի, մաթեմատիկայի տեսակետից տեսաբան աշխատողների վիճակն այդքան էլ բարվոք չէ, նկատի ունեմ սոցիալական վիճակ, աշխատավարձ, որի պատչառով շատերը ծրագրավորման ուղղությամբ են գնում՝ ավարտելով ֆիզիկայի կամ մաթեմատիկայի ֆակուլտետներ:

Ընդհանրապես, գտնում են, որ ինժեներությունը մեզ մոտ շատ թույլ է, նկատի ունեմ նաև հիմնված ֆիզիկայի, ռադիոֆիզիկայի, ծրագրավորման, մաթեմատիկայի համատեղ առաջացրած ինժեներությունը, ինչին ականատես եղանք նաև պատերազմի ժամանակ:

Մշտապես բանակցությունների մեջ ենք եկել ֆակուլտետների դեկանների հետ նոր մասնագիտություններ ստեղծելու համար: Ֆիզիկայի ֆակուլտետում կստեղծվեն նոր մասնագտություններ»,- ասաց Հ. Նավասարդյանը:

Կառլեն Խաչատրյանն ասաց, որ կենսագրության վերջին 20 տարին կապված է ԵՊՀ-ի հետ: Նա նշեց, որ հոգաբարձուների խորհուրդը լինելով համալսարանի կառավարման բարձրագույն մարմինը, առաջնային պետք է ուշադրություն դարձնի համալսարանում կառավարման արդյունավետության բարձրացմանը:

«Համատեղ ջանքերով պետք է փորձենք համալսարանի կառուցվածքի օպտիմալության գնահատական տալ, փորձենք վերլուծություններ կատարել ու հասկանալ՝ արդյոք ԵՊՀ առկա կառուցվածքն օպտիմալ է, այն մարտահրավերներն ու խնդիրները, որոնք ծառացած են  համալսարանի առջև, հնարավո՞ր է լուծել նման կառուցվածք ունենալով»,- ասաց Կ. Խաչատրյանը:

Նա նշեց, որ 2020 թվականին ավարտվել է համալսարանի զարգացման ռազմավարական ծրագրի գործողության ժամկետը, ըստ էության ԵՊՀ-ն ռազմավարական ուղենիշներ, հեռանկար, տեսլական չունի, շատ է կարևորում այդ փաստաթղթի ձևավորումը:

Կ. Խաչատրյանի կարծիքով, անելիք ունեն, որպեսզի բիզնեսը մտնի կրթական տարածք ու կադրեր պատվիրի: Շատ է կարևոր նաև համալսարանի միջազգայնացման խնդիրները,  արտասահմանցի ուսանողների քանակի ավելացումը: